24
परमप्रभु कली मटीब
1 मिनु अय्युबमी “नेल्ल क्येङा ठेयब सक्ति पाइश्शोमी निसाफ पतीके नाक्त मतुइक्पदा? आ नेक्था बाक्बपुकीम यो मेको आन नाक्त मारदे मतुइक्नीमी? उपदेसक ३:११; उपदेसक ८:६
2 परमप्रभु यावे आ अरेशो मटीब मुरपुकीम सांद ङा फुल्लु याक्नीम। मेकोपुकीम क्यारश भेडा खुइ पशा योव़नीम। ब्यवस्था २७:१७
3 मेकोपुकीम रोम रोइक्च आन गधा खुल्शा लाइक्नीम। मिनु वोंइश बेक्शो मीश मुर आन ब्यफ जाकटी वोंइसीनीम।
4 मेकोपुकीम प्रुङग आन कली लां मेर चुशा थोक्शा गाक्नीम। रागी ङा प्रुङग आन कली ख्रुइक्पाइक्नीम।
5 ब्वाकी ङा गधा गोरशो रागीम जचा थोव़क माल्शा गाक्शो खोदेंशो पा, प्रुङगपुकी जचा थोव़क माल्शा गाक्नीम। मिनु गोरशो रागीम मेको आन तमी तौ आन कली जचा थोव़क माल्नीम।
6 प्रुङगपुकीम मुर आन रूम सिला माल्नीम। परमप्रभु यावे आ अरेशो मटीब मुर आन अङगुर रूम सिला पाइनीम।
7 वा मबाक्तीके मेकोपुकी शिश्रा इप्नीम। मेको आन के ग्यूमी फेक्तीक मबाक्ब।
8 मेको पहाडम बाक्शा रेउम जित्नीम। फाम्सीतीके मबाक्तीके, फुल्लु आ नेक्था फाम्सीनीम।
9 परमप्रभु यावे आ अरेशो मटीबपुकीम रोम रोइक्च आन कली आन ममा आ थुकु रे रोइश्शा, लाइनीम। मिनु मारेइ मथीब मुर आन आल आन कली आन जेर आ पा ङा लाइनीम।
10 मेकोपुकी वा मबाक्तीके शिश्रा गाक्नीम। शोव़लु बेक्शा यो, क्योव़ज चेरब आ मुठा कुरनीम। यसैया ५८:७
11 मेकोपुकीम गारो आन दातेमी तेल ख्राक्नीम। अङगुर ख्राक्तेक्म हना यो तूतू, दाक्शो बाक्नीम। याकूब ५:४
12 सहर रे बेक्चा चिक्शो मुर आन हुकयी पशो नेंसीब। मिनु गार दुम्शो मुरुम ‘वारच पाइय्यीनी’ दे वाइ ब्रेप्ब। मो हना यो परमप्रभुम मेको आन पुंइशो मनेंब।
13 का निक्शी मुर छेङछेङ आ पर्बम मरिम्शो लोव़ पाइनीम। मेकोपुकीम छेङछेङ ङा लां मतुइक्थु, मगाक्नीम।
14 मुर साइक्ब मुर नां रिक्म नोले बोक्शा प्रुङग नु मारेइ मथीब आन कली साइक्ब। मिनु नाक्दो मेको खुइ खोदेंशो दुम्ब।
15 मुर आन मीश नु मुर आन वोंइश नु इप्ब नां रिक्चा रिम्ब। मिनु मेकोमी ‘नाक्दो सुइम आं कली मतुइक्तमेक्ल’ दे आ कुल फाइक्ब। भजन संग्रह १०:११
16 खुइपुकी नाक्दो खिं प्रोल्शा ओव़नीम। मिनु नाक्त ख्रुंइसीनीम। मिनु मेकोपुकीम छेङछेङ मतुइक्नीम।
17 मारदे हना क्येर नाक्दो मेको आन कली सुनी बाक्ब। क्येर नाक्दो ङा शुश हिंतीके मेको आन वारच बाक्ब।
18 मेको मोदेंशो मुरपुकी ब्वाक्कु आ तार ङा बोग्यो खोदेंशो बाक्नीम। मेको आन थेरशो रू सराप चीले तशो बाक्नीम। सुइ मुर आन अङगुर रू गे मलाइनीम।
19 दोपा यशो फुं कली नां नु होशोम सोव़पाइक्बा, मोपा बेक्शो मुर आन बाक्तीकेमी पापी आन कली साम्पाइक्ब।
20 मेको आन कली जरमेब कोव़जीम मेको आन कली प्रेंब। मिनु लुस्पुमी ‘मेको ब्रोव़शो बाक्नीम’ दे मिम्नीम। मुरुम मेको आन कली प्रेंनीमी। मोपा परमप्रभु यावे आ अरेशो मटीबपुकी दिम्शो रवा खोदेंशो दुम्नीम।
21 मेकोपुकीमी आल मथीब मीश मुर आन कली श्येत गेनीम। मिनु आ वोंइश बेक्शो मीश मुर आन कली मारेइ रिम्शो मपाइनीम।
22 मो हना यो परमप्रभु आ सक्तिमी मेको बोल्यो मुर आन कली ब्रोंइचा गेब। तन्न गेना बेक्नीमी मतुइक्नीम।
23 परमप्रभुम मेको आन कली प्रोंइतु हना यो, मेकोमी मेको आन कली गेना हना यो कोव़शो बाक्ब।
24 याम का कली मरिम्शो पाइबपुकी ग्येत्थ क्युक्चा पुंइसीनीम। मिनु नोले मेको जाम्नीम। अरु खोदेंशो पा मेकोपुकी यो बेक्शा लाइनीम। मिनु मेकोपुकी चेरब पेश्शो खोदेंशो पा पेत्सीनीम।
25 सुइमी आं कली ‘गे जोल पाइब नवे’ दे देंने मचाप्नीम। मिनु आं कली ‘फश लोव़ पाइब’ देंने मचाप्नीम” देंमाक्त।