14
परमप्रभु गे लेत्‍तीन, दे ब्रेश्‍शो
गे इस्राएली, परमप्रभु यावे, इन परमप्रभु गे लेश्‍शा जाक्‍कीन। मारदे हना गे इन मरिम्‍शो पतीके रे खतम दुम्‍तीनी। परमप्रभु आ लोव़ मेको कली देंशा, परमप्रभु यावे गे लेतीन। मिनु गेपुकीमी मेको कली “आंइ पाप नेल्‍ल क्‍याम्‍दीने! आंइ कली शिशी पा ब्रने। गो इन नें ठेयब सेल्‍नीकी। हिब्रू १३:१५ अस्‍सुर ङा मुरपुकीमी आंइ कली प्रोंइने मचाप्‍नीम। गोपुकी लडाइ पथ शारा ङोइश्‍शा मगाक्‍नीकी। मिनु गो आंम सेल्‍शो थोव़क कली ‘इं परमप्रभु’ दे गेनायो मदेंनीकी। मारदे हना रोम रोइक्‍चपुकीमी इन शिशी ताइनीम” दे परमप्रभु कली देंनीन।
मिनु परमप्रभुमी “गो इन नोले शोंइसीशो माफ गेनुङ। गो इन कली शुश शिशी पा दाक्‍नुङ। मारदे हना मुल इन कली तशा मगाइक्‍नुङ। गो इस्राएल कली सीत खोदेंशो दुम्‍नुङ। मेको लिली फू खोदेंशो पा बोइक्‍ब। लेबानोन ङा लाइश्‍शो रवा खोदेंशो पा मेकोमी शाक्‍श थोक्‍ब। मेको आ राशी लाइश्‍शो दुम्‍नीम। मेको आ दारस तेल रवा खोदेंशो दुम्‍ब। मेको आ ब्रोव़शो रिना लेबानोन ङा लाइश्‍शो रवा खोदेंशो दुम्‍ब। मुरपुकी लेंशा मेको आं वांकुमी बाक्‍नीम। मेकोपुकीमी लेंशा अन्‍न ख्रुम्‍नीम। मिनु अङगुर खोदेंशो पा बोइक्‍नीम। मिनु मेको आन नें लेबानोन ङा अङगुर शांबु खोदेंशो पा ठेयब दुम्‍ब। एफ्राइम ङा मुरपुकी, मूर्तिपुकी नु गो आं के मार गेय बाक्‍बा ङा? गो इन कली लोव़ लेत्‍नुङ। मिनु इन कली कोव़नुङ। गो तोव़शी रवा खोदेंशो पा गिग बाक्‍नुङ। इ फल फुल सित्‍चा आं सक्ति रे जाक्‍ब।
सु जोक्‍ब तुइक्‍ब बाक्‍बा, मेकोमी एको लोव़ तुइक्‍तल। सु के रुप्‍ब थुं बाक्‍मे, मेकोमी एको लोव़ रुबल। परमप्रभु यावे आ लां ठीक बाक्‍नीम। मिनु ठीक पाइबपुकी मेको आ लांमी गाक्‍नीम। तन्‍न आ देंशो मटीबपुकी मेको आ लांमी दाइल पाइसीनीम” दे परमप्रभुम देंत।