योएल
ब्रेक्‍ब मुर: योएल आ नें आ अर्थ “परमप्रभु यावे, परमप्रभु बाक्‍ब” देंशो बाक्‍ब। मेको आ आफ पेथुएल आ पर्बम मारेइ मतुंइसीब। योएलम यहूदा राज्‍यमी परमप्रभु आ लोव़ पशो बाक्‍त।
गेना ब्रेक्‍शो: मुर काम अथाल्‍याहम आंम कली पिपीम सेल्‍सेनु, पिप आ तौ योआश चढ़ेब येहो-यादाम परमप्रभु आ खिंम ख्रुइश्‍शा वोइश्‍शो ना, ८०० बि. सी.म खोदेंशो एको किताब ब्रेक्‍शो बाक्‍ब, दे मिम्‍नीम।
मार ब्रेक्‍शो: मालेपुकीमी इस्राएल रागी कली निक्‍शी खेयप रागी नेल्‍ल खतम सेल्‍तेक्‍म। रेउ मयितीके परमप्रभु यावे आ गेशो सजाइ बाक्‍त। मोपतीके योएलम मुर आन कली परमप्रभु यावे गे ले‍तीन। परमप्रभु यावेम आ गे लेश्‍शो मुर आन कली माफ गेब। योएल २:१३ आन साम्‍शो नेल्‍ल लेप्‍ब। योएल २:२५ योएलमी “इस्राएली ला ममाइ, अर्को रागी ङा मुरपुकीमी यो, परमप्रभु यावे आ श्‍येत रे प्रोंइशो तने चाप्‍नीम” देंशो बाक्‍ब।
1
सल्‍हा मालेमी श्‍येत गेशो
परमप्रभु यावेमी पेथुएल आ तौ योएल कली देंशो लोव़ एको बाक्‍ब। मिनु मेको लोव़ मार बाक्‍त देंशा हना “गे खाल्‍पापुकी, एको लोव़ नेनीन। रागीम बाक्‍ब मुर नेल्‍ल इन नोफा दाइश्‍शा नेनीन। मार, इन ब्रोंइतीक नाक्‍ती नु इन किकी पिपी आन ब्रोंइतीक नाक्‍तीम ओदेंशो दुम्‍शो बाक्‍मे? गे एको लोव़ इन तमी तौ आन कली देनीन। मिनु इन तमी तौपुकीमी आन तमी तौ आन कली देंपतीन। मिनु मेकोपुकीमी आन चच युइ आन कली देंमल। घांस ख्रोइश्‍शा ब्‍वाइब मालेपुकीमी मार मार प्रोन्‍मे, मेको लेस्‍वा मालेपुकीमी नेक्‍तेक्‍म। मिनु लेस्‍वा मालेपुकीमी मार मार प्रोन्‍मे, मेको तोङ‍ले मालेपुकीमी नेक्‍तेक्‍म। मिनु तोङले मालेपुकीमी मार मार प्रोन्‍मे, मेको सल्‍हा मालेपुकीमी नेक्‍तेक्‍म। योएल २:२५ मिनु गे दुक्‍शा बाक्‍बपुकी सेंसीशा, ङाक्‍कीन। मिनु अङगुर शांबु तूशा दुक्‍ब नेल्‍ल नक अङगुर शांबु आ पर्बम रोंका पने। मारदे हना मेको इन शोव़ रे रोंइ‍सीशो बाक्‍ब। ठेयब रागी ङा मुरपुकी आं रागीम ओव़तेक्‍म। मेको सक्ति पाइश्‍शो नु हिक्‍ने मचाप्‍चा ङा पा शुश बाक्‍नीम। मेको आ ख्रुइ गुप्‍स आन ख्रुइ खोदेंशो बाक्‍नीम। मिनु मेको आन लाइश्‍शो ख्रुइ, छाउरी गुप्‍स आ ख्रुइ खोदेंशो बाक्‍नीम। योएल २:२ मेकोपुकीमी आं अङगुर रू खतम पोक्‍शा, आं फोव़शी रवा नेल्‍ल तिम्‍शा चेत्‍तेक्‍म। मेकोपुकीमी मेको आन कोक्‍ते नेल्‍ल थुरशा, ताइक्‍ताक्‍म। मेको आन राशी नेल्‍ल बुश दुम्‍‍तेक्‍म।
मिनु कन्‍ने मीश आलमी अरन्‍डी फेक्‍शा, आ ग्‍युंबे पचशो वोंइश आल आ पर्बम दोपा रोंका पाइबा, मोपा रोंका पने। अन्‍न चढ़ेतीके नु तूचा थोव़क चढ़ेतीके परमप्रभु यावे आ खिंमी चढ़ेचा देक्‍शो बाक्‍ब। परमप्रभु यावे आ ङोंइती गेय पाइब चढ़ेबपुकी रोंका पाइनीम। योएल २:१४ 10 मिनु रू नेल्‍ल श्‍येत्‍थ दुम्‍शो बाक्‍नीम। खप रोंका पाइब। मारदे हना अन्‍न नेल्‍ल खतम दुम्‍शो बाक्‍ब। अङगुर आ रस सोव़त। तेल रवा आन फल सोव़तेक्‍म।
11 गे रूम गेय पाइबपुकी सुर्ता पने। अङगुर ख्रुम्‍बपुकी रोंका पने। क्‍योव़ज चेरब आ पर्बम यो रोंका पने। मारदे हना बाली नाली खतम दुम्‍शो बाक्‍नीम। 12 अङगुर बोट सोल सुल बेक्‍तेक्‍म। फोव़शी रवा यो सोव़तेक्‍म। अनार, खजूर, स्‍याउ रवा नु रू ङा रवा नेल्‍ल सोव़तेक्‍म। थमा पा, मुर आन दातेमी मुर आन ग्‍येरतीक थुं यो मेको खोदेंशो पा नुप्‍शो बाक्‍ब।
13 चढ़ेबपुकी, सुर्ता पा अरन्‍डी फेक्‍शा रोंका पने। चढ़ेतीकेमी गेय पाइबपुकी रोंका पने। आं परमप्रभु आ गेय पाइबपुकी, नाक्‍दो यो सुर्ता पा अरन्‍डी फेक्‍शा बाक्‍कीन। मारदे हना इन परमप्रभु आ खिंमी अन्‍न चढ़ेतीके नु तूचा थोव़क चढ़ेतीके देक्‍शो बाक्‍ब।
14 मिनु माइजा बाक्‍चा कली मुर आन कली खुप्‍तीन। परमप्रभु यावे आ खिंम रागीम बाक्‍ब मुर नेल्‍ल बुक्‍शा, खाल्‍पा आन कली ब्रेत्‍तीन। गे खाल्‍पा नु मुर आन कली परमप्रभु यावे, इन परमप्रभु आ खिंम पुक्‍कीन। मिनु परमप्रभु यावे कली ठेयब सेंदा पा ‘वारच पाइक्‍की’ दे पुनीन” देंत। भजन संग्रह १०४:१०,११; योएल २:१५
योएलमी रोंका पशो
15 मिनु योएलमी “परमप्रभु यावे आ जाक्‍चा चिक्‍शो नाक्‍त आ पर्बम आबी आबी, मारदे हना मुल मेको नाक्‍त जाक्‍ब। नेल्‍ल क्‍येङा सक्ति पाइश्‍शो खतम पोक्‍‍तीके जाक्‍ब। योएल २:१; यसैया १३:६ 16 मार, इं जचा थोव़क इं ङोंइती रे मरोइक्‍से ङा? मार, ग्‍येरशा सोम्‍शा बाक्‍तीके आंइ परमप्रभु आ खिं रे मयोल्‍म ङा? ब्‍यवस्‍था १६:३१
17 वांचेर नेल्‍ल खप आगाम सोव़शा रोम्‍शा लीतेक्‍म। अन्‍न वोइक्‍तीक खिं ब्रेश्‍शो बाक्‍नीम। अन्‍न वोइक्‍तीक श्‍येत्‍थ दुम्‍तेक्‍म। मारदे हना अन्‍न मदुम। 18 मिनु बस्‍तु भाव रोंका पाइनीमी। बी ब्‍यफ जोतीक मबाक्‍तीके हिरना हिरन बाक्‍नीम। क्‍यारश भेडा आन हुल यो श्‍येत जशो बाक्‍नीम।
19 परमप्रभु यावे, गो इन कली वाइ ब्रेश्‍शा थोइनुङ। मारदे हना बी ब्‍यफ नु क्‍यारश भेडा आन जोतीके मीम नेक्‍शो बाक्‍ब। मिनु मीम रू ङा रवा नेल्‍ल नेक्‍शो बाक्‍ब। योएल २:३ 20 मिनु ब्‍वाकी ङा जन्‍तुपुकीमी यो इन कली थोशो बाक्‍नीम। मारदे हना खोला सोव़शो बाक्‍नीम। मिनु मीम गोरशो रागी ङा बस्‍तु भाव योव़तीक ङा घांस नेल्‍ल नेक्‍शो बाक्‍ब” देंत। भजन संग्रह १०४:१०-११