40
अय्‍युबमी परमप्रभु कली लोव़ लेश्‍शो
मिनु परमप्रभु यावेमी लेंशा अय्‍युब कली “नेल्‍ल क्‍येङा सक्ति पाइश्‍शो, गो आं कली दोस गेबमी आं कली लोव़ लेत्‍चा माल्‍ब” देंमाक्‍त। यसैया ४५:९
मिनु नोले अय्‍युबमी परमप्रभु यावे कली लोव़ लेश्‍शा “गो शोर गाक्‍शो मुरुम इन कली मार लोव़ लेन्‍ने चाप्‍नुङा ङा? गो आं गुइम आं शोव़ सुम्‍नुङ। उत्‍पत्ती ३२:९; यसैया ६:५; हितोपदेस ३०:३२ गो खेयप का लोव़ पने थुम्‍ता। मुल लेंशा लोव़ मपाइनुङ। गो खेयप निक्‍शी ब्‍वाक्‍ती, मुल ब्‍वाक्‍तीक लोव़ मबाक्‍ब” देंमाक्‍त।
परमप्रभु यावेमी आ सक्ति कोंइशो
मिनु परमप्रभु यावेम अय्‍युब कली फश गिवार रे पा लोव़ लेश्‍शा “गे बोल्‍यो मुर खोदेंशो दुम्‍शा रपो। मिनु गो इ कली लोव़ हिल्‍लो पाइनुङ। मिनु गे लोव़ लेत्‍ती। अय्‍युब ३८:३ गो आं कली ‘दूली पाइब’ देंनेवे? मिनु गे आंमा ठीक पाइब बाक्‍नुङ देंचा कली आं कली दोस गेनेवे? मार इ सक्ति परमप्रभु के खोदेंशो बाक्‍बा? गे बुंबु पशो सेंदा खोदेंशो पा ग्रीने चाप्‍नेवे?
10 चाप्‍नेवे हना, मान ततीकेम नु ठेयब दुम्‍तीकेम आंम कली ग्‍योम्‍सो। गे इ एर ओंथ दारस नु छेङछेङ वोंइसो। 11 इ गाइक्‍तीक कोंइदो। मिनु ठेयब लेश्‍शो मुर आन कली कोव़शा, मेको आन कली दिप्‍शा आइक्‍च सेलो। 12 ठेयब लेश्‍शो मुर नेल्‍ल आन कली कोव़ङो। मेको आन कली आइक्‍च सेलो। मिनु आं अरेशो लोव़ मटीब आन कली आन राप्‍तीकेमी दिम्‍दीमी। 13 मेको नेल्‍ल आन कली खपीम ख्रुइक्‍तीमी। मिनु रागी आगाम मेको आन कुल ख्रुइक्‍पाइक्‍मी। 14 मिनु गो ‘इ ग्‍युरा गुइमी ग्राने चाप्‍बाक्‍‍ते’ दे थमा सुइक्‍नुङ।
15 गो इ कली सेल्‍शो खोदेंशो पा बेहेमोथ माइश्‍शो ठेयब जन्‍तु कली सेल्‍ता। मेकोमी बी ब्‍यफ खोदेंशो पा घांस ब्‍वाइब। बेहेमोथ ब्‍वाक्‍कु ङा ठेयब जन्‍तु बाक्‍ब। 16 मेको आ सक्ति आ फिलाम बाक्‍ब। मिनु आ बोल आ कोव़जम बाक्‍ब। 17 मेको आ मीलु लेबानोन ङा लाइश्‍शो रवा खोदेंशो खकटा बाक्‍ब। मेको आ फिला ङा नाडी थम खांइसीशो बाक्‍नीम। 18 मेको आ रुश कांसा खोदेंशो बाक्‍नीम। मिनु मेको आ खोइली फलाम खोदेंशो बाक्‍नीम।
19 मेको परमप्रभु आ नेल्‍ल क्‍येङा ङोंइती ङा ठेयब गेय बाक्‍ब। मो हना यो मेको कली सेल्‍ब तरवार शेंशा ला मेको आ नेक्‍था लने चाप्‍ब। 20 डांडामी मेको आ जोतीक बाक्‍ब। ब्‍वाकी ङा जन्‍तु नेल्‍ल मेकेर ग्‍यारनीम। 21 मेको कमल फू आगाम इप्‍ब। मेको बुदी मीलु नु ब्‍वाक्‍कु बाक्‍‍तीक मेर ख्रुइश्‍शा बाक्‍ब। 22 कमल फूमी मेको कली आ वांकु गेब। मेको आ एर ओंथ ङा खोला मेर बुटा बाक्‍नीम। 23 मेको खोला बारशा कुत हना यो महिंब। बारशो खोला आ गे पित हना यो दिल थिश्‍शा इप्‍शा बाक्‍ब। 24 सुइ मुरुम मेको कली आ बोल्‍सीम रेत्‍ने मचाप्‍ब। सुम मेको आ मिक्‍च थि‍ने चाप्‍बा? सुम मेको कली ब्‍वारदम रेश्‍शा आ नें ख्रिन्‍ने चाप्‍बा ङा?” दे परमप्रभुमी अय्‍युब कली देंमाक्‍त।