58
माइजा बाक्चा आ पर्बम शेंशो
1 मिनु परमप्रभु यावेमी “ठेयब सेंदा पा ग्रीङो। तुराही खोदेंशो पा ठेयब सेंदा पावो। आं मुर आन काइ मटिशो नु याकूब आ खिं ङा मुर आन पाप तुइक्पाइक्मी। मीका ३:८
2 मेकोपुकी मटीब बाक्तेक्म हना यो, आं कली नाक्त किंत किंत माल्नीम। आं लां तुइक्चा दाक्नीम। मेकोपुकी ठीक पाइब रागी ङा मुर खोदेंशो दुम्शा, आन परमप्रभु, आं ठीक पतीक लोव़ मप्रोंइशो खोदेंशो बाक्नीम। मिनु आं कली ठीक निसाफ पुंइनीम। परमप्रभु आ नेक्था जाक्चा दाक्नीम। यसैया २९:१३-१४
3 मेकोपुकीमी ‘गो मारदे माइजा बाक्का? गे मताइनीनी। गो मारदे आंम कली ब्रेम्शो सेल्का? गे मतुइक्तीनी’ देंतेक्म। गे इन माइजा बाक्ची ना इन आंम मिम्शो पाइनीनी। मिनु इन गेय पाइब नेल्ल आन कली दिप्नीनी। येरमीया १४:१२
4 गेपुकी जिशा खेशा तुम्मुचा कली ला माइजा बाक्नीनी। इन मुडकीमी तुप्चा कली ला माइजा बाक्नीनी। मोदेंशो माइजा बाक्शा, इन सेंदा इर सम्म मजाक्दीप्ब।
5 आं योव़शो माइजा बाक्तीक मोदेंशो बाक्बा ङा? मार, आंम कली काबु ला ब्रेम्शो सेल्चा? बुदी मीलु घांस गुक्शो खोदेंशो पा इन पिया खुक्शा, अरन्डी फेक्शो नु पुलु तार निश्शो कली माइजा बाक्शो देंनीनी? मेको परमप्रभु यावे आ दाक्शो बाक्ब, देंनीनी? जकरिया ७:५-६; मत्ती ६:१६-१८
6 आं दाक्शो माइजा बाक्तीके मार बाक्ब, देंशा हना, ठीक निसाफ मतशो आन कली प्रोंइचा नु दिप्शा श्येत गेचा पुंइसीशो आन जुवा प्रुइक्चा बाक्ब।
7 आंम जचा थोव़क शोव़लु बेक्ब नु योक्चा, खिं मबाक्शो नु प्रुङग आन कली इन खिंम बाक्चा गेचा, शिश्रा बाक्ब आन कली वा फेक्चा गेचा नु इन लोक्ब आन कली वारच पचा, आं दाक्शो माइजा बाक्तीक बाक्ब। ब्यवस्था १५:११; इजीकीएल १८:७; मत्ती २५:३५-३६
8 मो पाइतीनी हना, गे सुनी ङा नां दाप्शो खोदेंशो दुम्नीनी। मिनु गे रीब पा सानीनी। इन कली वारच पाइब इन ङोंइती गाक्ब। परमप्रभु यावे आ छेङछेङमी इन नोले खोइक्ब। भजन संग्रह ३७:६; यसैया ५२:१२
9 मेना गे पुंइनीनी। मिनु परमप्रभु यावेमी लोव़ लेप्ब। मिनु गे ‘वारच पने’ दे थोइनीनी। मिनु मेकोमी ‘गो एके बाक्ती’ देंब। गे इन दाते रे मरिम्शो पतीक जुवा ताइक्ताक्नी हना, ब्रेप्चो पोक्शा, मरिम्शो लोव़ पचा प्रोंइतीनी हना, रिम्शो दुम्ब। यसैया ३०:१९
10 गे शोव़लु बेक्ब आन कली इन जचा थोव़क गेतीनी हना, श्येत जाइब आन माल्शो गेतीनी हना, इन छेङछेङ छिङछिङम ब्राइब। इन नाक्दो ङा छिङछिङ नाक्ती ङा छेङछेङ खोदेंशो दुम्ब।
11 मिनु परमप्रभु यावेमी इन कली गेना हना यो लां कोंइब। गे श्येत जनी ना इन माल्शो नेल्ल गेब। मिनु इन रुश बोल्यो सेल्ब। गे ब्वाक्कु लाब्वेशो फल फुल रू खोदेंशो बाक्नीनी। गे गेनायो मसोव़ब ब्वाक्कु बुक्तीके खोदेंशो दुम्नीनी। येरमीया ३१:१२
12 मिनु गे इन साइ ङा ब्रेश्शो खिंपुकी लेंशा सेल्नीनी। साइ ङोंइती ङा सेल्शो जग लेंशा वोइक्नीनी। मिनु इन कली गारो सेल्ब, खिं सेल्ब नु लां लेंशा सेल्ब, दे नें वोइक्नीम। यसैया ६१:४
13 गे नाइक्तीक नाक्ती अर्को नाक्त खोदेंशो मसेल्तीनी हना, मेको आं नाक्तीमी इन गेय मपाइतीनी हना नु आं योव़शो नाक्त कली रिम्शो नाक्त बाक्ब देंतीनी हना, परमप्रभु यावे आ नाक्त ठेयब बाक्ब देंतीनी हना, गे मेको नाक्ती कली ठेयब सेल्शा, इन गेय मपाइतीनी हना, इन दला दाक्स मपाइतीनी हना, यसैया ५६:२-४
14 गेपुकी परमप्रभु यावे कली मिम्शा ग्येरसीनी वा। मिनु गो इन माल्शो नेल्ल गेन्नी वा। मिनु गो इन किकी याकूब आ शोंप जचा गेनन्नी वा” दे परमप्रभु यावे आ देंशो बाक्ब।