3
मुर आ शोव़मी दोपा पाप पाइबा
1 आं लोक्बपुकी, शुश शेंब मुर मदुमीन। मारदे हना परमप्रभुमी मेको शेंसीब आन क्येङा शेंब आन कली शुश कोव़शा, आन लोव़ नेंशा, निसाफ पाइब।
2 गो नेल्लेमी शुश गल्ती पाइनय। सुमी लोव़ पवानु, काइ गल्ती मपाइबा, मेकोमी रांम मपचा ङा गेय यो मपाइब। मेको मुर थम रिम्शो बाक्ब।
3 गोपुकीमी शारा बिप्पाइक्चा कली लगम पाइक्नय। मोपा मेको शारा आ रां नेल्ल चलेने चाप्नय।
4 जहाज यो मिम्तीन। दोदेंशो ठेयब बाक्त हना यो, दोदेंशो ठेयब फशेमी मेको कली गाक्पाइश्शो बाक्त हना यो, चलेबमी मेको कली इम्चीली थोव़कमी चलेशो बाक्ब। मिनु ते लाइक्चा दाक्ता, मेकेर लाइक्ने चाप्ब।
5 मेको इम्चीली चलेतीके खोदेंशो मुर आ लें बाक्ब। मुर आ लेंमी ठेयब लोव़ पाइब। मेको लें आइक्च बाक्त हना यो, ठेयब मरिम्शो पने चाप्ब। इम्चीली मीम ठेयब ब्वाकी क्रोइक्ने चाप्ब।
6 मुर आ लें मी खोदेंशो बाक्ब। मेकोमी रां नेल्ल मरिम्शो सेल्ब। मेकोमी मरिम्शो लोव़ पशा, रां कली पापी सेल्ब। रागी नेल्ल कली क्रोइक्ब। आंमा यो नरकमी ग्रोइक्ब। हितोपदेस १६:२७; मत्ती १२:३६-३७; मत्ती १५:११,१८
7 मुरपुकीमी बस्तु भाव, जन्तु, चिक्बी नेल्ल आन कली शेंने चाप्नीम। मिनु मेको आन कली शेंताक्म हना यो,
8 आंम आन लें कली शेंने मचाप्नीम। मुरुमी आन लेंमी मरिम्शो पाइनीम। दोपा ओश्येर जशा, मुर बेक्नीमी, मोपान लें यो मुर कली साइक्ने चाप्चा ङा ओश्येरमी ब्रीशो बाक्ब।
9 गोपुकीमी प्रभु नु आ आफ कली “गे ठेयब नसी” दे लोव़ पाइनय। मिनु परमप्रभु यावेमी आ खोदेंशो सेल्शो मुर आन कली सराप पाइनय। भजन संग्रह १४१:३; उत्पत्ती १:२६-२७
10 मोपा शोव़ कामी आसीक लोव़ नु सराप लोव़ पाइनीम। आं लोक्बपुकी, मो पचा मदुम्ब। एफिसी ४:२९
11 ब्वाक्कु बुक्तीक का रे कशो नु ब्रोव़शो ब्वाक्कु कालेमी यीबा ङा?
12 आं लोक्बपुकी, फोव़शी रवामी तेल रवा आ फल मसिप्ब। अङगुर रवामी फोव़शी मसिप्ब। मेको खोदेंशो पा हिक्सी ङाम्शो ब्वाक्कु रे ब्रोव़शो ब्वाक्कु ग्रूने मचाप्ब।
इन गेय तेको लां रे जाक्बा?
13 मिनु इन दातेमी सु निप्स पाइश्शो नु रुप्तीक थुं पाइश्शो मुर बाक्मा, मेकोमी आ गेय रे पा आ ब्रेम्तीके रुप्तीक थुं रे जाक्ब, दे कोंइदल।
14 गे अरु मुर आन थोव़क वाल्तीक नु आंम कली ला मिम्तीक थुं बाक्त हना, ठेयब लेश्शा, थमा शेंतीके कली जोल मसेलीन माइ? मबाक्कीन।
15 ओदेंशो मिम्तीके परमप्रभु आ गेशो रुप्तीक थुं मबाक्ब। तन्न मुर आन थुं रे नु सैतान रे जाक्ब। याकूब १:५
16 मुरुमी मुर आन के थोव़क वाल्चा नु आंम कली ठेयब सेल्चा ला मिम्ताक्व हना, मेको मुरुमी मरिम्शो गेय नु अरु पाप यो पना पन बाक्ब।
17 परमप्रभुमी गेशो निप्स पाइश्शो थुंमी मुर कली ग्रांग्रा दिचा ङा गेय मपपाइक्ब। सुइ नु मजिपाइक्ब। ब्रेम्शो सेल्ब। गाइश्शो फाल्पाइक्ब। शुश शिशी पपाइक्ब। रिम्शो गेय पपाइक्ब। कुल कोव़शा, गेय मपपाइक्ब। जोल मपपाइक्ब।
18 थुं नाइश्शा बाक्ब मुरपुकी ठीक गेय पशा, मुरपुकी नु दुशा गारशा बाक्नीमी। मेको परमप्रभु यावे आ गेशो ठीक पतीकेमी बाक्ब। फिलिप्पी १:११; मत्ती ५:९