28
सामरीया कली निसाफ
1 आबी, गे एफ्राइम ङा दुक्शो ठेयब लेश्शो मुरपुकी, इन दारस फू खोदेंशो पा बेक्ब। मेकेर ब्रोव़शो जाइब नु दुक्शो मुर ला बाक्नीम। अङगुर शांबुम मेको आन कली नेक्शो बाक्ब।
2 कोव़ङीन, परमप्रभु नु बोल्यो नु सक्ति पाइश्शो का बाक्ब। मेको मुप्स ब्वांइसीशो फश गिवार खोदेंशो बाक्ब। शुश रेउ ब्वांइसीशो फश गिवार खोदेंशो बाक्ब। परमप्रभुमी मेको कली रागी तार तोक्ब। २राजा १७:५-६
3 एफ्राइम ङा दुक्शो मुर आन दारशो माला कली दिम्शा ताइश्शा पाइनीम।
4 मिनु मेको आ पिया ङा दारस, फू खोदेंशो पा बेक्ब। मेकेर ब्रोव़शो जाइब ला बाक्नीम। मेको नेल्ल क्येङा ङोंइती मीशो फोव़शी खोदेंशो बाक्नीम। सुम मेको ताइबा, मेकोम सेक्शा ब्वाइब।
5 मेको नाक्ती मुर नेल्ल आन परमप्रभु यावे आ लीशो मुर आन कली छेङछेङ पा ब्रशो सिरपेच नु पियाम चुइक्तीके दुम्ब।
6 निसाफ पाइब कली ठीक पतीक सोक्त दुम्ब। मिनु लडाइ पाइब आन कली सहर ङा लाप्चो रे खेरतीक सक्ति गेब दुम्ब।
चढ़ेब नु परमप्रभु आ लोव़ पाइब
7 चढ़ेब नु परमप्रभु यावे आ लोव़ पाइबपुकी यो अङगुर शांबुम दुक्नीम। राकसीम दुक्शा, दिङ दाङ गोल्चा चिक्शा गाक्शो बाक्नीम। चढ़ेब नु परमप्रभु यावे आ लोव़ पाइबपुकी राकसीम दुक्शा गाक्नीम। अङगुर शांबुम दुक्तीके आन मिम्तीके ग्रांग्ये माग्ये दुम्त। मेकोपुकी राकसीम दुक्शा, दिङ दाङ गोल्चा चिक्शा गाक्शो बाक्नीम। मेकोपुकीम फश लोव़ ला पाइनीम। मतुइक्थु दूली निसाफ पाइनीम।
8 मेको आन जतीक मेर नेल्ले आन मेशोम ब्रीशो बाक्नीम। नेल्ल ग्रांग्रा दिशो बाक्ब।
9 मेकोपुकीमी सु आन कली जोक्तीक तुइक्तीक लोव़ रुप्पाइक्नीमी? सु कली आन देंशो लोव़ शेंनीमी ङा? मेकोपुकीमी नक दूध प्रोंइशो आल आन कली शेंचा चिक्त्मे?
10 मेकोपुकीम “परमप्रभु आ ब्रेक्शा अरेशो पावो कि पावो, पावो कि पावो, पावो कि पावो। इच्का एकेर इच्का मेकेर” देंनीमी।
11 थमा पा, मेकोमी अर्को रागी ङा मरुप्चा ङा लोव़ पा, आ मुर आन कली शेंब। ब्यवस्था २८:४९; येरमीया ५:१५; १कोरिन्थी १४:२१
12 मिनु परमप्रभुमी मेको आन कली “मेको थुं नाइक्तीक बाक्ब। गे दशो मुर आन कली नाइक्चा गेने। थुं बारपाइक्तीक एकोन बाक्ब” देंत। मो हना यो मेकोपुकीमी मनेंथु मटीमे। यसैया ३०:१५; मत्ती ११:२८-२९
13 मोपतीके परमप्रभु यावे आ लोव़ मेको आन कली यो आन खोदेंशो पा मरुप्चा ङा लोव़ दुम्ब। मिनु “ब्रेक्शो, अरेशो पावो कि पावो, पावो कि पावो, पावो कि पावो। इच्का एकेर, इच्का मेकेर” देंशो बाक्ब। मिनु मेकोपुकी लशा, नोले गे गोल्शा आन गुइ खोइली जिक्नीम। मिनु ब्वारदम रेश्शा, ग्याइक्चा पुंइसीनीम।
14 मोपतीके गे शुक्शी पाइबपुकी, परमप्रभु यावे आ लोव़ नेनीन। गे यरूसलेम ङा मुर आन कली हुकुम पाइनीनी।
15 मिनु गेपुकीमी “गोपुकीमी बेक्पाइक्ब नु कबल पमुशो बाक्नीकी। बेक्शो मुर आन बाक्तीके नु सल्ला पाइतक। ठेयब श्येत जाक्त हना यो, आंइ कली मारेइ मदुम्ब। मारदे हना जोल पतीके नु गारशा ख्रुइश्शो बाक्नीकी। दूली पतीकेमी फाम्सीशो बाक्नीकी” देंतीनी।
16 मोपतीके परमप्रभु, परमप्रभु यावेमी “कोव़ङीन गो सियोन डांडाम जग फुल्लु का वोइक्नुङ। मेको रिम्शो नु बोल्यो सुर ङा फुल्लु बाक्ब। मेको शुश क्येट लाइब थम बोल्यो जग ङा फुल्लु बाक्ब। सु सु मेको कली थमा सुइक्नीमी, मेको आन थुं लुक्च मलाइब। भजन संग्रह ११८:२२; एफिसी २:२०; यसैया ७:९
17 गो ठीक निसाफ कली गारो प्रोव़ची ना क्युक्तीक डोरी खोदेंशो सेल्नुङ। मिनु ठीक पतीके कली घन्टी खोदेंशो सेल्नुङ। मिनु मुप्सीम मेको जोल पा ख्रुइक्तीके खतम सेल्ब। ब्वाक्कुमी फाम्सीतीके योल्ब।
18 मेना इन बेक्पाइक्ब नु पशो कबल नुप्ब। इन बेक्शो मुर आन बाक्तीक नु पशो सल्ला जाम्ब। मिनु मेको हिंचा ङा श्येत जतीक जाक्शा, इन कली सुम्ब।
19 मेको गिश खेयप जाक्त हना यो, इन कली सुम्ब। मारदे हना मेको सुनी कुस कुस जाक्ब। नाक्दो नाक्ती यो जाक्ब। मेको लोव़ रुप्चा चहिं शुश हिंचा ङा बाक्ब।
20 मुर दिंसामानु ‘इप्तीके आइक्च दुम्ब। फेक्तीक वामी सुम्समानु’ आन रां मसुम्ब” देंत।
21 मारदे हना परमप्रभु यावे पेराजीम डांडाम बोक्शो खोदेंशो पा बोक्ब। मेको गिबोन ङा बेंसीम गाइश्शो खोदेंशो पा गाइक्ब। मोपा मेकोम आ गेय पाइब। मेको आ गेय छक लाक्चा ङा बाक्ब। मिनु मरुप्चा ङा बाक्ब। २सामुएल ५:२०; १इतिहास १४:११; १इतिहास १४:१६
22 शुक्शी लोव़ मपने। मो पाइतीनी हना इन कली फ्रेंशो डोरी खांइसीब। मारदे हना परमप्रभु, मुर नेल्ल आन परमप्रभु यावेमी “रागी नेल्ल खतम सेल्नुङ” देंशो नेंता। यसैया १०:२२-२३
23 नेनीन, आं लोव़ नेनीन। नोफा दाइश्शा, होस पा बाक्शा आं लोव़ नेनीन।
24 मार, शोक्चा कली ब्यफ वाक्ब मुरुमी गेना हना यो ब्यफ वाक्बा? मार, गेना हना यो कुटीम दोशा, रू थेल्नीनी?
25 डल्ला प्रोल्चा कली लेडको पशा, सोंप नु मस्ला मशोक्नीमी? चेरब मशोक्नीमी? क्योव़ज रूम क्योव़ज शोक्नीम। मिनु मोव़ल कली भूस फ्राइनीम।
26 मारदे हना आन परमप्रभुमी मेको आन कली रिम्शो पा शेंताक्व।
27 सोंप कली दांइ मपाइनीम। मस्ला कली तूलीमी मतुप्नीम। सोंप कली आइक्च कोक्के नु मस्ला कली सिरकनामी तुप्नीम।
28 शोब्ले चोचा कली चेरब हिल्नीम। तन्न मतुप्नीम। फस सेल्चा कली दांइ मपाइनीम।
29 मेको मोदेंशो नेल्ल मुर नेल्ल आन परमप्रभु यावेमी शेंशो बाक्ब। मेको अर्ती गेतीकेम छक लाक्चा ङा नु तुइक्तीकेम नेल्ल क्येङा ठेयब बाक्ब।