16
अय्युबमी लोव़ लेश्शो
1 मिनु अय्युबमी
2 “गो ओदेंशो लोव़ शुश नेंता। गे नेल्ल मोशा लेम्खु पाइब ला बाक्नीनी।
3 मार मेको फश लोव़ गेनायो मनुप्बा? मारम इन कली ओदेंशो लोव़ पपाइक्बा?
4 गे आं खोदेंशो बाक्नी हना, गो यो इन खोदेंशो पा लोव़ पने चबु वा। गो इन कली यो मोदेंशो लोव़ पङ वा। गो इन कली शुक्शी पा आं पिया हिक्शा कोंइदन्नी वा। भजन संग्रह २२:८
5 गो इन थुं बारपाइक्तीक लोव़ पङ वा। मिनु आं शिशी पाइक्तीकेमी इन कली लेम्द वा।
6 गो ब्वाक्ती हना यो, आं खाइश्शो मसाब। गो सिक्सी पा बाक्ती हना यो, श्येत जस ङा जस बाक्नुङ।
7 थमा पा, परमप्रभुम आं कली थाम्पा दपाइक्ती। आं एर ओंथ ङा नेल्ल आन कली खतम सेल्तु।
8 मेकोम आं कली रोम्पाइक्ती। मिनु एको आं पर्बम सांकछी दुम्शो बाक्ब। गो रुश नु कुशुल ला लीशो बाक्नुङ। एको यो आं पर्बम सांकछी दुम्शो बाक्ब।
9 परमप्रभुमी आ गाइश्शोमी आं कली एर ओंथ फ्रशो बाक्ब। मिनु आं कली काइ मदाक्ब। मेकोम आं पर्बम आ ख्रुइ शेप्शो बाक्ब। आं जोरी सत्रुमी आं कली सिम्ले पा कोव़शो बाक्नीम।
10 मुरपुकीम आं कली शुक्शी पशो बाक्तेक्म। मेकोपुकीम आं चोव़चो शुश राप्शो बाक्तेक्म। आं कली मरिम्शो पाइक्चा कली बुक्तेक्म।
11 परमप्रभुम आं कली थमा मसुइक्ब आन गुइमी गेशो बाक्ब। मिनु परमप्रभु यावेम आं कली आ अरेशो मटीब आन गुइम ब्वारशो बाक्ब।
12 गो रिम्शो पा बाक्शो नङ। तन्न मेकोमी आं कली ख्रोइक्तु। आं शुरम ग्याइश्शा चोकटा लाम्टा सेल्ती। मेकोम आं कली आ मिक्च आ क्रिक्बील सेल्ती। बिलाप ३:१२
13 आ लिब्रा आप्बपुकीम आं एर ओंथ नेल्ल हिरशो बाक्नीम। मेकोम आं कली शिशी मपथु, आं चिच ख्रित्ताक्यी। मेकोम आं खाइल पुक्शा खपीम तोक्तु।
14 मेकोम आं कली पाक्ना पाक्न, लडाइ पाइब खोदेंशो पा आं गे बारब।
15 गो आं रां सुम्चा कली भाङग्रा फेक्साक्यी। गो आं पिया फुरकुम पुम्ता। लेवी ३७:३४
16 ङाक्शा ङाक्शा आं कुल लल जिशो बाक्ब। आं मिक्च आ एर ओंथ नेल्ल क्येर दुम्शो बाक्ब।
17 मो हना यो आं गुइमी मरिम्शो मपशो बाक्ती। आं पुंइशो लोव़ रिम्शो बाक्ब।
18 ए खप, आं हुश मसुमो। आं पुंइशो लोव़ गेनायो मनांइसेक्ल। उत्पत्ती ४:१०; इजीकीएल २४:७-८
19 मो हना यो आं सांकछी स्वर्गम बाक्ब। आं पर्बम लोव़ पाइब इर बाक्शो बाक्ब। अय्युब १७:३
20 आं वारचम आं कली शुक्शी पाइनीम। गो ङाक्शा परमप्रभु गे कोव़नुङ। १सामुएल २:२५
21 मेकोमी परमप्रभु नु आंस दातेमी निसाफ पवल। मुर नु आ वारच आन दातेमी दोपा निसाफ पाइबा, मोपा पवल।
22 इच्का बर्स नोले गो गेनायो मलेत्चा ङा पा लाइनुङ” देंमाक्त। अय्युब १०:२१