49
याकूब आ तौ आन आसीक
ब्‍यवस्‍था ३३:-
मिनु याकूबमी आ तौ आन कली ब्रेश्‍शा मेको आन कली “नोले इन कली मार मार दुम्‍बा, नेंचा कली एकेर बुक्‍कीन। याकूब आ तौपुकी बुक्‍शा, इन आफ इस्राएल, आं लोव़ नेनीन।
रूबेन
रूबेन, गे आं ङोंइती जरमेशो तौ नवे। ङोंइती ङा आं बोल नु सक्ति बाक्‍नेवे। नेल्‍ल क्‍येङा शिरशो नु सक्ति पाइश्‍शो ङोंइती ङा बाक्‍ते। उत्‍पत्ती २९:३२; ब्‍यवस्‍था २१:१७ समुन्‍द्र ङा छाल खोदेंशो पा गे हिम्‍सीशो थुं पाइश्‍शो मुर दुम्‍नेवे। मारदे हना गे इ आफ आ खाट ङोइश्‍शा, बिथोलो पाप्‍तीवी। आं इप्‍तीकेम बाक्‍ते। गे मान मताइब दुम्‍नेवे। उत्‍पत्ती ३५:२२
सिमियोन नु लेवी
सिमियोन नु लेवी वोबु बाक्‍नीसी। गे हुश ख्राक्‍श पोक्‍ब बाक्‍नीसी। उत्‍पत्ती ३४:२५ आं थुं इस ख्रुइश्‍शा अरेशोम गेनायो मबिस्‍सेक्‍ल, आं नें इस ग्रुम्‍तीकेमी गेनायो मदेंमल। थुं का मदुमीसे। मारदे हना इस चुरतीकेमी मुर साइक्‍तीसी। महिंब दुम्‍शा, ब्‍यफ कली गाक्‍ने मचाप्‍ब सेल्‍तीसी। इस गाइश्‍शोम सराप राइब। मारदे हना मेको ठेयब बाक्‍ब। इस चुरचाम सराप राइब। मारदे हना मेको शिशी मपाइश्‍शो मरिम्‍शो बाक्‍ब। थुं का मदुमीस। इस्राएल रागीमी ब्राशा बाक्‍कीस। यहोसु १९:१-९; २१:१-४२
यहूदा
यहूदा, इ लोक्‍बपुकीमी इ कली ठेयब सेल्‍मेक्‍ल। इ गुइमी इ जोरी सत्रु आन क्रोक्‍क्रो निप्‍नेवे। इ आफ आ आल इ ङोंइती खुम्‍की पा बाप्‍नीम। गन्‍ती १०:१४; न्‍यायाधीस १:१-२ यहूदा गुप्‍स आ चाइक्‍ब खोदेंशो बाक्‍ब। सिखार ब्‍वशा ठेयब दुम्‍ते। ठेयब गुप्‍स खोदेंशो पा खुम बाप्‍ब। गुप्‍सनी खोदेंशो पा इप्‍ब। सुम मेको कली बोक्‍पाइक्‍ने चाप्‍बा? गन्‍ती २३:२४; इजीकीएल १९:२; प्रकाश ५:५ 10 ठेयब श्‍येत रे प्रोंइब मजाक्‍म सम्‍म आ राज दन्‍ड आ सासन पतीके आ गुइमी लीब। जात जात ङा मुर मेको आ नोले खोइक्‍नीम। गन्‍ती २४:१७; १इतिहास ५:२; हिब्रू ७:१४; इजीकीएल २१:३२ 11 मेकोमी आ गधा अङगुर आ बोटम पाइक्‍ब, आ गधा आ चाइक्‍ब नेल्‍ल क्‍येङा रिम्‍शो अङगुर बोटम पाइक्‍ब। आ फेक्‍तीक वा अङगुर शांबुम मुरब। आ वा अङगुर आ रसम ख्रुम्‍ब। योएल ४:१८ 12 आ मिक्‍च अङगुर क्‍येङा रिम्‍शो रङ ङा बाक्‍ब। आ ख्रुइ दूध क्‍येङा बुश बाक्‍नीम।
जबूलून
13 जबूलून समुन्‍द्र नु डोंगा वोइक्‍तीकेमी बाक्‍ल। सीदोन सहर सम्‍म आ बाक्‍तीके दुम्‍ल। यहोसु १९:१०-१६
इस्‍साकार
14 इस्‍साकार बोल्‍यो गधा दुम्‍शा, भारी आस दातेमी इप्‍ब। 15 मेकोमी नाइक्‍तीके रिम्‍शो नु रागी दारशो बाक्‍ब, दे ताप्‍तु। मेकेर कुरब दुम्‍शा, अर्को आन गेय पाइब दुम्‍त।
दान
16 दान इस्राएल आ जात ङा ठेयब मुर दुम्‍शा, अरु आन कली निसाफ पाइब दुम्‍ल। न्‍यायाधीस १३:२,२४,२५ 17 दान लांमी बाक्‍शो बुस्‍स खोदेंशो दुम्‍‍शा, मेको बीस पाइश्‍शो बुस्‍स खोदेंशो दुम्‍शा, आइक्‍च लांम बाक्‍ब। शारा ङोइक्‍ब मुर तोक्‍चा कली शारा आ गेंग्रेम कोक्‍ब। मिनु शारा ङोइक्‍ब मुर नोले गे दोक्‍ब। 18 परमप्रभु यावे, गे आं मरिम्‍शो पशो रे प्रोंइनीनी, दे रिम्‍शा बाक्‍ती। भजन संग्रह ११९:१६६; हबकुक २:३
गाद
19 रोइक्‍ब मुरपुकी गाद कली रोइक्‍चा कली जाक्‍नीम। गादमी मेको आन कली खेदा पा मेको आन के रोइक्‍ब।
आशेर
20 आशेर आ जचा थोव़क शुश ब्रोव़शो बाक्‍ब। पिपम खोदेंशो पा ब्रोव़शो जचा गेब। यहोसु १९:२४-३१
नाप्‍ताली
21 नाप्‍ताली प्रोंइशो रोकोश बाक्‍ब। मेकोमी दारदारशो चाइक्‍ब पाइब। न्‍यायाधीस ४:६-१०
योसेफ
22 योसेफ फल सिप्‍ब रवा का बाक्‍ब। आ राशी गारो तारी बाक्‍शा, ब्‍वाक्‍कु बुक्‍तीकेमी ख्रुम्‍शो रवा का बाक्‍ब। 23 ब्रा आप्‍बपुकीमी मेको कली ब्रा आप्‍तेक्‍म। मेको कली आप्‍शा, खेदा पशा, काइ मदाक्‍तेम। 24 तन्‍न आ लिब्रा बोल्‍यो बाक्‍ब, आ गुइ बोल्‍यो बाक्‍नीम। सक्ति पाइश्‍शो याकूब आ परमप्रभु, इस्राएल आ गोठला नु सेरथे फुल्‍लुम, मेको कली वारच पाप्‍तु। ब्‍यवस्‍था ३२:१८ 25 इ आफ आ परमप्रभुमी इ कली वारच पाइब। नेल्‍ल क्‍येङा सक्ति पाइश्‍शो परमप्रभुमी इ कली सरीङ रे नु खप रे आसीक गेब। शुश आल थिचा ङा आसीक यो गेवल। ब्‍यवस्‍था २८:३-६; ब्‍यवस्‍था ३३:१३ 26 गेना हना यो बाक्‍ब डांडा ङा आसीक क्‍येङा इ आफ आ गेशो आसीक ठेयब बाक्‍ब। योसेफ आ लोक्‍ब खोदेंशो मदुम्‍थु, एको आसीक आ पिया तारी दुम्‍ल।
बेन्‍यामीन
27 बेन्‍यामीन ब्रुप्‍शा ग्‍याइक्‍ब फर खोदेंशो बाक्‍ब। मिनु सुनी आ सिखार ब्‍वाइब, नाक्‍दो आ रोइश्‍शो योक्‍ब” दे याकूबम आ तौ नेल्‍ल आन कली आसीक गेमी बाक्‍त। न्‍यायाधीस २०:२५; १सामुएल ९:१-२
इस्राएल बेक्‍शो
28 एको इस्राएल आ १२ थर बाक्‍नीम। आन आफोम मेको आन कली आसीक गेशा पशो लोव़ एकोन बाक्‍ब। मेकोमी मेको आन कली का का पा आसीक गेवा बाक्‍त। 29 मिनु मेको आन कली “गो आं किकी पिपी आन बाक्‍तीके लाइनुङ। हित्ती ङा एफ्रोन आ रूमी बाक्‍शो पुक्‍खी, आं किकी पिपी आन कली थिम्‍तीकेमी आं कली वोतीन। उत्‍पत्ती २३:१३-२० 30 मेको पुक्‍खी कनान रागीमी माम्रे आ पूर्ब ङा माक-पेलामी बाक्‍ब। अब्राहाममी मेको थिम्‍तीक हित्ती ङा एफ्रोन रे ग्‍यबा बाक्‍त। 31 अब्राहाम नु आ मीश सारा मेक थिम्‍शो बाक्‍नीस। इसहाक नु आ मीश रेबेका यो मेक थिम्‍शो बाक्‍नीस। मेकेर लेआ यो थिम्‍ता। उत्‍पत्ती २५:९; उत्‍पत्ती ३५:२९ 32 मिनु मेको रू नु पुक्‍खी हित्ती मुर रे ग्‍याप्‍शो बाक्‍त” देंमाक्‍त। 33 याकूबमी आ तौ आन कली मोदें लोव़ पशा नोले, खाटमी आ खोइल दिंशा, बेक्‍माक्‍त। मिनु आ किकी पिपी आन बाक्‍तीक लमाक्‍त।