23
अय्युबम लोव़ पशो
1 मिनु अय्युबमी
2 “मुलाक्ती आं देंशो लोव़ थुं मनुचा ङा बाक्ब। गो हुकयी पना पन बाक्ती हना यो, परमप्रभुमी आं कली श्येत गेना गेन बाक्ब।
3 गो मेको कली ते बाक्बा, मेको तुइक्तु हना, गो मेको आ बाक्तीके लाङ वा।
4 गो आं श्येत मेको आ ङोंइती नेल्ल शोव़ङु वा। गो मेको कली आं देंचा माल्शो लोव़ नेल्ल देंङ वा।
5 मेकोमी आं कली मार लोव़ लेप्बाक्मे गो मेको तुइक्तु वा। मिनु गो मेकोम आं कली मार देंबाक्मे मेको रुबु वा।
6 मेको आ ठेयब सक्तिमी गो नु लोव़ पाइबा ङा? ममाइ, परमप्रभुमी आं कली गेनायो दोस मगेब।
7 रिम्शो थुं पाइश्शो मुरपुकीमी मेको नु लोव़ पने चाप्नीम। मिनु गो आं निसाफ पाइब रे गेना हना यो प्रोंइचा पुंइसीङ वा।
8 गो ङोंइती गे लती हना, मेको मेक मबाक्ब। गो नोले गे लेत्ती हना यो, मेको मेक मबाक्ब।
9 मेकोमी पेरा गे ख्रुइक्ताक्व हना, गो मेको कली मताइनुङ। गो ग्युरा गे हिरसीङानु यो मेको कली तने मचाप्नुङ। अय्युब ४२:५
10 तन्न मेकोमी आं गाक्शो लां तुइक्ब। मेकोमी आं कली नाक्शा कोव़यीनु, गो सुन खोदेंशो दुम्नुङ। भजन संग्रह १७:३; भजन संग्रह १३९:२३-२४
11 गो मेको आ नोले खोइश्शो बाक्नुङ। गो मेको आ लांम ला गाक्शो बाक्ती। गो ग्युरा पेरा मपङ।
12 गो मेको आ शेंशो पाता। मेको आ लोव़ नाक्त किंत किंत ङा आं जचा थोव़क क्येङा यो शुश मिम्ताक्ङ।
13 तन्न मेको आ कान बाक्ब। मिनु सुमी मेको कली तेक्ने चाप्बा ङा? मेकोमी आ मिम्शो खोदेंशो पाइब।
14 मेकोमी आं कली मार पचा मिम्बा, मेको नेल्ल पाइब। मिनु मोदेंशो शुश मिम्ब।
15 मोपतीके गो मेको नु ग्रुम्चा शुश हिंनुङ। गो मेको कली मिम्शा हिंशा ख्रिंख्रि पाइनुङ।
16 परमप्रभुम आं थुं थपाइश्शो बाक्ब। नेल्ल क्येङा ठेयब सक्ति पाइश्शोमी आं कली हिंपाइक्ब।
17 छिङछिङमी आं कली सिक्सी पपाइक्ने मचाप्ब। मेको छिङछिङमी आं कली सुम्ने मचाप्ब” दे अय्युबमी देंमाक्त।