7
यसैयाम आहाज आ थुं बारपाइश्शो
1 आहाज यहूदा ङा पिप बाक्त। मेको योथाम आ तौ नु उज्जीयाह आ चच बाक्त। आहाज आ सासन पची ना अराम ङा पिप रेसीन नु इस्राएल ङा पिप रेमाल्याह आ तौ पेकाह लडाइ पथ यरूसलेम जाक्ताक्स। तन्न ग्राने मचाप्बेम। २राजा १६:५
2 मिनु मुरपुकीम दाऊद आ खिं ङा मुर आहाज कली “अराम ङा लडाइ पाइबपुकी एफ्राइम नु गारशा जाक्तेक्म” दे शेंताक्म। मेको नेंशा आहाज नु आ मुर, फशेम रवा हिम्शो खोदेंशो पा आन थुं हिम्सीमा बाक्त।
3 मिनु परमप्रभु यावेमी यसैया कली “गे नु इ तौ शेआर-याशुब आहाज कली ग्रुम्थ लसे। गे मेको कली आइक्था दोम्ली रे ब्वाक्कु यितीके, वा मुरब आन गेय पतीके ङा ठेयब लांम थित्नीसी।
4 मिनु गे मेको कली ‘होस पा, सिक्सी पा बाक्कीन। महिनीन। इन थुं ग्येत्थ लुक्च मपपतीन। मेको कुन पाइब बुल्सी रेसीन, अराम नु रेमाल्याह आ तौ पेकाह, आन गाइश्शो तशा, महिनीन। इन थुं ग्येत्थ लुक्च मपपतीन। यसैया ३०:१५;
5 मारदे हना अराम, एफ्राइम आ मुर नु रेमाल्याह आ तौ पेकाह नु गारशा, इ कली मरिम्शो पचा कली मिम्शो बाक्नीम।
6 मेकोपुकीमी गोपुकी यहूदा लशा, यरूसलेम कली पुम्शा, ग्राशा ताबेल आ तौ कली मेकेर ङा पिप सेल्य’ देंतेक्म।
7 मोपतीके परमप्रभु, परमप्रभु यावेमी मार देंब देंशा हना ‘मेको आन मिम्शो मदुम्ब। मो पचा मताइनीम।
8 मारदे हना अराम आ पिया दमस्कस बाक्ब। मिनु दमस्कस आ पिया रेसीन बाक्ब। मिनु ६५ बर्स नोले एफ्राइम खतम दुम्शा, मलीब।
9 एफ्राइम आ पिया सामरीया बाक्ब। सामरीया आ पिया रेमाल्याह आ तौ बाक्ब’ गे थमा मसुइक्तीनी हना, थमा पा मलीनीनी” दे परमप्रभु यावेमी देंत। २इतिहास २०:२०
परमप्रभु आ चिन्ड इम्मानुएल
10 मिनु परमप्रभु यावेमी लेंशा आहाज कली
11 “इन परमप्रभु यावे, इन परमप्रभु कली चिन्ड का पुंइदीन। उइ बेक्शो मुर आन बाक्तीक रे हना यो, इर सरीङ रे हना यो चिन्ड का पुनीन” देंत।
12 तन्न आहाजमी “गो मपुंइनुङ। परमप्रभु यावे आ थुं मथाम्नुङ” देंत।
13 मिनु यसैयामी “दाऊद आ खिं ङा मुर नेनीन। मुर आन कली दपाइश्शो खोदेंशो पा, आं परमप्रभु कली यो दपाइक्नीनी?
14 मोपतीके परमप्रभुमी इन कली चिन्ड का गेब। मेको चिन्ड मार बाक्ब देंशा हना, कन्ने मीश आलम कोव़ज कुरशा तौ का थीब। मेको आ नें इम्मानुएल वोइक्नीम। मत्ती १:२३
15 मेको दहि नु खुदो जची ना रेन रिम्शो पचा नु मरिम्शो मपचा तुइक्ब दुम्ब।
16 मिनु मेको वोंइश आलम मरिम्शो मपचा, रिम्शो पचा तुइक्चा क्येङा ङोंइती, इन कली हिंपाइक्ब पिप आस रागी श्येत्थ दुम्ब।
17 परमप्रभु यावेमी अस्सुर ङा पिप आ गुइ रे इन कली, इन मुर आन कली नु इन खिं ङा मुर आन कली हिंचा ङा श्येत गेपाइक्ब। मोदेंशो श्येत एफ्राइम यहूदा रे ब्राम रे गेनायो मदुम्शो बाक्ब” देंत।
यहूदा कली श्येत गेशो
18 मेको नाक्ती परमप्रभु यावेमी इजीप्त ङा नील खोला ङा चुरमु नु अस्सुर रागी ङा सुरब आन कली लाप पा ब्रेप्ब।
19 मेकोपुकी जाक्शा, बेंसीम, रोंगु आ कापम, चू बुटा तारी नु बस्तु भाव योव़तीक नेल्लेम बाक्नीम।
20 मेको नाक्त परमप्रभुमी युफ्रेटीस खोला आइक्ची हांबु रे क्येट थाप्शा चाक्शो छूराम, अस्सुर ङा पिपमी पिया ङा चां नु गिरशी प्रेक्पाइक्ब। मेको छूरामी गाल शोक्रे यो प्रेक्पाइक्ब। २राजा १५:२९
21 मेना मुर कामी बी का नु भेडा निक्शी थुल्ब।
22 मिनु शुश दूध चिम्शा दहि जाइब। मारदे हना मेको रागीम लीशो मुर नेल्लेमी दहि नु खुदो जाइनीम।
23 मेना हजार का शेकेल चांदी लाइब हजार का अङगुर बोट ख्रुम्शो रूम चू नु चोंक वानीम। शेकेल का ११.५ ग्राम ङा चांदी के क्येट बाक्ब।
24 मोपा चू नु चोंक बाक्तीके, मुरपुकी लिब्रा कुरशा मेकेर लाइनीम।
25 ङोंइती डांडा ङा दोशा ख्रुम्शो रूपुकी मेना चू चोंकम सुम्तीके मुरपुकी हिंशा, मेकेर मलाइनीम। बी ब्यफ नु क्यारश भेडा आन कली दिम्पाइक्चा कली सोइक्नीम।