60
सियोन आ छेङछेङ जाक्शो
1 परमप्रभुम “बोक्को। मिनु ग्येरसो। मारदे हना इ छेङछेङ जाक्शो बाक्ब। परमप्रभु यावे आ छेङछेङ इ तार जाक्शो बाक्ब।
2 छिङछिङम रागी कली सुम्तु। क्येर नाक्दोमी जात जात ङा मुर आन कली सुम्तु। तन्न परमप्रभु यावे इ तारी ग्रूब। आ छेङछेङ इ तारी तांइसीब।
3 रागी रागी ङा मुरपुकी इ छेङछेङम जाक्नीम। पिपपुकी इ सुनी ङा छेङछेङम जाक्नीम। यसैया २:२-३; प्रकाश २१:२४
4 इ मिक्च हिरशा, कोव़ङो। इ मुर नेल्ल ग्रुम्शा, इ बाक्तीके जाक्नीम। इ तौपुकी ङोन रागी रे जाक्नीम। इ तमी आन कली मुप्शा कुरशा चाक्नीम। यसैया ४९:१८; यसैया ४९:२२; यसैया ६६:१२
5 गे मेको तशा थाम्पा ग्येरनेवे। इ थुं ग्येरसीशा प्रेक्ब। मारदे हना समुन्द्रम चाक्शो मारेइ मारेइ इ के दुम्ब। रागी रागी ङा शोंप नेल्ल इ के दुम्नीम।
6 गे शुश दलओंठ ताइनेवे। मिदयान नु एफाह ङा दलओंठ आन चाइक्बपुकीमी इ रागी ब्रीनीम। मिनु शेबा रे यो चाक्नीम। मेकोपुकीमी सुन नु धूप चाक्शा ‘परमप्रभु यावे ठेयब बाक्ब’ दे ग्येरशा आं पर्बम शेंनीम। भजन संग्रह ७२:१०; मत्ती २:१-११
7 केदार ङा क्यारश भेडा नेल्ल इ बाक्तीकेमी देल्नीम। नेबायोथ ङा सांडपुकीमी इ गेय पाइनीम। मेकोपुकी आं कली चढ़ेतीकेम गारचा ङा बाक्नीम। मिनु गो आं दारशो खिं ग्योम्नुङ।
8 गोस्स खोदेंशो पा बेरब नु ढुकुर आ बाक्तीकेम बेरशा लशो खोदेंशो पा बेरबपुकी सु बाक्मा?
9 समुन्द्र आ नेक्था ङा मुरपुकीम आं लां कोव़नीम। ङोंइती टारसीस ङा जहाजम इ आल आन कली ङोन रागी रे चाक्नीम। मेको आन सुन चांदी यो मेकोपुकी नु बाक्ब। मेको परमप्रभु यावे, इ परमप्रभु आ नेंमी जाक्नीम। इस्राएली आन का ला बाक्शो परमप्रभु आ पर्बम चाक्ब। मारदे हना मेकोमी इन कली दारशो सेल्शो बाक्ब। यसैया ४२:४; यसैया ५५:५
10 मिनु अर्को रागी ङा मुरपुकीम इ गारो प्रोव़शा हिरनीम। मेको आन पिपपुकीमी इ गेय पाइनीम। ङोंइती गाइश्शा, इ कली तुप्तन। तन्न मुल आं दाक्तीकेमी शिशी पाइक्तन। यसैया ५४:८
11 इ सहर ङा गारो ङा लाप्चो रोक्स ङा रोक्स बाक्नीम। नाक्दो नाक्ती इ लाप्चो मचोक्शो बाक्नीम। मोपा रागी रागी ङा मुरपुकीमी आन शोंप चाक्नीम। मेको आन पिप आन ङोंइती गाक्नीम। प्रकाश २:२५-२६
12 मिनु तेक तेको रागी नु तेक तेको राज्य ङा मुरपुकीमी इ गेय मपाइनीमी, मेकोपुकी खतम दुम्नीम। थमा पा क्याम्चा पुंइसीनीम।
13 लेबानोन ङा दारस इ बाक्तीके चाक्नीम। मेकेर ङा लाइश्शो रवा आन शी आं बाक्तीके दारपाइक्चा कली चाक्नीम। मोपा गो आं बाक्तीके दारपाइक्नुङ।
14 इ कली दिप्ब आन चच युइ इ बाक्तीकेम जाक्शा बाप्नीम। इ कली ग्रांग्रा दीब नेल्ल इ खोइलीम बाप्नीम। मिनु मेकोपुकीमी इ कली ‘परमप्रभु यावे आ सहर नु इस्राएली आन का ला बाक्शो परमप्रभु आ सियोन’ देंनीम। यसैया १४:२
15 ङोंइती गे प्रोंइचा पुंइसीशो नु काइ मदाक्चा पुंइसीशो बाक्ते। इ रागी रे पा सुइ मगाक्बाक्तेक्म। मुल गो इ कली गेना हना यो मान तपाइश्शा, पाला पाला सम्म ग्येरसीतीके सेल्नन। यसैया ४९:१४
16 गे रागी रागी ङा दूध तूनेवे। मिनु गे पिप आन दूध तूनेवे। मिनु गो इ कली श्येत रे प्रोंइब बाक्नुङ। याकूब आ सक्ति पाइश्शो परमप्रभु इ कली पाप रे प्रोंइब बाक्नुङ, दे तुइक्नेवे। यसैया ४९:२०
17 मिनु गो कांसा आ पा ङा सुन चाक्नुङ। फलाम आ पा ङा चांदी चाक्नुङ। शी आ पा ङा कांसा नु फुल्लु आ पा ङा फलाम चाक्नुङ। मिनु गो थुं नाइक्तीके इ कली कोव़ब सेल्नुङ। ठीक पतीके इ ठेयब मुर सेल्नुङ।
18 मो दुम नोले इ रागीमी हुश ख्राक्श पोक्शो आ पर्बम मनेंसीब। इ सांदम खतम दुम्शो लोव़ मनेंसीब। तन्न गे इ गारो कली पाप रे प्रोंइतीके नें वोइक्नेवे। गारो ङा ठेयब लाप्चो आन कली ठेयब सेल्तीक नें वोइक्नेवे।
परमप्रभु सियोन ङा छेङछेङ बाक्ब
19 मेना इ कली नाक्त ङा नां छेङछेङ मदुम्ब। नाक्दो तास्ला हाम्सो मदुम्ब। मारदे हना इ परमप्रभु इ कली गेना हना यो छेङछेङ बाक्ब। मिनु इ परमप्रभु इ दारस बाक्ब। यसैया २४:२३; प्रकाश २१:२३; प्रकाश २२:५
20 मिनु मेना रे इ नां गेनायो मलाक्ब। मिनु इ तास्ला यो मलाक्ब। मारदे हना परमप्रभु यावे गेना हना यो इ छेङछेङ बाक्ब। इ रोंका पतीक नाक्ती नुप्त। यूहन्ना ८:१२; याकूब १:१७
21 इ रागी ङा मुर नेल्ल ठीक पाइब दुम्नीम। मेको आन बाक्तीके रागी गेना हना यो आन के दुम्ब। मेकोपुकी आं ख्रुम्शो बाक्नीम। मेकोपुकी आं सेल्शो मुर दुम्शा, आं कली ठेयब सेल्नीम।
22 मेको नेल्ल क्येङा महिक्सीशो थर का दुम्नीम। मिनु नेल्ल क्येङा आइक्च मुरपुकी ठेयब रागी ब्रीशा, सक्ति पाइश्शो दुम्नीम। मेना गो, परमप्रभु यावेमी मेको रीब पा पाइनुङ” देंत।