44
थमा पा इस्राएली मुर दुम्शो
1 मिनु “याकूब, आं गेय पाइब, मुल नेनो। आं योव़शो इस्राएल, नेनो।
2 इ कली कोव़जीम सेल्शा, वारच पाइब परमप्रभु यावेमी ‘आं गेय पाइब याकूब महिनो। येशुरुन गो इ कली योव़ता। यशुरुन इस्राएल आ नें का बाक्ब।ब्यवस्था ३२:१५
3 मारदे हना गो सोव़शो रागी तारी ब्वाक्कु लुक्नुङ। सोव़शो खपीम खोला शाइक्पाइक्नुङ। गो इ चच युइ आन तारी आं सोक्त मोइक्नुङ। इ आल आन कली आसीक गेनुङ’। यसैया ३२:१५; योएल ३:१
4 मेकोपुकी घांस खोदेंशो पा शुश बारनीम। ब्वाक्कु आ नेक्था वाशो रवा खोदेंशो दुम्नीम।
5 मिनु कामी ‘गो परमप्रभु यावे आ मुर नङ’ देंब। अर्कोमी ‘आ नें याकूब बाक्ब’ देंब। मिनु अर्कोमी ‘गो परमप्रभु यावे आ मुर नङ’ दे आ गुइम ब्रेक्शा ‘आं नें इस्राएल बाक्ब’ देंब” देंत।
6 मिनु परमप्रभु यावे, इस्राएली आन पिप नु मेको आन कली पाप रे प्रोंइब, मुर नेल्ल आन परमप्रभु यावेमी “गो नेल्ल क्येङा ङोंइती नु नेल्ल क्येङा नोले ङा नङ। गो आं ङा लाक्शा, अरु परमप्रभु मबाक्नीम। यसैया ४१:४; यसैया ४३:११; प्रकाश १:१७
7 सु आं खोदेंशो बाक्बा? मेकोमी ‘गो परमप्रभु खोदेंशो नङ’ दे उरदी पवल। मेकोमी आं ङोंइती देंल। सुम साइ ङोंइती नोले दुम्तीक लोव़ पवा? मुल मार दुम्बा? मेकोमी देंल। यसैया ४१:२२; ब्यवस्था १८:२२
8 गे ख्रिंख्रि पा महिनीन। गो साइ रे इन कली मदेंङा ङा? गेपुकी आं सांकछी बाक्नीनी। गो आं ङा लाक्शा अरु परमप्रभु बाक्नीमी? आं क्येङा लाक्शा अरु सेरथे फुल्लु मबाक्ब। गो मेको मतुइक्नुङ” देंत। १सामुएल २:२
मूर्ति शोर गाक्शो बाक्नीम
9 मिनु “मूर्ति सेल्ब नेल्ल फश खोदेंशो बाक्नीम। मेको आन सेल्चा दाक्शो मूर्ति शोर गाक्शो बाक्नीम। मेको आन पर्बम शेंबपुकी मिक्च मताइब खोदेंशो दुम्शा, मारेइ मतुइक्नीम। मोपतीके मेको मुने दोक्नीम। यसैया ४५:१६; भजन संग्रह ११५:४-८; येरमीया १०:३-१६
10 सुम यपाइश्शा मुशा रिम्शो गेय पने मचाप्ब देवता आ मूर्ति सेल्बा?
11 मेको आ नोले खोइक्ब नेल्ल मुने दोक्नीम। मेको मूर्ति सेल्चा जोक्ब मुर ला बाक्नीम। मेकोपुकी बुक्शा, राम्मल। ग्रीचोक पा हिंमल। मिनु गेना हना यो मुने दोक्मल। यसैया ४२:१७
12 तुप्तीलमी मूर्ति चेम्ब। मेकोमी मीम गेय पाइब। बोल्यो गुइमी घनमी तुप्शा सेल्ब। मेको शोव़लु बेक्शा, आ बोल साम्ब। ब्वाक्कु मतूथु, गेय पने मचाप्ब। यसैया ४०:१८-२०
13 शी मुइबमी शी कली श्येलेम थाप्शा, ब्रेक्स पा बस्लाम क्योक्शा, लेंशा थाप्शा, कोव़शा ब्रेक्स पाइब। मिनु मुर खोदेंशो पा सेल्ब। दारशो मुर खोदेंशो पा सेल्ब। मिनु नोले मन्दीरम निप्पाइक्ब।
14 मेकोमी लेबानोन ङा लाइश्शो रवा तिम्ब। ब्वाकी ङा बोल्यो शी के रवा का योव़शा ब्वाकी ङा अरु रवा नु कोल्पाइक्ब। लेबानोन ङा लाइश्शो रवा का ख्रुम्ब। मेको तारी रेउ यिशा, मेको ठेयब दुम्ब। मिनु मेकोमी सला रवा का ख्रुम्ब। रेउम मेको कली कोल्पाइक्ब।
15 मेको रवा आ शी चोचा कली दुम्ब। मेको शी रे मी मुइश्शा थेरब। मेको शी चोशा, शोब्ले चोइब। मेको शी रेन मूर्ति यो सेल्शा, आ ङोंइती सेउ पा बाप्ब।
16 मेकोमी आधा शी चोशा, मेको तार श्ये चोइब। मेको ब्वशा रूशा, मी थेरब। मिनु मेकोमी ‘गो होती, मी थेरचा ताता’ देंत।
17 मिनु आ लीशो शी रे मूर्ति का सेल्ब। मिनु मेको आ ङोंइती बाप्शा पूजा पाइब। मिनु मेको कली ‘आं कली श्येत रे प्रोंइयीनी। मारदे हना गे आं परमप्रभु बाक्नीनी’ दे पुंइब” देंत।
18 मेको मुरपुकीमी मारेइ मतुइक्थु, मरुप्नीम। मारदे हना मेको मिक्च मताइनीमी। आन थुं मरोक्सीशो बाक्ब। मेकोपुकी मारेइ मरुप्ब बाक्नीम।
19 सुइमी मारेइ ममिम्ब कामी “गो मेको शी आधा मीम चोता। मेको मी तारी शोब्ले चोशा, श्ये वाल्शा ब्वाता। मुल गो मेको आ लीशो ठुटा रे ग्रांग्रा दिशो मूर्ति सेल्चा दुम्बा ङा? गो मेको आ ङोंइती बाप्चा दुम्बा ङा?” देंब सुइ मबाक्ब।
20 सु सुमी पुलु कली सेउ पाइनीमी, मेको आन दूली थुंमी दूली मिम्पाइश्शो बाक्नीम। मेकोमी आंम कली प्रोंइने मचाप्ब। मिनु “आंइ सेल्शो मूर्ति जोल बाक्ब” मदेंनीम।
इस्राएली आन कली प्रोंइशो
21 याकूब गे एको लोव़ मिम्तो। इस्राएल मिम्तो। मारदे हना गे आं गेय पाइब बाक्नेवे। गो इ कली सेल्तन, गे आं गेय पाइब बाक्नेवे। इस्राएल इ कली मप्रेंनन। यसैया ४१:८
22 गो इ पाप गोस्स खोदेंशो पा जाम्पाइक्ता। इ हेंथे पशो यो क्याम्ताक्ङ। गे आं गे लेतो। मारदे हना गो इ कली पाप रे प्रोंइतन। यसैया ४३:२५
23 गे सरीङ कुम्सो पावो। रागी नेल्ल रेयके पा, शुश कुम्सो पने। गे डांडा, ब्वाकी नु रवा नेल्लेमी कुम्सो पने। मारदे हना परमप्रभु यावेमी याकूब कली श्येत रे प्रोंइतु। इस्राएल रागीमी आं नें ठेयब सेल्शो बाक्ब। यसैया ४९:१३; यसैया ५५:१२; भजन संग्रह ९६:११-१३
पिप कोरेस कली गोठला वोइश्शो
24 मिनु परमप्रभु यावे, इ कली श्येत रे प्रोंइब, इ कली कोव़जीम सेल्बमी “गो मारेइ मारेइ सेल्ब परमप्रभु यावे नङ। गो आं कामी सरीङ प्राक्ता। रागी वोइक्ता। यसैया ४५:१२
25 गो जोल पाइब आन नोले दुम्ब लोव़ शोर गाक्शो सेल्नुङ। लिंक्यु कोव़ब आन निप्स क्यातामी। जोक्ब तुइक्ब आन कली दिप्शा, मेको आन जोक्तीके तुइक्तीके नेल्ल मूर्ख सेल्ता। यसैया २९:१४
26 गो आं गेय पाइब आ लोव़ थमा बाक्ब। मिनु आं सोइश्शो लोव़ कुरबम आं देंशो पाइब। गो यरूसलेम आ पर्बम ‘मेकेर शुश मुर दुम्नीम’ देंनुङ। मिनु यहूदा ङा सहर लेंशा सेल्चा पुंइसीनीम। मेको आन प्रेश्शो खिं नक सेल्नुङ।
27 गो शुश लुक्च लशो ब्वाक्कु सोव़पाइक्नुङ। गो इ खोला आन कली सोव़पाइक्नुङ। यहोसु ४:२३
28 कोरेस आं गोठला बाक्ब। मेकोमी आं मिम्शो गेय पाइब। मेकोमी ‘यरूसलेम लेंशा सेल्चा माल्ब’ देंब। आं खिं आ पर्बम ‘नक जग सेल्नुङ’ ” देंत। २इतिहास ३६:२३; एज्रा १:१-४