33
सियोन कली खतम पोक्ब रे प्रोंइशो
1 आबी, गे खतम पोक्ब, मुल सम्म गे खतम पोक्चा मपुंइसीशो बाक्नेवे। गे रोइक्ब बाक्नेवे। तन्न सुइमी मारेइ मरोइक्थु, गे खतम पोक्चा पुंइसीनेवे। मिनु इ रोइक्चा नुप्त हना, इ मारेइ मारेइ रोइक्चा पुंइसीनेवे। मत्ती ७:२
2 परमप्रभु यावे, आंइ कली शिशी पाइक्की। गो इन कली रिम्ना रिम्न बाक्नीकी। गे सुनी कुस कुस आंइ सक्ति दुमीन। श्येत जची ना आंइ कली प्रोंइब दुमीन।
3 शुश रेयके नेंशा, जात जात ङा मुर प्रोक्नीम। इन सक्ति तशा, रागी रागी ङा मुर एर ओंथ ब्राइनीम।
4 मेकोपुकीमी सल्हा खोदेंशो पा शुश मारेइ मारेइ रोइक्नीम। दोपा सल्हा प्रेक्शा दोरनीमी, मोपा मुरपुकी प्रेक्शा रोइक्चा कली दोरनीम।
5 परमप्रभु यावे मान ताइब बाक्ब। मेको इर, आ बाक्तीकेमी बाक्ब। मेकोमी सियोन ङा मुर आन कली ठीक निसाफ नु ठीक पतीके पपाइक्ब।
6 मिनु सियोन इ नाक्ती नेल्ल रिम्शो दुम्ब। मेना शुश पाप रे प्रोंइतीके, तुइक्तीके नु जोक्तीक गे नु बाक्ब। सियोन ङा मुर आन शोंप परमप्रभु यावे कली मान पा हिंचा बाक्ब।
7 नेनीन, मेको आन बोल्यो मुरपुकी लांम ग्रीनीमी। गारपइक्तीक लोव़ चाक्ब मुर हुइ हुइ पा ङाक्नीम। यसैया २९:१
8 ठेयब लां श्येत्थ दुम्शो बाक्नीम। मुर मेको लांम मगाक्नीम। गारपाइक्तीक लोव़ क्याम्सीशो बाक्ब। सांकछीपुकी महिक्सीब दुम्शो बाक्नीम। आन कसम जशो जाम्त। आन पचा माल्शो गेय मपाइनीम।
9 रागी रोंका पशा, गोरशो दुम्शो बाक्ब। लेबानोन मुने दोक्शा, बेक्त। शारोन गोरशो रागी खोदेंशो दुम्त। बाशान नु कारमेलम आस सफा तोक्नीस।
10 परमप्रभु यावेमी “मुल गो बोक्नुङ। गो गेय पचा गोइनुङ। गो मान पाइक्चा पुंइसीनुङ।
11 गेपुकीम भूस के कोव़ज कुरशा, पराल थीनीनी। इन सास मी बाक्ब। मेकोमी इन कली दाक्ब।
12 मिनु जात जात ङा मुर बुलु खोदेंशो पा ब्राइनीम। मेकोपुकी क्योरशो चू मीम जेश्शो खोदेंशो पा जेत्चा पुंइसीनीम।
13 गे ङोन रागी ङा मुरपुकी, गो मार पशो बाक्नुङा, मेको नेनीन। गे आं नेक्था बाक्बपुकी आं सक्ति तुइक्तीन।
14 सियोनम बाक्ब पाप पाइबपुकी हिंनीम। परमप्रभु यावे आ अरेशो मटीब ख्रिंख्रि पाइनीम। सु खतम पोक्ब मी नु ब्रोंइशा बाक्ने चाप्बा? आंइ दातेमी सु गेना हना यो ब्रशो मी नु ब्रोंइशा बाक्ने चाप्बा?” देंत। यसैया १०:१७; येरमीया २३:२९
15 सु ठीक पाइबा, रिम्शो थुं ङा लोव़ पाइबा, गेयी कि गेयी, दे क्येट मताक्बा, सुम घूस मजाइबा नु “हुश ख्राक्श पोक्य” देंमानु, मेको आन लोव़ मटीबा नु मरिम्शो पाइब आन पशो काइ तचा मदाक्बा। भजन संग्रह १५:-; भजन संग्रह २४:३-४
16 मेको इर ङा मुर बाक्नीम। मेको आन ख्रुंइसीतीके सेरथे फुल्लु के सेल्शो दरवार बाक्ब। मेकोमी आन जचा थोव़क ताइनीम। मेको आन ब्वाक्कु बुक्तीके शुश दुम्ब।
मान ताइब पिप आ रागी
17 गेपुकीमी पिप कली आ दारसम ग्योम्सीशा ताइनीनी। मिनु मेकोपुकीमी ठेयब रागी कली ताइनीम।
18 मिनु गेपुकी इन ङोंइती ङा हिंतीके मिम्नीनी। हिक्ब मुर ते लमा? क्येट पोक्ब मुर ते लाक्गमे? मिनु मेको लाइश्शो खिं हिक्ब ते बाक्मा?
19 गेपुकीम मेको मटीब मुर आन कली मुल रे मताइनीनी। मरुप्चा ङा लोव़ पाइब मुर आन कली लेंशा मताइनीनी। यसैया २८:११; ब्यवस्था २८:४९-५०
20 गो आंइ देंशो ना ङा चाड मानेतीक सहर सियोन कली कोव़ङीन। गे सिक्सी पा बाक्ब मुर आन सहर यरूसलेम कली ताइनीनी। यरूसलेम गेनायो मयाक्सीब ताम्बु खोदेंशो बाक्ब। मेको आ किला गेनायो मतुल्सीब। आ डोरी गेनायो मप्रोंइसीब।
21 मेकेर आंइ मान तशो, परमप्रभु यावे गो नु बाक्ब। मेकेर ठेयब खोला नु नादी बाक्नीम। मेकेर दाप्लोम शाक्तीक डोंगा मगाक्नीम। मेकेर ठेयब जहाजपुकी यो लने मचाप्नीम।
22 मारदे हना परमप्रभु यावे आंइ कली निसाफ पाइब बाक्ब। परमप्रभु यावे आंइ कली सासन पाइब बाक्ब। परमप्रभु यावे आंइ पिप बाक्ब। मेकोमी आंइ कली श्येत रे प्रोंइब।
23 गे इन जहाज ङा डोरी शुंइसीशो बाक्नीम। मुरपुकीम मेको डोंगा आ दातेम बाक्शो थाम बोल्यो पा राप्पाइश्शा सेल्ने मचबेम। मेकोपुकीम मेको आ वा क्युक्ने मचबेम। मेना रोइश्शो मार मार शुश योक्सीनीम। खोइल मदुक्बपुकीम यो रोइश्शो मार मार रे आन भाग ताक्नीम।
24 सियोनम बाक्ब सुइमी “गो रोइ पशो बाक्नुङ” मदेंनीम। मेकेर बाक्ब मुर आन मरिम्शो पशो क्याम्चा पुंइसीशो बाक्नीम। जकरिया १२:८