59
परमप्रभुम पाप क्याम्ब
1 कोव़ङीन, परमप्रभु यावे आ मुर आन कली पाप रे प्रोंइतीक सक्ति मपाइश्शो मदुम्शो बाक्ब। आ नोफा मथांइशो बाक्ब। यसैया ५०:२
2 इन मरिम्शो पतीकेमी इन कली इन परमप्रभु रे फ्राशो बाक्ब। इन पाप आ पर्बम इन ङोंइती रे आ कुल ख्रुइश्शो बाक्ब। मोपतीके इन लोव़ मनेंब।
3 इन गुइ हुश लुम्सीशो बाक्नीम। गे नेल्ल मरिम्शो पाइब बाक्नीनी। गे जोल पना पन बाक्तीनी। गे ओल ओल लोव़ पाइनीनी। यसैया १:१५
4 सुइमी ठीक निसाफ मपाइनीम। सुइमी ठीक निसाफ पाइक्चा मपुंइसीनी। गे जाम्शा लाइब कली थमा सुइश्शा, जोल पाइनीनी। मेकोपुकीम हेंथे पतीकेम ब्रीशा, मरिम्शो पतीके ला थीनीम। भजन संग्रह ७:१५
5 बीस पाइश्शो बुस्स आ ब्वोफु रे चाइक्ब पुक्नीम। माख्रा आ जाल प्रोव़नीम। मेको ब्वोफु जाइब बेक्नीम। ब्वोफु दिम्शा पुक्तेक्म हना, बुस्स ग्रूब।
6 मेको जाल फेक्सीचा नु सुम्सीचा मदुम्ब। मेको आन सेल्शो थोव़कमी आन रां सुम्ने मचाप्नीम। मेको आन गेय मरिम्शो पतीक गेय बाक्ब। मेको हुश ख्राक्श पोक्ब बाक्नीम।
7 मेकोपुकी मरिम्शो पचा कली ला दोरनीम। दोस मताइब आन कली साइक्चा कली चुइक्नीम। मेको आन मिम्शो मरिम्शो बाक्ब। आन लांमी बिग्रेतीक नु खतम पोक्तीक बाक्ब। रोमी ३:१५-१७; हितोपदेस १:१६; येरमीया २:३४
8 मेकोपुकीम थुं नाइक्पाइक्तीक आ पर्बम मारेइ मतुइक्नीम। मेको आन लांम ठीक निसाफ मबाक्ब। मेकोपुकी हेंथे लां खोइक्नीम। सु सु मेको हेंथे लां गाक्नीमी, मेको यो थुं नाइश्शा बाक्चा मताइनीम।
9 मोपतीके ठीक निसाफ पतीके आंइ क्येङा ङोन बाक्ब। गो ठीक पतीके मताइनीकी। गोपुकी छेङछेङ ङा लां कली कोव़नीकी, तन्न छिङछिङ ला बाक्ब। गो नाक्त ङा हाम्सो माल्नीकी, तन्न छिङछिङ ला बाक्ब।
10 मिक्च मताइब खोदेंशो पा गारो सुल्शा गाक्नीकी। मिक्च मपाइश्शो मुर खोदेंशो पा सुल्नीकी। नाक्दो खोदेंशो पा नाक्ती यो दाइल पांइसीनीकी। गो बोल्यो मुर आन दातेम बेक्शो मुर खोदेंशो दुम्तक। ब्यवस्था २८:२९
11 गो नेल्ल वां खोदेंशो पा ग्रीनीकी। ढुकुर खोदेंशो पा रोंका पाइनीकी। गो ठीक निसाफ माल्ना माल्न बाक्नीकी, तन्न मथित्नीकी। पाप रे ब्रोंइतीक माल्नीकी, तन्न मेको आंइ क्येङा ङोन बाक्ब।
12 इन ङोंइती आंइ हेंथे पशो शुश बाक्ब। आंइ पशो पापमी इन कली तुइक्पाइक्ब। गो मरिम्शो पाइब बाक्नीकी, दे तुइक्नीकी। आंइ हेंथे पशो थमा पा गोपुकी नु बाक्ब। गोपुकी आंइ मरिम्शो पशो तुइक्नीकी। येरमीया १४:७
13 गोपुकी हेंथे गाक्शा, परमप्रभु यावे रे नोले शोंइसाक्क। आंइ परमप्रभु आ नोले खोइक्चा प्रोंइतक। आंइ लोव़ मुर आन कली दिप्चा नु परमप्रभु यावे कली मटिचा ङा बाक्ब। गोपुकी जोल कली थमा सुइश्शा, ब्रपाइश्शो बाक्तक।
14 मिनु ठीक निसाफ मबाक्ब। ठीक पतीके ङोन बाक्ब। सुइ सुइमी जोल पाइनीम। मिनु रिम्शो थुं पाइश्शो मुर बाक्ने मचाप्नीम।
15 थमा पतीक तेइ मथिंसीब। रिम्शो पाइब आन मारेइ मारेइ रोइक्चा पुंइसीनीम। मिनु परमप्रभु यावेमी मेको ताप्तु। मिनु ठीक निसाफ मबा, दे थम गाइश्शो बाक्त।
16 मिनु वारच पाइब सुइ मबाक्शो तशा, छक लाक्त। मोपतीके मेकोमी आंम आ सक्तिम ग्रात। आ ठीक पतीकेम आ कली वारच पाइक्तु। इजीकीएल १३:४-५
17 मेकोमी ठीक पतीके कांसा के फेक्तीके खोदेंशो पा फेक्शा, पाप रे प्रोंइतीक ताकी खोदेंशो पा गुक्साक्व। क्येक्क लेत्तीक वा खोदेंशो पा फेक्साक्व। आ थुंमी थमा पा पाइनुङ, दे वा खोदेंशो पा रुक्साक्व।
18 परमप्रभुमी मेको आन पशो खोदेंशो पा मेको आन कली क्येक्क लेप्ब। आ जोरी आन कली आ गाइश्शो कोंइब। आ सत्रु आन कली क्येक्क लेप्ब। समुन्द्र आ नेक्था बाक्ब आन कली क्येक्क लेप्ब।
19 मिनु नां पेरतीकेमी बाक्ब मुरपुकीमी परमप्रभु यावे कली मान पा हिंनीम। नां दाप्तीक ङा मुरपुकी परमप्रभु यावे आ छेङछेङ तशा, मान पा हिंनीम। मारदे हना मेको परमप्रभु यावे बारशो खोला खोदेंशो पा जाक्ब। मिनु आ फशेमी मेको आन कली मुइश्शा खेरब।
20 मिनु सियोनम का जाक्ब। मिनु मेकेर ङा मुर आन कली पाप रे प्रोंइब। मेकोमी हेंथे पतीके रे लेप्ब याकूब आ खिं ङा मुर आन कली रोमी ११:२६
21 “गो नु पशो कबल मार बाक्त देंशा हना, आं सोक्त इन तार बाक्ब। गो आं लोव़ इन शोव़म कुर पाता। मेकेर गेना हना यो बाक्शा इन आलपुकीम मेको लोव़ पना पन बाक्नीमी। मेको लोव़ गेना हना यो इन चच युइम यो पना पन बाक्नीम” दे परमप्रभु यावेमी देंत। येरमीया १:९