43
परमप्रभुमी पाप रे प्रोंइशो
याकूब, इ कली नु इस्राएल कली सेल्‍ब परमप्रभु यावेमी “महिनीन। इन कली पाप रे प्रोंइता। गो इन नें थिशा ब्रेत्‍ती। गे आं मुर बाक्‍नीनी। गे ब्‍वाक्‍कु शोक्‍शा, गाक्‍चा माल्‍ते हना यो, गो गे नु बाक्‍नुङ। खोला शोक्‍साक्‍वे हना यो, मेकोम इ कली मयोल्‍ब। मीम गाक्‍शा लवेनु, मेकोम इ कली मजेप्‍ब। मेको मीम इ कली मदाक्‍ब। प्रस्‍थान १४:२१; भजन संग्रह ६६:१२; दानीएल ३:२५-२७ मारदे हना गो परमप्रभु यावे, इ परमप्रभु नङ। गो इस्राएली आन का ला बाक्‍शो परमप्रभु नङ। गो इ कली पाप रे प्रोंइब नङ। गो इजीप्‍त रागी इ पा ङा गेता। मिनु एथीयोपीया नु सेबा रागी इ कली प्रोंइचा कली गेता। यसैया ४१:१४ मारदे हना गे आं योव़शो मुर बाक्‍नीनी। गे मान ताइब दुम्‍नीनी। गो इन कली दाक्‍नुङ। मोपतीके गो इन पा ङा अरु मुर आन कली गेनुङ। इन बेक्‍चा आ पा ङा रागी रागी ङा मुर आन कली गेतामी। महिनीन, गो गेपुकी नु बाक्‍नुङ। गो इन आल आन कली नां दाप्‍तीक पूर्ब रे चाक्‍नुङ। मिनु नां पेरतीके पच्‍छिम रे खुप्‍शा तेल्‍नुङ। यसैया ११:११-१६; येरमीया ३०:१० गो उत्तर कली ‘प्रोंइशा सोइक्‍तीमी’ माइक्‍नुङ। दक्‍खिन कली ‘मतेक्‍मी’ आं तौ आन कली ङोन रागी रे चाक्‍कीन। मिनु आं तमी आन कली रागी आ सुर रे चाक्‍कीन। आं नेंम ब्रेत्‍चा पुंइसीशो मुर नेल्‍ल चाक्‍कीन। गो मेको आन कली आं कली ठेयब सेल्‍चा कली वोइक्‍तामी। मेको आन कली सेल्‍ब गो नङ। येरमीया १४:९
मेको मिक्‍च बाक्‍शा यो मताइब, नोफा बाक्‍शा यो मनेंब आन कली ग्रुंइदीन। रागी रागी ङा मुर नेल्‍ल खुम्‍समल। जात जात ङा मुर नेल्‍ल बुक्‍‍मल। मेको आन दातेमी सुमी एको लोव़ पवा? मुल मार दुम्‍मे? सुम ङोंइती मेको नोले दुम्‍ब लोव़ पवा? आ सांकछी ब्रेश्‍शा, चाक्गल। मिनु मुरुमी मेको नेंशा ‘थमा बाक्‍ब’ देंमल” देंत। यसैया ४१:२२,२६ 10 परमप्रभु यावेमी “गेपुकी आं सांकछी बाक्‍नीनी। मिनु गे आं योव़शो गेय पाइब बाक्‍नीनी। गे आं कली तुइश्‍शा थमा सुइक्‍ब दुम्‍शो बाक्‍नीनी। मिनु गो परमप्रभु नङ, दे रुप्‍नीनी। आं ङोंइती सुइ परमप्रभु मबा, आं नोले यो सुइ परमप्रभु मदुम्‍नीम। यसैया ४४:३ 11 गो परमप्रभु यावे नङ। आं क्‍येङा लाक्‍शा पाप रे प्रोंइब मबाक्‍ब। यसैया ४५:२१; ब्‍यवस्‍था ३२:३९ 12 इन दातेमी देवी देवता मबाक्‍थु, गो इन कली शेंशा, पाप रे प्रोंइशा, लोव़ नेंपाइक्‍ता। गे आं सांकछी बाक्‍नीनी। 13 गो परमप्रभु नङ। नोले सम्‍म गो मेको नङ। सुइमी आं गुइ रे प्रोंइने मचाप्‍‍ब। गो गेय पङानु, सुइमी आं कली तेक्‍ने मचाप्‍ब” देंत।
14 मिनु परमप्रभु यावे, इन कली पाप रे प्रोंइब, इस्राएली आन का ला बाक्‍शो परमप्रभुमी “इन पा ङा गो बेबीलोन सहर कली लडाइ पाइब सोइक्नुङ। मेको आन ठेयब लाप्‍चो ङा आग्‍लो जिक्‍नुङ। गो कल्‍दी आन ग्रीतीक कली रोंका पपाइक्‍नुङ। 15 गो, इन परमप्रभु यावे, इन का ला बाक्‍शो परमप्रभु नङ। गो इस्राएल कली सेल्‍ब, इन पिप नङ” देंत। 16 मिनु परमप्रभु यावेमी “सुमी समुन्‍द्रमी लां का सेल्‍बा? सुमी ठेयब ब्‍वाक्‍कुमी गाक्‍तीक लां सेल्‍बा ङा? प्रस्‍थान १४:२२; यहोसु ३:१६ 17 सुमी बग्‍गी नु शारा, लडाइ पाइब नु बोल्‍यो मुर आन कली मेको लांम सोइक्‍ता? मेकोपुकी गोल्‍शा, बोक्‍ने मचाप्‍नीम। मेकोपुकी सल्‍दो खोदेंशो पा ग्‍याइश्‍शा काप्‍चा पुंइसीनीम। प्रस्‍थान १४:२३-२८ 18 ङोंइती ङा दुम्‍शो ममिम्‍तीन। साइ ङोंइती मार दुम्‍मे, मेको ममिम्‍तीन। 19 गो नक गेय का पचा चिक्‍शो बाक्‍नुङ। मुल मेको दुम्‍चशो बाक्‍ब। गे मेको मतुइक्‍नीनी? गो मुर मबाक्‍तीकेम लां का सेल्‍‍नुङ। यसैया ४१:१८ 20 मिनु ब्‍वाकी ङा जन्‍तु, सिवार नु ठेयब चिक्‍बपुकीमी आं कली मान पाइ‍नीम। मारदे हना गो मुर मबाक्‍तीकेमी रेउ यिपाइक्नुङ। गोरशो रागीमी खोला शाइक्‍पाइक्‍नुङ। आं योव़शो मुर आन कली तूचा गेचा, दे गो गोरशो रागीमी खोला शाइक्‍पाइक्‍नुङ। 21 आं कली ठेयब सेल्‍चा कली मेको मुर आन कली सेल्‍तामी। १पत्रुस २:९
22 तन्‍न याकूब, गे आं कली ठेयब मसेली। इस्राएल, गे आं नोले खोइक्‍चा आ पर्बम मारेइ ममिम्‍ती। 23 गे इ भेडा आं कली चोशा मचढ़ेयी। इ चढ़ेशोमी आं कली मान मपवी। गो इ कली जचा थोव़क चढ़ेचा माल्‍नेवे, दे श्‍येत मगेङ। धूप चोचा माल्‍नेवे, दे मदेंङ। यसैया १:११-१५ 24 गे आं कली ब्रोव़शो रिना पाइब थोव़क ग्‍याप्‍शा मचाक्‍गी। इ चढ़ेशो आन बोंसो मगेयी। तन्‍न इ पाप पतीकेमी गे आं कली श्‍येत गेप्‍तीवी। इ मरिम्‍शो पतीकेमी आं कली श्‍येत जपाइक्‍ती। २कोरिन्‍थी ५:२१
25 गो नङ, इ हेंथे पशो क्‍याम्‍नुङ। गो मेको आं पर्बम पाइनुङ। गो इ पाप लेंशा ममिम्‍नुङ। यसैया ४४:२२; येरमीया ३१:३४ 26 आं कली दोस गेयी। निसाफ पथ लय। दोपा गे आं ङोंइती ठीक बाक्‍नेवे, मेको लोव़ पावो। 27 इ ङोंइती ङा किकीम पाप पाप्‍‍तु। गे नु गारशा लोव़ पाइबम आं कली मरिम्‍शो पाम्‍तेक्‍म। यसैया ४१:८; उत्‍पत्ती ३५:११-१२ 28 मोपतीके गो आं खिंम चढ़ेब आन कली ‘गेय पचा मदुम्‍ब’ सेल्‍तामी। गो याकूब कली खतम सेल्‍ता। मिनु इस्राएल शुक्‍शी पाइक्‍चा पुंइसीब सेल्‍ता” दे परमप्रभुमी देंत।