22
यरूसलेम आ पर्बम लोव़ पशो
1 मिनु परमप्रभु यावेमी कोंइतीक बेंसी आ पर्बम यसैया कली “गे नेल्ल मार दुम्नी ङा मीन, नेल्ल इन खिं तार ङोंइसीनी?
2 गे, ग्रांग्ये माग्ये नु रेयकेम ब्रीशो सहर, इ बेक्शो मुरपुकी तरवारम क्योरशा साइश्शो मनम। लडाइम साइश्शो यो मनम।
3 इ सासन पाइब कालेम प्रोक्तेक्म। लिब्रा मआप्थु ग्याइक्चा पुंइसाक्म। ङोंइती सु सु ङोन प्रोक्तेक्म हना यो, मेको कालेम ग्याइक्चा पुंइसाक्म।
4 मोपतीके गो आं कली मकोव़यीनी। गो हुइ हुइ पा ङाक्नुङ। आं कली लेम्चा थुं मपने। मारदे हना आं दाक्शो मुर खतम दुम्तेक्म” देंत। येरमीया ८:२३
5 मिनु नाक्त काम परमप्रभु, मुर नेल्ल आन परमप्रभु यावेमी कोंइतीक बेंसीम दिम्शा ताइश्शा नु ग्रांग्ये माग्ये पपाइक्ब। गारो प्रेश्शो डांडा सम्म “वारच पने” दे वाइ ब्रेश्शो सेंदा नेंसीब।
6 एलाममी ब्रा कुरतीके कुरतु। मुरपुकी बग्गी ङोइश्शा गाक्चा गोम्तेक्म। कीर सहर ङा मुरपुकीमी तेक्तीके शोल्तेक्म।
7 इ रिम्शो बेंसी बग्गीम ब्रीशो बाक्नीम। शारा ङोइक्ब सहर ङा ठेयब लाप्चो आ ङोंइती ठीक दुम्शो बाक्नीम।
8 परमप्रभुमी यहूदा आ सुम्तीके हुक्तु। मेको नाक्ती गेपुकी पिप आ या वोइक्तीके, ब्वाकी ङा खिं मिम्ताक्नी।
9 मिनु गेपुकीमी दाऊद आ सहर ङा खिं शुश रेक्शो ताइतीनी। मिनु आइदी दोम्ली ङा ब्वाक्कु ताप्तीनी। यसैया ७:३
10 मिनु गे यरूसलेम ङा खिं हिक्शा, प्रेश्शा, सहर ङा गारो बोल्यो सेल्तीनी। येरमीया ३३:४
11 मिनु गे सहर ङा गारो निक्शी आस दातेमी माइत दोम्ली ङा ब्वाक्कु तेम्तीनी। तन्न इन कली मोदेंशो पपाइक्ब कली ममिम्तीनी। ङोंइती रे नेल्ल सेल्ब कली चहिं मान मपनी।
12 मेको नाक्ती परमप्रभु, मुर नेल्ल आन परमप्रभु यावेमी ङाक्चा, रोंका पचा, चां ख्रोइक्चा नु अरन्डी फेक्पाइक्चा कली इन कली ब्रेत्ताक्व। आमोस ८:१०
13 तन्न गेपुकीमी ग्येरशा, ब्यफ नु भेडा क्योरशा, ब्वशा, अङगुर शांबु तूशा “लो, जय ब्वय, तूय, मारदे हना दीसा बेक्नय” देंतीनी। १कोरिन्थी १५:३२
14 मुर नेल्ल आन परमप्रभु यावेमी आं कली “मेको इन मरिम्शो पशो मबेक्नी सम्म लीब” दे परमप्रभु, मुर नेल्ल आन परमप्रभु यावेमी देंत।
एल्याकीम कली योव़शो
15 मिनु परमप्रभु, मुर नेल्ल आन परमप्रभु यावेमी “गे खिं नेल्ल कली कोव़ब शेब्ना आ बाक्तीकेम लावो। यसैया ३६:३
16 मिनु मेको कली ‘गे मार पना पन बाक्नीनी? गे इ के एकेर मार बाक्बा ङा। एकेर इ मुर सु बाक्नीमी। मारदे डांडामी तुरस मुपदी? मारदे सेरथे फुल्लु आगाम मुर बाक्तीके सेल्नी?’ देंत
17 परमप्रभु यावेमी इन कली एक रे मरिम्शो पा ङोन ताइक्ब। इन कली बोल्यो पा ग्याइक्ब।
18 इ कली हिरशा हुरद आप्शो खोदेंशो पा ठेयब रागीमी ताइक्ब। मिनु गे मेक उइ बेक्नेवे। इ दारशो बग्गी यो मेक उइ लीनीम। गे इ होव़प आ खिं कली मुने तोक्ब बाक्नेवे
19 गो इ कली इ गेय रे ग्रुंइशा, आइक्च सेल्नन।
20 मेको नाक्ती गो हिल्कीयाह आ तौ आं गेय पाइब एल्याकीम कली ब्रेत्नुङ।
21 मिनु गो मेको कली इ वा फेक्पाइक्नुङ। इ किप्शुर किप्पाइक्नुङ। मिनु इ अधिकार मेको कली गेनुङ। मिनु मेको यरूसलेम नु यहूदा ङा मुर आन आफ दुम्ब। उत्पत्ती ४५:८
22 गो दाऊद आ खिं ङा सांचो मेको कली गेनुङ। मेकोमी रोक्ब, सुइम मचोक्नीम। मेकोमी चोक्ब सुइम मरोक्नीम। प्रकाश ३:७
23 मिनु गो मेको कली किला खोदेंशो पा सारो खपीम ग्रुक्नुङ। मेको आ किकी पिपी आन खिं ङा मान पाइक्चा पुंइसीब दुम्ब।
24 मिनु आ आफ आ खिं ङा ठेयब मुर नु आल चच युइ नेल्ले मेको आ अधिकारम बाक्नीम। खिं ङा बोस नेल्ल मेको आ अधिकारम बाक्नीम” देंत।
25 मेको नाक्ती मुर नेल्ल आन परमप्रभु यावेमी “मेको सारो खपीम ग्रुक्शो किला हिम्पाइक्ब। मेको कली क्योरशा ताइक्नीम। मिनु आ पतीक अधिकार नेल्ल जाम्ब” दे परमप्रभु यावेमी देंत।