39
परमप्रभु आ हिल्लो पशो लोव़
1 परमप्रभुमी अय्युब कली “रोकोश गेना गिक्बा, गे तुइक्नेवे? छाउरी किश्श गिक्मेनु मेको तशो बाक्नेवे?
2 मेकोपुकीम कोव़जम चाइक्ब कुरमेनु, गे मेको आन महिना हिक्ने चाप्नेवे? गे मेको आन गिक्ची ना तुइक्नेवे?
3 मेकोपुकी गिक्चा कली बाप्नीम। मिनु आन चाइक्ब जरमेनीम। मिनु आन चाइक्ब ब्रोंइशा बाक्नीम।
4 मिनु मेको आन चाइक्ब बोल्यो दुम्नीम। ब्वाकीम कोल्नीम। काबु ब्वाकी मेर लशा, लेश्शा मजाक्नीम।
5 सुम ब्वाकी ङा गधा कली प्रोंना। सुम मेको आ डोरी प्रुदा।
6 गो मेको आन कली ‘बाक्कीन’ दे गोरशो रागी गेता। मिनु हिक्सी बाक्शो रागी मेको आन कली गेता।
7 मेको सहर ङा रेयके रे ङोन बाक्नीम। मिनु मेकोम शारा दोरपाइक्ब आन ग्रीशो मनेंनीम।
8 मेकोम डांडा मेर आन जोतीक सेल्नीम। मिनु गिगी घांस नेल्ल माल्शा नेक्नीम।
9 मार ब्वाकी ङा सांढे ब्यफोम इ गेय पने बिप्बा? मार मेको इ घांस लाप्तीकेम नां सोंइबा?
10 गे मेको कली वाक्ने चाप्नेवे? मार मेकोमी दांदे पा इ रू दिंम सेल्बा?
11 मार गे मेको आ बोल तशा इ गेय पपाइक्नेवे? इन गेय नेल्ल पचा गेनेवे?
12 मेको इ अन्न कुरशा चाक्चा कली लेश्शा जाक्ब, दे थमा सुइक्नेवे?
13 ठेयब चिक्बीम ग्येरशा आ फ्रां हाम्ब। तन्न मेको सारस खोदेंशो पा बेरने मचाप्ब।
14 मेकोम आ ब्वोफु होल दे खपीम वोइक्ब। मिनु मेक उइ प्रोंइब।
15 मिनु मेको कली खोइलीम दिम्नीम, दे प्रेंब। ब्वाकी ङा जन्तुपुकीम दिम्ने चाप्नीम, दे ममिम्ब।
16 मेकोम आंम चाइक्ब, आ के ममाइ खोदेंशो पा, आन कली शिशी मपाइब। मेको आ ब्वोफु पतीके मोशा लत हना यो, महिंब।
17 परमप्रभुमी मारदे हना मेको कली तुइक्तीक थुं मपाइश्शो सेल्शो बाक्ब। मिनु मेको कली मारेइ मरुप्ब सेल्शा प्रोंइशो बाक्ब।
18 मिनु मेको दोरशा आ फ्रां प्राक्ब। मिनु शारा नु शारा ङोइक्ब आन कली कोव़शा रिप्ब।
19 गे शारा कली मेको आ बोल गेनेवे? मेको आ शुर चांम ग्योम्नेवे?
20 गे मेको कली सल्हा खोदेंशो पा प्रेक्पाइक्नेवे? मेको आ ठेयब सेंदा पा ग्रीशोम नेल्ल आन कली हिंपाइक्ब।
21 मेकोम आ गेंचम प्रेक्ना प्रेक्न राप्ब। मेकोम आ बोल नेल्ल कोंइशा, लडाइ पतीकेम लाइब।
22 मेकोम हिंतीक आ पर्बम मारेइ ममिम्ब। मेको तरवार तशा मप्रोक्ब।
23 मेको आ ब्रा हुरुर पा ग्रीब। मिनु मेकेर तूतीक नु तरवार हिरनीम।
24 तन्न मेको थाम्पा आ जोंब बोक्शा, दोरशा लाइब। तुराही ताप्शो नेनानु, मेको सिक्सी पा बाक्ने मचाप्ब।
25 मेकोम तुराही ताप्शो नेंशा ‘आहा’ देंब। मिनु मेकोम ङोन रेन लडाइ पाइब आन हुल नु लडाइ ङा रिना नेंब।
26 ब्वारदे आ फ्रां हाम्शा दक्खिन गे बेरचा कली इ रुप्तीकेमी शेंदी?
27 मार ककाकुलीम आ ग्योव़ इर रोंगुम सेल्चा कली इ अरेशो बाक्बा?
28 मेको रोंगुम बास बाक्ब। मिनु आ ग्योव़ मेकेन सेल्ब।
29 मेकेर रे आ सिखार कोव़ना कोव़न बाक्ब। मेकोमी ङोन ङोन नेल्ल रिम्शो पा तने चाप्ब।
30 मेको आ चाइक्बपुकीम हुश तूनीम। मेको ते ते मार मार सिखार बाक्मा, मेको मेकेर बाक्नीम” दे परमप्रभुम अय्युब कली देंमाक्त। हबकुक १:८; मत्ती २४:२८