57
परमप्रभु कली मटीबपुकी
1 ठीक पाइब बेक्नीम। सुइमी मेको आन पर्बम सुर्ता मपाइनीम। परमप्रभु यावे कली मप्रोंइथु, दाक्बपुकी लाइक्चा पुंइसीनीम। मारदे मो पाइनीमी, मेको सुइमी मरुप्नीम। ठीक पाइब हिंचा ङा श्येत दुम्चा क्येङा ङोंइती लाइक्चा पुंइसीनीम। मीका ७:२
2 मेकोपुकी थुं नाइश्शा बाक्तीकेम लाइनीम। रिम्शो थुं पाइश्शो मुर आंम आन बाक्तीकेम नाइश्शा बाक्नीम। २राजा २२:२०; दानीएल १२:१३
मूर्ति पूजा पाइबपुकी
3 “तन्न गेपुकी एक जाक्कीन। गे मन्तर तन्तर पाइब आ तमी तौ नु हेंथे गाक्ब वोंइश मुर नु तेल्लेम आ आलपुकी एक जाक्कीन। होसे २:४
4 गे सुका आ पर्बम शुक्शी लोव़ पनी। सुका आ पर्बम इन शोव़ रोक्नी? मारदे इन लें ग्रुंइनीनी? मार, गे हेंथे पाइब आन तमी तौ मननी ङा? गे जोल पा थिशो आल बाक्नीनी। २राजा १६:२-४; येरमीया २:२०,२३,२४
5 गे ठेयब रवा आन पुंमी तेल्लेम खोदेंशो पा, मूर्ति पूजा पाइनीनी। गे गिगी रवा नेल्ल आन पुंमी मोदेंशो पाइनीनी। गे इन आल आन कली खोल्सा नु सेरथे फुल्लुमी चढ़ेनीनी।
6 बेंसी ङा खोला ङा रिम्शो फुल्लु इन कली वारच पाइब बाक्नीम। मेको आन कली तूचा थोव़क चढ़ेतीनी। मिनु अन्न यो चढ़ेतीनी। मार, गो मेको कोव़शा इन पर्बम सिक्सी पा बाक्नुङा ङा?
7 गे लाइश्शो नु ठेयब डांडामी इन ब्राख्ये सेल्तीनी। गे मेकेर चढ़ेथ लाइतीनी।
8 मिनु इन लाप्चो ङा शीम नु लाप्चो आ नोलेमी इन देवी देवता आन चिन्ड वोइक्तीनी। गे आं कली प्रोंइशा, इन ब्राख्ये हुक्तीनी। गे मोदेंशो पशा, इन ब्राख्ये ठेयब सेल्तीनी। गे इन पर्बम मेको नु कबल पाइतीनी। गे मेकोपुकी नु बाक्चा दाक्ताक्नी। मिनु मेको आन शिश्रा रां कोव़तीनी।
9 गेपुकी तेल कुरशा मोलेक आ बाक्तीक लाइतीनी। ब्रोव़शो रिना पाइब तेल शुश सेल्तीनी। गेपुकीमी इन लोव़ कुरब आन कली ङोन सम्म सोइक्ताक्नी। बेक्शो मुर आन बाक्तीके सम्म सोइक्ताक्नी।
10 गेपुकी इन लाइश्शो लां गाक्तीके दाइतीनी। मो हना यो मेको शोर गाक्शो दुम्त मदेंनी। गेपुकी नक सक्ति ताइतीनी। मोपतीके मेको आन नोले खोइक्चा मप्रोंइनी। येरमीया २:२५
11 गे सु क्येङा शुश हिंशा, जोल पनी? मिनु आं कली मफ्रुक्थु ममिम्तीनी। गो सिक्सी पा बाक्शा, आं मिक्च क्रिप्ताक्ङ। मिनु गे आं कली तशा महिंनी? भजन संग्रह ५०:२१
12 गो इन ठीक पशो नु इन गेय तुइक्पाइक्नन्नी। तन्न मेको इन कली मारेइ रिम्शो मदुम्ब।
13 गेपुकी श्येत जशा, थोनीनु, इन खुप्शो मूर्तिपुकीम इन कली प्रोन्मेक्ल। तन्न फशेमी मेको आन कली बेरपाइश्शा योल्ब। मुइश्शोमी मेको जाम्शा लाइनीम। तन्न सु सु आं गे जाक्शा पुंइसीनीमी, रागी मेको आन के दुम्ब। मिनु आं डांडा मेको आन के दुम्ब” देंत। भजन संग्रह ३७:९-११
परमप्रभुम पाप रे प्रोंइब
14 मिनु परमप्रभुमी “सेलीन, सेलीन। रिम्शो लां सेलीने। आं मुर आन गाक्तीक लां ङा दाइल पाइब फुल्लु याक्तीन” देंत। यसैया ४०:३; यसैया ६२:१०
15 मिनु ठेयब नु इर ङा, गेना हना यो बाक्ब आ नें का ला बाक्शो परमप्रभुमी “गो नेल्ल क्येङा इर ङा आं बाक्तीकेमी बाक्नुङ। मिनु गो थुं लुक्च लशो नु दिप्चा पुंइसीशो मुर नु बाक्नुङ। गो दिप्शो मुर नु आन थुं लुक्च लशो आन थुं बारपाइक्चा कली मेकोपुकी नु बाक्नुङ। भजन संग्रह ११३:५-९; यसैया ६६:१-२; भजन संग्रह ५०:१९
16 मिनु गो गेना हना यो दोस मगेनुङ। गाइक्स ङा गाइक्स मबाक्नुङ। मोपा बाक्ती हना, आंम आं सेल्शो मुर आन थुं थाइब। भजन संग्रह १०३:९
17 मेको आन परमप्रभु यावे आ अरेशो मटिथु, शिंम दुम्तीके गाइक्ताक्ङ। गो मेको आन कली तुप्शा थाइश्शा गाइक्ताक्ङ। तन्न मेकोपुकी नोले शोंइसीशा आंम आन लां लाम्तेक्म।
18 गो मेको आन पशो ताता। तन्न गो मेको आन कली सापाइक्नुङमी। मेको आन कली कुक्शा, आन थुं बारपाङक्नुङमी। मेको आन दाते ङा रोंका पाइब आन कली थुं बारपाइक्तीक लोव़ पाइनुङ” देंत। प्रस्थान १५:२६
19 मिनु परमप्रभु यावेमी “ङोन नु नेक्था बाक्ब नेल्ल आन थुं नाइश्शा बाक्मल। मिनु गो मेको आन कली सापाइक्नुङमी। गन्ती ६:२६; लूका २:१४; एफिसी २:१७; प्रस्थान १५:२६-; येरमीया १७:१४; यहूदा १:१३; यसैया ४८:२२; हितोपदेस २८:१
20 तन्न आं अरेशो लोव़ मटीबपुकी समुन्द्र ङा फशेम क्युक्शो समुन्द्र ङा ब्वाक्कु खोदेंशो बाक्नीम। गेना हना यो रेयके पाइब ब्वाक्कु खोदेंशो बाक्नीम। मेको ब्वाक्कुमी ग्रांग्रा दिचा ङा थोव़क नु हिलो ग्रुंइब” देंत।
21 आं परमप्रभुमी “आं अरेशो मटीब आन थुं नाइश्शा बाक्चा मताइनीम” देंत।