5
अङगुर रू ङा कुम्सो
1 गो आं दाक्शो कली कुम्सो का पाइनुङ। आ अङगुर रू आ पर्बम कुम्सो का पाइनुङ। आ दाक्शो के अङगुर रू का बाक्ब। आ अङगुर रू शुश ग्रेल्ब डांडाम बाक्ब। यसैया ३:१४; येरमीया २:२१; मर्कूस १२:१-९
2 मिनु मेकोमी रू दोशा, फुल्लु गुप्शा ताइक्ताक्व। मिनु नेल्ल क्येङा रिम्शो अङगुर बोट ख्रुम्तु। मेकोमी रू आ दातेमी खाल पतीक खिं का सेल्तु। मिनु मेकेर कोल का यो सेल्तु। मिनु अङगुर सिप्ब दे आस पाप्तु। तन्न ब्वाकी ङा अङगुर कका सित्तेक्म।
3 यरूसलेमम बाक्ब नु यहूदा ङा मुरपुकी, गो नु आं अङगुर रू आंस दातेमी निसाफ पने।
4 आं अङगुर रू कली गो नेल्ल पाता। गो मार मपङा ङा? गो अङगुर सिप्ब, दे आस पा बाक्ती। तन्न मारदे ब्वाकी ङा अङगुर कका सिम्मे?
5 मिनु मुल गो आं अङगुर रू कली मार पाइनुङा, इन कली देंनुङ। आ थरपु नेल्ल ग्रुंइनुङ। मिनु मार मार ओव़नीम। आ गारो नेल्ल प्रेश्शा ताइक्नुङ। मिनु दिम्शा ताइश्शा पाइनीम।
6 गो मेको कली खतम सेल्नुङ। मेको कली ममुंइनुङ, मरोक्नुङ। मिनु चू नु चोंक वाशा, सुम्नीम। गो गोस्स कली “रेउ मयिपतो” दे माइक्नुङ।
7 मारदे हना मुर नेल्ल आन परमप्रभु यावे आ दाक्शो अङगुर रू इस्राएल आ खिं ङा मुर नु यहूदा ङा मुरपुकी बाक्नीम। मिनु मेकोम ठीक निसाफ पतीके रिम्ताक्व। तन्न दूली निसाफ पाम्तेक्म। ठीक पतीके रिम्ताक्व, तन्न मरिम्शो पतीके ला दुम्त।
मुर आन मरिम्शो पशो
8 आबी, गे शुश खिं नु रू ग्याप्ब। नोले सुइ मुर इ नेक्था मबाक्नीम। मारदे हना रू नु खिं नेल्ल इ के बाक्नीम। ब्यवस्था ५:२१
9 मुर नेल्ल आन परमप्रभु यावेमी “थमा पा इन खिं नेल्ल ब्रेत्नीम। मेको ब्रेश्शो खिं दारशो नु ठेयब बाक्तेक्म हना यो, मुर मबाक्नीम।
10 मिनु ५ बिगा अङगुर रूमी बाथ का अङगुर रस ग्रूब। मिनु होमेर का वांचेरम एफाह का अन्न ग्रूब” देंत। बाथ का २२ लिटर बाक्ब। होमेर का २२० लिटर बाक्ब। एफाह का २२ लिटर पुक्तीक का बाक्ब।
11 आबी, गे राकसी तूचा कली सुनी कना बोक्बपुकी, नाक्दो सम्म शांबु तूना तून दुक्शा बाक्नीनी।
12 बीना, तार पाइश्शो ठेयब ताप्तीके, खैजडी नु बांसुरी नेंशा, शांबु दुक्नीनी। तन्न परमप्रभु यावे आ पशो प्रेंशा ममिम्नीनी। आ गुइ ङा गेय मताइनीनी। आमोस ६:५-६; भजन संग्रह ४४:२
13 मोपतीके आं मुर मारेइ मतुइक्थु आन रागी रे ग्याइश्शा लाइक्चा पुंइसीनीम। मेको आन ठेयब मुरपुकी शोव़लुम बेक्नीम। आन हुल शुश ब्वाक्कु तूतू दाक्नीम।
14 बेक्शो मुर आन बाक्तीकेम मेको आन कली दाक्चा कली आ शोव़ पाक्शो बाक्ब। मिनु यरूसलेम ङा ठेयब मुर नेल्ल नु मेकेर रेयके पा बाक्ब नेल्ल नरक आ शोव़म ओव़नीम।
15 मुरपुकी बाप्शा, ब्रेम्शो दुम्नीम। ठेयब लेश्शो मुर आइक्च सेल्चा पुंइसीनीम।
16 तन्न मुर नेल्ल आन परमप्रभु यावे ठीक निसाफ पतीकेम ठेयब बाक्ब। मिनु आ का ला बाक्शो परमप्रभुम आ ठीक पतीके कोंइब। यसैया २:११,१७
17 मिनु पाठापुकी आंम रागीम खोदेंशो पा जोइनीम। अर्को रागी ङा मुरपुकीमी शोंप नु लीशो मारेइ मारेइ जाइनीम।
18 आबी, गे मरिम्शो पतीके कली जोल के डोरीम नु पाप कली ठेयब डोरीम पाइश्शा, इन नोले कीनीनी।
19 गेपुकीमी “मेकोम आ गेय रीब पा पवल। मिनु गो ताइनय। आंइ तचा ङा पा इस्राएली आन का ला बाक्शो परमप्रभु आ पचशो दुम्ल” देंनीनी। येरमीया १७:१५; २पत्रुस ३:४
20 आबी, मरिम्शो कली रिम्शो नु रिम्शो कली मरिम्शो देंबपुकी, छिङछिङ कली छेङछेङ नु छेङछेङ कली छिङछिङ देंबपुकी नु कशो कली जिज नु जिज कली कशो देंबपुकी श्येत जाइब बाक्नीनी।
21 आबी “गो जोक्ब तुइक्ब नु निप्स पाइश्शो नङ” देंबपुकी श्येत जाइनीनी। हितोपदेस ३:७ रोमी १२:१६
22 गेपुकी शांबु तूचा कली बोल्यो दुम्खु पाइनीनी। राकसी ब्वाइक्स जोक्ब बाक्नीनी।
23 गेपुकीम घूस जशा, ठीक मपाइब कली “ठीक पाइब बाक्ब” नु ठीक पाइब कली “ठीक मपाइब बाक्ब” देंनीनी। प्रस्थान २३:८
24 मोपतीके दोपा मीम ठुटा नु सोव़शो घांस नेक्बा, मोपा मेको आन शाक्श राक्ब। मिनु आन फू फुरक खोदेंशो पा बेरशा लाइब। मारदे हना मेकोपुकीमी मुर नेल्ल आन परमप्रभु यावे आ लोव़ मटीम। मिनु इस्राएली आन का ला बाक्शो परमप्रभु आ लोव़ आ पर्बम शुक्शी पाम्तेक्म।
25 मोपतीके परमप्रभु यावे आ मुर आन पर्बम गाइक्ताक्व। मिनु आ गुइ क्युक्शा, मेको आन कली तुप्तु। मिनु डांडापुकी ख्रिनु कुशा हिम्साक्म। शुश मुर आन बेक्शो रां लांमी ताइश्शो खोदेंशो दुम्तेक्म। मोपा आ गाइक्चा मबेक्थु, मुल सम्म आ गुइ क्युक्स ङा क्युक्स बाक्ब। यसैया ९:१; यसैया १६:२०; यसैया १०:४
26 मेकोमी छेदर क्युक्शा ङोन रागी ङा मुर आन कली ब्रेप्ब। मिनु रागी आ सुर ङा मुर आन कली लाप पा ब्रेप्ब। मिनु मेकोपुकी रीब पा जाक्नीम।
27 मिनु मेको आन दातेमी सुइ मदाइनीम। दाइल मपांइसीनीम। मगोल्नीम। मिनु मइप्नीम। मेको आन किप्शुर मब्रुइक्ब, आन जुत्ता ङा डोरी यो मब्रोइक्नीम।
28 मेको आन ब्रा हेश्शो बाक्नीम। आन लिब्रा आप्चा कली खुक्शो बाक्नीम। आन शारा मी आ झिल्का खोदेंशो बाक्नीम। आन बग्गी आन गुगील फश गिवार खोदेंशो बाक्नीम।
29 मेको आन रेयके गुप्स आन ग्रीशो खोदेंशो बाक्ब। मेको गुप्स आ चाइक्ब खोदेंशो पा ङरर ङरर पाइनीम। मेको आन सिखार कली सुइम प्रोंइने मचाप्नीम।
30 मेको नाक्ती समुन्द्र ङा ब्वाक्कु ग्रीशो खोदेंशो पा, इस्राएल ङा मुर आन तारी रेयके पाइनीम। सुइम मेकेर कोव़तेक्म हना, छिङछिङ नु श्येत ला ताइनीम। गोस्सुमी छेङछेङ कली सुम्ब।