32
नोले ङा राज्य
1 कोव़ङीन, नोले ठीक पाइब पिप काम सासन पाइब। ठेयब मुर नेल्लेमी ठीक निसाफ पाइनीम। यसैया ३३:१७; येरमीया २३:५
2 मिनु मेको मुर नेल्ल फश रे ख्रुंइसीतीके, रेउ यिमेनु फाम्सीतीके, सोव़शो रागीमी ब्वाक्कु यितीके नु थम होश रागीमी ठेयब सेरथे फुल्लु आ वांकु खोदेंशो बाक्नीम।
3 कोव़ब मुर आन मिक्च ब्राब्रा मदुम्नीम। नेंबपुकीमी नोफा दाइश्शा नेंनीम।
4 रिम्शो पा रुप्ने मचाप्बपुकीमी तुइक्तीक शेंनीम। लेम्से पाइबपुकी रिम्शो पा ब्वाक्ने चाप्नीम। यसैया ३५:६
5 मेना मुरुमी मूर्ख आन कली रिम्शो थुं पाइश्शो मुर मदेंनीम। खुइ नु जोल पाइब आन कली हाइश्शो मुर मदेंनीम। हितोपदेस २८:१६
6 मारदे हना मूर्ख मुर मूर्ख लोव़ ला पाइनीम। मेको आन थुंमी मरिम्शो पचा ला मिम्शा बाक्नीम। परमप्रभु यावे कली मटीनीम। मेको आ पर्बम दूली शेंनीम। शोव़लु बेक्ब आन थुं श्येत्थ लीपाइक्नीम। मिनु तूतू दाक्ब आन कली तूचा मगेनीम।
7 मोदेंशो मरिम्शो पाइब आन गेय मरिम्शो बाक्ब। परमप्रभु यावे आ अरेशो मटीबम “दोपा आं दाक्शो पने चाप्नुङा?” दे प्रुङग आन कली जोल पा नु मारेइ मथीबम ठीक लोव़ पाम्तेक्म हना यो, मेको आन कली खतम सेल्नीम।
8 तन्न रिम्शो थुं पाइश्शो मुरपुकीमी रिम्शो गेय ला मिम्नीम। मिनु गेना हना यो रिम्शो गेय पा बाक्नीम।
परमप्रभु आ सोक्त जाक्ब
9 गे ठेयब लेश्शो मीश मुरपुकी बोक्कीन। मिनु आं लोव़ नेनीन। गे काइ महिंथु बाक्ब तमीपुकी इन नोफा दाइश्शा, आं लोव़ नेनीन। यसैया ३:१६-४:१
10 गे काइ महिंबपुकी बर्स का नोले श्येत जशा ख्रिंख्रि पाइनीनी। मारदे हना अङगुर सेक्चा मताइनीनी। फल फुल मसित्नीम।
11 गे ठेयब लेश्शो मीश मुर ख्रिंख्रि पने। गे काइ महिंबपुकी ख्रिंख्रि पा हिनीन। इन वा प्रुइश्शा अरन्डी फेक्सीन।
12 इन रिम्शो रू नु अङगुर बोट आन पर्बम इन कुचु तुप्शा ङाक्कीन।
13 आं मुर आन रूम चू नु चोंक वानीम। ग्येरसीशो मुर आन खिं नु सहर नेल्ल मोदेंशो दुम्ब।
14 मारदे हना दरवार ङा मुर नेल्ल प्रोक्नीम। शुश मुर बाक्शो सहर श्येत्थ दुम्ब। ओफेल माइश्शो ग्येत्थ लुक्च गाक्तीक लां नु मेकेर खाल पाइब मुर आन बाक्तीक गेना हना यो पुक्खी दुम्नीम। मेकेर ब्वाकी ङा गधा ग्येरसीशा बाक्नीम। मिनु क्यारश भेडा आन जोतीक दुम्ब।
15 मिनु नोले परमप्रभु यावेमी आ सोक्ती इं तार मोइक्ब। मेना मुर मबाक्तीके गोरशो रागी ग्रेल्शो रू दुम्ब। मिनु मेको ग्रेल्शो रू ब्वाकी खोदेंशो दुम्ब। यसैया ४४:३; यसैया २९:१७
थुं नाइश्शा बाक्तीक राज्य
16 मेना मुर मबाक्तीके रागीमी ठीक निसाफ पाइनीम। ठीक पाइबपुकी ग्रेल्शो रूमी बाक्नीम।
17 ठीक पतीकेम थुं नाइक्चा गेब। ठीक पतीके आ सित्तीके सिक्सी पा बाक्चा नु गेना हना यो थमा सुइक्चा बाक्ब।
18 आं मुरपुकी थुं नाइश्शा, महिंथु बाक्तीकेम बाक्नीम। लडाइ मदुम्थु, रिम्शो बाक्तीकेमी सिक्सी पा बाक्नीम। येरमीया ३३:१६
19 तन्न ब्वाकी नेल्ल जाम्शा लाइब। सहर श्येत्थ दुम्ब।
20 ब्वाक्कु आ नेक्था वांचेर शोक्बपुकी गे ग्येरसीशो मुर बाक्नीनी। गे गधा नु बी ब्यफ आन कली जोथ मो सोइक्ने चाप्नीनी।