16
मोआबीम “वारच पने” देंशो
गेपुकीम सेला सहर रे पा सियोन ङा तमी आ डांडा ङा पिप कली पाठा सोइक्‍तीन। आन ग्‍योव़ रे खेरशो एर ओंथ ब्रशा बेरशो चिक्‍ब खोदेंशो पा मोआब ङा तमीपुकी अरनोन खोला आ नेक्‍था बाक्‍नीम। गे अर्ती गेशा, ठीक निसाफ पने। नाक्‍त बाक्‍त हना यो, इन वांकु नाक्‍दो ङा खोदेंशो सेलीने। ग्रुंइशो मुर आन कली ख्रुइक्‍तीन। प्रोक्‍ब आन पर्बम मशेंदीन। मोआब रे प्रोक्‍शो मुर आन कली गेपुकी नु बाक्‍चा गेने। मेको आन कली साइक्‍ब रे प्रोंइशा, वारच पने। मुर आन कली दिप्‍बपुकी मबाक्‍तेक्‍म हना, खतम दुम्‍तीके नुप्‍त हना, श्‍येत गेबपुकी रागी रे फिक्‍चा पुंइसाक्‍म हना, गेना हना यो दाक्‍ब आ नित्‍तीक वोंइसीब। मेको दाऊद आ ताम्‍बुम बाक्‍ब। मिनु मेको नित्‍तीकेमी थमा सुइक्‍चा पुंइसीब ठीक निसाफ पा हुकुम पाइब का निस्‍सीब। मेकोमी रीब पा कुल मकोव़थु, निसाफ पाइब।
गो मोआब आ ठेयब लेश्‍शा पशो लोव़ नेंतय। मेको थम ठेयब लेश्‍शो बाक्‍ब। मेको आ ठेयब लेत्‍तीके नु बोरशा लोव़ पतीके फश खोदेंशो बाक्‍ब। मोपतीके मोआबी रोंका पामेक्‍ल। मोआब आ पर्बम रोंका पामेक्‍ल। थाम्‍पा रोंका पने। किर-हारेसेथ ङा अङगुर शोब्‍ले आ पर्बम रोंका पने।
हेश्‍‍बोन ङा रू खतम दुम्‍तेक्‍म। सिब्‍मा ङा अङगुर बोट मलीनीम। मेको आ अङगुर शांबुमी रागी रागी ङा हुकुम पाइब आन कली दुक्‍पाइक्‍तु। मेको आ अङगुर बोट याजेर सम्‍म लशा, गोरशो रागी सम्‍म जाक्‍दीत्‍त। मेको आन शाक्‍श ब्रशा, समुन्‍द्र आ आइक्‍ची हांबु सम्‍म जाक्‍दीत्‍तेक्‍म। मोपतीके गो सिब्‍मा ङा अङगुर बोट आ पर्बम याजेर खोदेंब पा ङाक्‍नुङ। गो इस कली आं प्रेक्‍कुम जिप्‍पाइक्‍नुङ। मारदे हना हेश्‍‍बोन नु एलेआले, इस अङगुर नु अन्‍न ओंइची नाक्‍त मजाक्‍ब। यसैया १५:४-९ 10 मिनु ग्रेल्‍शो रू रे ग्‍येरशो सेंदा मनेंसीब। इस अङगुर रूमी ग्‍येरशा कुम्‍सो मपाइनीम। सुइमी अङगुर मख्राक्‍नीम। आन ग्‍येरशा कुम्‍सो पतीके जाम्‍त। येरमीया ४८:३३ 11 मोपतीके मोआब आ पर्बम आं थुं ङाक्‍ब। मिनु कीर-हेरेस आ पर्बम आ थुं खाइक्‍ब। 12 मिनु मोआबी आन देवी देवता बाक्‍शो डांडा ङोइश्‍शा, शुश प्रार्थना पाम्‍तेक्‍म हना यो, मेको शोर गाक्‍शो दुम्‍ब।
13 एको परमप्रभु यावेमी मोआब आ पर्बम ङोंइती देंशो लोव़ बाक्‍ब। 14 मुल चहिं परमप्रभु यावेमी “गाल्‍च ताइबम आ बर्स हिक्‍शो खोदेंशो पा बर्स सांमी मोआब आ दारस जाम्‍शा लाइब। मिनु आ ठेयब हुल शुश मलीनीम। मेको आ लीशो मुर शुश मदुम्‍थु, सक्ति मपाइश्‍शो दुम्‍नीम” देंत। यसैया २१:१६