8
परमप्रभु आ लोव़ पाइब आ तौ
1 मिनु परमप्रभु यावेमी आं कली “गे ठेयब कागज का चाक्को। मिनु रिम्शो पा रुप्चा ङा पा ‘माहेर-शालाल-हाश-बाज’ ब्रेक्तो” देंत। माहेर-शालाल-हाश-बाज आ अर्थ गा पा शुश रोइक्चा बाक्ब।
2 मिनु गो जोल मपाइब सांकछी निक्शी चढ़ेब उरीयाह नु येबेरेकीयाह आ तौ जकरिया आस कली वोइक्तासी।
3 मिनु गो आं मीश नु बाक्ती। मिनु मेकोमी कोव़ज कुरशा तौ का थिप्तु। मिनु परमप्रभु यावेमी आं कली “मेको आ नें माहेर-शालाल-हाश-बाज वोतो।
4 मारदे हना मेको आलम आम आफ देंस जोक्चा क्येङा ङोंइती दमस्कस ङा शोंप नु सामरीया ङा रोइश्शो नेल्ले अस्सुर ङा पिपम लाइक्ब” देंत। यसैया ७:१८; २राजा १६:९
5 मिनु परमप्रभु यावेमी आं कली लेंशा
6 “मेको मुरपुकीम शीलोआ ङा रिम्शो ब्वाक्कु प्रोंइनीम। रेसीन नु रेमाल्याह आ तौ आस क्येङा हिंशा, मेको आस नोले खोइक्तेक्म।
7 मोपतीके गो यहूदा ङा मुर आन कली श्येत गेपाइक्चा कली युफ्रेटीस खोला ङा ब्वाक्कु खोदेंशो पा अस्सुर ङा पिप नु आ लडाइ पाइब शुश आन कली चाक्नुङमी। मिनु मेको खोला बारशो खोदेंशो पा आ एर ओंथ नेल्ल सुम्नीम।
8 मिनु मेको बारशा, यहूदा आ शुर सम्म जाक्दीत्नीम। आ लडाइ पाइबपुकीमी हाम्शो फ्रांम खोदेंशो पा इन रागी नेल्ल सुम्नीम। तन्न इम्मानुएल, परमप्रभु यावे गे नु बाक्ब” देंत।इम्मानुएल आ अर्थ “परमप्रभु यावे गे नु बाक्ब” देंशो बाक्ब।यसैया ७:१४
यहूदा नु रागी ङा मुर आन कली शेंशो
9 गे रागी रागी ङा मुर गारशा सुर्ता पने। गे खतम दुम्पाइक्चा पुंइसीनीनी। गे ङोन रागी ङा मुर नोफा दाइश्शा नेनीने। लडाइ पचा कली किप्शुर किम्सीन। मिनु हिनीन। लडाइ पचा कली ठीक दुमीन। मिनु सुर्ता पने।
10 गे सल्ला पा लोव़सी गारपाइक्नीनी, तन्न मेको शोर गाक्शो दुम्ब। लोव़ पने, तन्न इन लोव़ मगाप्ब। मारदे हना परमप्रभु गो नु बाक्ब।
11 मिनु परमप्रभु यावेमी आं गुइ ग्याइश्शा आं कली लोव़ पा “गे मेको मुर आन खोदेंशो मपावो। मेको आन लांम मगाक्को।
12 मुरपुकीम अरु आन पर्बम ख्रुइश्शा मरिम्शो गेय पाइनीम। गे मोदेंशो मपने। मेको मार तशा हिंनीमी, गे मेको तशा महिनीन। इन थुं ग्येत्थ लुक्च मपपतीन।
13 मुर नेल्ल आन परमप्रभु यावे ला मिम्शा, मेको क्येङा हिनीन। मेको कली मान पा हिनीन। मत्ती १०:२८
14 परमप्रभु इन कली नेल्ल क्येङा ङोंइती ङा मिम्तीके दुम्ल। तन्न इस्राएल आ खिं निक्शी ङा मुर आन कली दाइल पाइक्तीके नु लां तेक्तीके फुल्लु दुम्ब। मेको यरूसलेम ङा मुर आन कली रेप्पाइक्ब ब्वारद दुम्ब। रोमी ९:३३
15 मिनु मुर शुश दाइल पाइश्शा गोल्शा, ब्वारदम रेश्शा, ग्याइक्चा पुंइसीनीम।
16 आं देंशो लोव़ आं शेंसीब आन कली ला नेंपाइक्चा कली छाप थोक्शा, वोतो” दे माइक्ती। दानीएल १२:४
17 मिनु गो याकूब आ खिं ङा मुर आन क्येङा आ कुल ख्रुइक्ब परमप्रभु यावे आ लां कोव़शा, रिम्शा बाक्नुङ।
18 मुर नेल्ल आन परमप्रभु यावे सियोन डांडाम बाक्ब। परमप्रभु यावेमी आं कली नु आं कली गेशो आलपुकी इस्राएली आन दातेमी चिन्ड नु कोंइतीक सेल्तीकी। यसैया ८:३; यसैया ७:३; हिब्रू २:१३
19 मिनु मुरपुकीमी इ कली “बेक्शो मुर आन कली हिल्लो पावो। लिंक्यु कोव़ब चाक्को। वोल आन कली लोव़ पपतो” दे लोव़ पाइनीम। मेको वोल आन रेयके नेंसीब। मिनु मार, सेस मुर आन पर्बम बेक्शो मुर आन कली हिल्लो पचा? मुरपुकीमी आन परमप्रभु कली हिल्लो पचा ममाल्नीमी ङा? २राजा १:३
20 गे शेंतीक नु अरेशो लोव़ आ पर्बम परमप्रभु कली हिल्लो पचा माल्नीनी। अरु लोव़ पाइब मुर काइ मरुप्ब बाक्नीम।
21 मेकोपुकी एको रागीम श्येत जशा, शोव़लु बेक्शा हिरनीम। मिनु शोव़लुमी गाइश्शा, ग्येत्थ गे कोव़शा, आन पिप नु परमप्रभु कली सराप पाइनीम।
22 मेकोपुकीमी खप गे कोव़शा, आन पिया खुक्नीम। मिनु मेकेर श्येत नु छिङछिङ ताइनीम। हिंचा ङा श्येत थम क्येर नाक्दो ला ताइनीम। मेको आन दातेम छेङछेङ मबाक्ब। मिनु आन थुं लुक्च लाइब।