29
अरीएल सहर कली श्येत दुम्शो
1 आबी, अरीएल, अरीएल सहर। दाऊद मेकेर बाक्शो बाक्त। गे मेकेर बर्स बर्स बाक्शा, चाड मानेन मानेन बाक्तीनी। अरीएल चढ़ेतीक बाक्तीके यरूसलेम आ याइनी नें बाक्ब।
2 मो हना यो, गो मेको कली श्येत गेनुङ। मेकेर ङाक्शा, रोंका पाइनीम। यरूसलेम आं कली अरीएल का बाक्ब।
3 गो दाऊदम खोदेंशो पा इ कली पुम्पाइक्नुङ। गारो ङोइक्चा कली लाइश्शो खिं सेल्पाइक्नुङ। गो मोदेंशो गेय शुश पपाइक्नुङ। लूका १९:४३
4 गे उइ खप रे लोव़ पाइक्नेवे। मिनु फुरक रे पा ब्वाक्नेवे। इ लोव़ फुरक रे नेंसीब। इ सेंदा वोल आन सेंदा खोदेंशो पा खप आगा रे ग्रूब। इ लोव़ फुरक आगा रे पा आइक्च सेंदा पा नेंसीब।
5 तन्न इ जोरी सत्रु आन हुल फुरक खोदेंशो पा शुश दुम्नीम। सक्ति पाइश्शोपुकी बेरशो भूस खोदेंशो दुम्नीम। मेको नेल्ल याम कामी दुम्ब।
6 मिनु मुर नेल्ल आन परमप्रभु यावे इ कली ग्रुम्थ जाक्ब। मेको बुंबु, ख्रिनु ठेयब रेयके नु जाक्ब। मेको हिरशो फश गिवार नु ठेयब मी नु जाक्ब।
7 रागी रागी ङा शुश मुरुमी अरीएल नु लडाइ पाइनीम। लडाइ पाइब नेल्लेमी मेको आन बोल्यो दरवार प्रेश्शा, श्येत गेनीम। मेको ङोमु तशो नु नाक्दो कोंइतीक तशो खोदेंशो पा दुम्ब।
8 दोदेंशो पा शोव़लु बेक्शो मुर आन ङोमुम जशो ताइनीमी, मिनु सेंसीमानु शोव़लुम बाक्नीमी। दोदेंशो पा तूतू दाक्ब मुरुमी ङोमुम तूशो ताइनीमी, मिनु सेंसीमानु आन लाक्चा सोव़शो बाक्बा, मोदेंशो पा सियोन डांडा नु लडाइ पाइब रागी रागी ङा मुरपुकी दुम्नीम।
परमप्रभु यावे आ गेय
9 छक लाक्शा कोव़ङीन। मिक्च क्रिप्शा, मिक्च मताइब दुमीन। दुक्शो दुमीन। तन्न अङगुर शांबुम ममाइ। गोल्चा चिक्शा गाक्कीन, तन्न राकसीम ममाइ।
10 मारदे हना परमप्रभु यावेमी इन तार शुश निन्द्रा पपाइक्ब सोक्ती मोइश्शो बाक्ब। मेकोमी गे परमप्रभु यावे आ लोव़ पाइब इन कली मिक्च मताइब सेल्तु। मिनु इन पिया सुम्तु।
11 मेको इन कली कोंइशो लोव़ नेल्ले, इन कली छाप थोक्शो किताब खोदेंशो दुम्त। मेको पढेस जोक्ब कली “पढेवो” दे गेतीनी हना, मेकोमी “गो पढेने मचाप्नुङ, मारदे हना एको छाप थोक्शो किताब बाक्ब” देंब।
12 मेको पढेस मजोक्ब कली गेशा “एको पढेवो” देंतीनी हना, मेकोमी “गो पढेस मजोक्नुङ” देंब।
13 परमप्रभु यावेमी “एको मुरपुकी लोव़ पशा आं नेक्था जाक्नीम। मिनु आन शोव़मी आं कली ठेयब सेल्नीम। तन्न आन थुंम चहिं आं क्येङा ङोन बाक्नीम। मेको आन आं कली मान पतीके मुर आन शेंशो ला बाक्ब। यसैया १:१५; यसैया ५८:२-३; मत्ती १५:८-९
14 मोपतीके गो एको मुर आन दातेमी छक लाक्चा ङा, हिंचा ङा नु मरुप्चा ङा गेय पाइनुङ। मेको आन जोक्ब तुइक्ब मुर आन तुइक्तीके जाम्शा लाइब। निप्स खाप्शो गेय पाइब आन निप्स खाप्तीके ख्रुइक्चा पुंइसीनीम। १कोरिन्थी १:१९; मत्ती ११:२५
15 गे सु सुमी आंमा मिम्शा पशो गेय परमप्रभु यावे आ ङोंइती ख्रुइक्नीनी नु छिङछिङम गेय पशा, इं कली सुम ताइबा ङा? इं कली सुम तुइक्बा ङा?” देंनीनी। भजन संग्रह १०:११
16 गे दूली पाइबपुकी, खप के ग्योंब सेल्ब मुर खप खोदेंशो मिम्सीबा? मिनु सेल्शो थोव़कमी आ कली सेल्ब कली “मेकोम आं कली मसेल्यी” देंबा ङा? सेल्सीशोमी सेल्ब कली “मेको मारेइ मरुप्ब बाक्ब” देंने चाप्बा? यसैया ४५:९
नोले रिम्शो दुम्ब, दे आस पशो
17 मिनु इच्का नोले लेबानोन फल फुल रू दुम्ब। फल फुल रू चहिं ब्वाकी खोदेंशो दुम्ब।
18 मेको नाक्ती नोफा मनेंबपुकी किताब ङा लोव़ नेंनीम। गेना हना यो छिङछिङम बाक्ब, मिक्च मताइबपुकी मिक्च ताइब दुम्नीम। यसैया ३५:५; मत्ती ११:५
19 मिनु ब्रेम्शो मुर परमप्रभु यावे कली मिम्शा ग्येरसीनीम। मिनु क्येट मथीबपुकी इस्राएली आन परमप्रभु यावे कली मिम्शा थाम्पा ग्येरसीनीम।
20 मारदे हना हिंचा ङा मरिम्शो पाइब मलीनीम। शुक्शी पाइबपुकी जाम्शा लाइनीम। मरिम्शो पचा माल्बपुकी साइक्चा पुंइसीनीम।
21 मेकोपुकीमी मुर आन कली निसाफ पतीकेमी ब्रुपाइक्नीम। मिनु ठीक पाइब नु निसाफ पाइब कली ब्वारदम रेप्पाइक्नीम। मारेइ मरिम्शो मपाइब कली मोशा दोस गेपाइक्नीम। आमोस ५:१०
22 मोपतीके अब्राहाम कली प्रोंइब परमप्रभु यावेमी याकूब आ खिं ङा मुर आन कली “मुल रे याकूब आ खिं ङा मुर मुने मदोक्नीम। आन कुल ग्येरसीशो तांइसीनीम।
23 मिनु मेकोमी आन आल आन दातेम, आं पशो गेय, ताइनीम। मिनु आं नें ठेयब सेल्नीम। याकूब आ का ला बाक्शो परमप्रभु यावे कली तशा मान पा हिंनीम। इस्राएली आन परमप्रभु कली तशा मान पा हिंनीम।
24 मिनु काइ मरुप्ब मुरपुकी रुप्ब दुम्नीम। मिनु गन गन पाइबपुकी परमप्रभु आ शेंतीके लोव़ नेंनीम” देंत।