35
परमप्रभु आ मुर ग्येरसीशो
1 मुर मबाक्शो नु ब्वाक्कु मबाक्शो रागी ग्येरसीनीम। गोरशो रागी ग्येरसीशा शुश फू बोइक्पाइक्ब। यसैया ३२:१५
2 मिनु मेको थाम्पा बोइश्शा, ग्येरसीशा कुम्सो पना पन बाक्नीम। लेबानोन, आ दारस मेकोम ताइब। कारमेल नु शारोन आन मान ततीक मेको कली गेशो बाक्ब। मेकोपुकीमी परमप्रभु यावे आ मान ततीके नु आंइ परमप्रभु आ छेङछेङ ताइनीम।
3 इन मारेइ पने मचाप्ब गुइ बोल्यो सेलीन। इन ख्रिंख्रि पाइब पोक्च बोल्यो सेलीन। हिब्रू १२:१२
4 हिंब थुं पाइश्शो मुर आन कली “इन थुं फ्रेंदीन। महिनीन” दे मतीन। इन परमप्रभु एक बाक्ब। मेको क्येक्क लेत्चा कली जाक्ब। परमप्रभुमी हिंचा ङा सजाइ गेब। मेको जाक्शा इन कली प्रोंइब।
5 मेना मिक्च मताइबपुकीमी ताइनीम। नोफा मनेंबपुकीमी नेंनीम। यसैया २९:१८
6 खोइल मदुक्ब मुर किश्श खोदेंशो पा प्रेक्नीम। मब्वाक्बपुकीम ग्येरसीशा कुम्सो पाइनीम। मारदे हना मुर मबाक्तीकेम ब्वाक्कु बुक्नीम। गोरशो रागीमी खोला यीनीम।
7 मिनु थम होश बाल्वा दोम्ली दुम्ब। सोव़शो खप रे ब्वाक्कु बुक्ब। मिनु सिवार आन बाक्तीकेमी घांस नु बुदी मीलु वानीम। यसैया ४१:१८
8 मेकेर ठेयब लां का दुम्ब। मेको लां कली “परमप्रभु यावे आ लां बाक्ब” दे नें वोइक्नीम। ग्रांग्रा दिशो मुर मेको लां लचा मताइनीम। परमप्रभु आ मुर ला मेको लां लचा ताइनीम। सु सु मेको लां लाइनीमी, मेकोपुकी मूर्ख बाक्तेक्म हना यो, मजाम्नीम। यसैया ५६:३-८; येरमीया ३१:८
9 मेकेर गुप्स मबाक्नीमी। मुर ब्वाइब जन्तु यो मलाइनीम, मबाक्नीम। तन्न पाप रे प्रोंइशो मुर ला मेको लां गाक्नीम।
10 परमप्रभु यावेमी श्येत रे प्रोंइशो मुर ला लेश्शा जाक्नीम। मिनु सियोनमी कुम्सो पना पन ओव़नीम। मेकोपुकी गेना हना यो ग्येरसीशा बाक्नीम। ग्येरसीना सीन बाक्नीम। आन श्येत जशा, हुकयी पतीके लेश्शा मजाक्ब। यसैया ५१:११; प्रकाश २१:४