2
ग्रुम्तीकेमी कुल मकोव़मुने
1 आं लोक्बपुकी, इं प्रभु येसु ख्रीस्त कली थमा सुइक्नीनी। मेको छेङछेङ ङा प्रभु बाक्ब। मोपतीके गेपुकी यो मुर आन कुल मकोव़ङीन।
2 थम दारशो वा फेक्शो नु सुन के औंठी पांइशो मुर का नु जेक्शो वा फेक्शो प्रुङग मुर का इन ग्रुम्तीक खिंमी जाक्ताक्स हना,
3 मेको दारशो वा फेक्शो कली कोव़शा “हजुर, मेकेर निस्सीने” दे लोव़ पशा, प्रुङग कली चहिं “हयु उइ राप्शा बाक्को। आं खोइल आ नेक्था निस्सो” दे माइक्तीनी हना,
4 गे इन दातेमी आइक्च नु ठेयब तिल्नीनी। मोदेंशो पनीनु, मरिम्शो निसाफ मपनी ङा?
5 आं लोक्बपुकी, नेनीन, परमप्रभु यावेमी रागी ङा प्रुङग आन कली शुश थमा सुदमेक्ल, दे मयोव़ङा ङा? मिनु परमप्रभु यावे कली दाक्ब नेल्ल आ राज्य ओव़चा ताइनीम मदेंम ङा? १कोरिन्थी १:२६; १कोरिन्थी ११:२२; लूका १२:२१
6 गे चहिं प्रुङग आन कली दिप्नीनी। मेको शुश क्येट थीब मुरपुकी इन कली श्येत गेब मुर मनमी ङा? मेकोपुकीमी इन कली अडडाम मचाक्दीत्नीमी ङा?
7 येसु ख्रीस्त आ नें आ पर्बम शुक्शी लोव़ मपाइनीमी ङा? १पत्रुस ४:१४
दाक्मुने
8 परमप्रभु यावे आ राज्य ङा अरेशो लोव़म मार ब्रेक्शो बाक्ब देंशा हना “अरु आन कली आंम इन कली दाक्शो खोदेंशो पा दाक्तीन” दे ब्रेक्शो बाक्ब। मो पाइतीनी हना, गेपुकी रिम्शो पाइनीनी। लेवी १९:१८
9 तन्न गेपुकीमी थमा सुइक्ब का कली ठेयब सेल्शा, अरु आन कली आइक्च सेल्तीनी हना, गे पाप पाइनीनी। मिनु परमप्रभु यावे आ अरेशो लोव़ मटीब दुम्नीनी। ब्यवस्था १:१७
10 मुर कामी परमप्रभु यावे आ अरेशो लोव़ नेल्ल पशा, का चहिं मपाप्तु हना, लोव़ नेल्ल मटीब खोदेंशो दुम्ब। मत्ती ५:१९
11 परमप्रभु यावेमी “मीश वोंइश आस नाता मख्रोइक्चा” दे ब्रेक्शो बाक्ब। मिनु “मुर मसाइक्चा” दे यो ब्रेक्शो बाक्ब। तेल्लेम मपथु, तन्न मुर आन कली साइक्तीनी हना, गेपुकी परमप्रभु यावे आ अरेशो लोव़ मटीब पापी दुम्नीनी। प्रस्थान २०:१३-१४
12 परमप्रभु यावेमी इन कली पाप रे ब्रोंइतीक लां कोंइशा, निसाफ पाइब। मेको मिम्शा, गेय पने।
13 शिशी मपाइबपुकीमी निसाफ पची नाक्त शिशी मताइनीम। निसाफ क्येङा शिशी ठेयब बाक्ब। मत्ती ५:७; मत्ती १८:३०,३४; मत्ती २५:४०,४६
थमा सुइक्चा नु टिचा
रोमी ३:२१-३१; मत्ती ७:२१
14 आं लोक्बपुकी, मुर कामी “गो थमा सुइक्नुङ” दे परमप्रभु यावे आ अरेशो लोव़ नु गारब गेय मपाप्तु हना, आ थमा सुइश्शोमी मेको कली पाप रे प्रोंइने चाप्बा ङा? मत्ती ७:२१
15 मिनु लोक्ब का के जचा फेक्चा मबाक्त हना,
16 मेको कली “थुं नाइश्शा बाक्को। परमप्रभुमी इ कली फेक्तीक गेवल। जचा गेवल” देंशा, गे मेको कली आ माल्शो मारेइ मगेतीनी हना, इन थमा सुइक्तीके शोर गाक्शो बाक्ब। १यूहन्ना ३:१८
17 इन थमा सुइक्तीकेमी गेय मपाप्तु हना, मेको थमा सुइक्तीके बेक्शो बाक्ब।
18 मुर का निक्शीमी “गे थमा सुइक्ब दुम्तीनी। गो चहिं परमप्रभु यावे आ गेय पाइब दुम्तक। मोपतीके इन थमा सुइश्शो कोंइदीन। इन गेय कोंइचा ममाल्नीनी। गो यो आंइ पशो गेय रे आंइ थमा सुइक्तीके कोंइनीकी” देंने चाप्नीम। गलाती ५:६
19 गेपुकी परमप्रभु यावे का ला बाक्ब, दे थमा सुइक्नीनी। मोपा रिम्शो पाइनीनी। वोलपुकीमी यो मेको थमा सुइश्शा हिंशा ख्रिंख्रि पाइनीम।
20 गे दूली पाइबपुकी, गेय मपथु थमा सुइक्तीके शोर गाक्शो बाक्ब, मेको तुइक्तीन।
थमा सुइक्चा मार बाक्बा?
21 मिनु इं किकी अब्राहाममी आ तौ इसहाक परमप्रभु यावे कली चढे़चा, दे परमप्रभु यावे आ ङोंइती ठीक गेय पाइब दुम्माक्त। उत्पत्ती २२:१-१९; हिब्रू ११:१७; रोमी ४:२-३
22 आ थमा सुइक्तीके नु आ गेय काथ काथा पवा बाक्त। मोपा आ थमा सुइक्तीके आ गेयमी ठीक दुम्शो बाक्माक्त।
23 मिनु अब्राहाम आ पर्बम ब्रेक्शो लोव़ ठीक दुम्माक्त। मार ब्रेक्शो बाक्त देंशा हना “अब्राहाममी परमप्रभु यावे कली थमा सुदा बाक्त। मेको थमा सुइश्शोमी अब्राहाम कली ठीक सेला बाक्त” दे ब्रेक्शो बाक्त। मिनु मुरपुकीमी अब्राहाम कली “परमप्रभु यावे आ वारच” दे याइनी नें वोदमे बाक्त। उत्पत्ती १५:६; यसैया ४१:८
24 मुरुमी थमा सुइक्चा ला ममाइ, आन गेयमी यो ठीक दुम्नीम, दे गेपुकी रुप्ने मचाप्नीनी ङा?
25 अब्राहाम खोदेंशो पा राहाब माइश्शो तेल्लेम मीश मुरुमी यो थमा सुइक्ब दुम्शा, आ पशो गेयमी ठीक दुम्माक्त। दोदेंब गेय पवा बाक्त देंशा हना, इस्राएल ङा मुर निक्शी आस कली अरु लां कोंइशा, सोइक्ता बाक्त। हिब्रू ११:३१; यहोसु २:-
26 मिनु दोपा सोक्त मपाइश्शो मुर बेक्शो बाक्बा, मोपा थमा सुइक्बमी थमा सुइश्शो गेय मपाप्तु हना, आ थमा सुइक्तीके बेक्शो बाक्ब।