2
इस्राएली आन कली प्रोंइशो
1 मिनु परमप्रभु यावेमी आं कली
2 “लावो, परमप्रभु यावेमी यरूसलेम कली मार देंत देंशा हना ‘गे इ ठिटी बाक्ची ना आं कली ग्युम्लीम खोदेंशो पा दाक्ताक्यी। गे आं कली मारेइ मशोक्शो गोरशो रागीमी आं नोले खोइक्ती। गो मेको मिम्नुङ। होसे २:१६; होसे १३:५
3 इस्राएल आंम परमप्रभु यावे कली आ का ला बाक्शो ग्युम्ली खोदेंशो बाक्त। मेको, आ गेय ङा ङोंइती ङा फल खोदेंशो बाक्त। मेको कली नेक्ब नेल्ल दोस ताइब दुम्तेक्म। मेको श्येत जाम्तेक्म’ देनो” दे माइक्ती। प्रस्थान २८:३६; आमोस ६:१; याकूब १:१८
4 गे याकूब आ खिं ङा मुर नु इस्राएल आ खिं ङा मुर नेल्ले, परमप्रभु यावे आ लोव़ नेनीन।
5 परमप्रभु यावेमी मार देंत देंशा हना “इन किकी पिपीम आं कली मार, दोस गेयीमी? मारदे आं कली प्रोंइशा, ङोन लमा? मेकोपुकी शोर गाक्शो मूर्ति आन नोले खोइक्तेक्म। मिनु मेको यो शोर गाक्शो दुम्तेक्म। मीका ६:३
6 मेकोपुकीमी ‘आंइ कली इजीप्त रागी रे ग्रुंइब परमप्रभु यावे ते बाक्बा? मेकोमी आंइ कली गोरशो रागीम लां कोंइशा गाक्पाइक्तु। मेको मुर मबाक्तीक गोरशो रागी नु शुश खाल्टा बाक्शो रागी बाक्त। ब्वाक्कु मबाक्शो नु छिङछिङ ङा रागी बाक्त। मेको सुइ मगाक्तीक नु सुइ मुर मबाक्तीक रागी बाक्त’ देंतेक्म। ब्यवस्था ८:१५
7 गो इन कली रिम्शो रागीम चाक्तन्नी। मेकेर ङा फल नु रिम्शो थोव़क जपाइक्चा कली चाक्तन्नी। तन्न गेपुकी जाक्शा, आं रागी मरिम्शो सेल्तीनी। आं रागी कली ग्रांग्रा दिशो सेल्तीनी। ब्यवस्था १:२५; न्यायाधीस २:१-२
8 चढ़ेबपुकीम ‘परमप्रभु यावे ते बाक्बा?’ मदेंम। आं अरेशो लोव़ शेंबपुकीम आं कली मतुइक्तीमी। सासन पाइबपुकी आं कली ममिम्थु, हेंथे गाक्तेक्म। आं लोव़ पाइबपुकीम बाल देवता आ नेंम नोले दुम्ब लोव़ पाम्तेक्म। मिनु शोर गाक्शो मूर्ति आन नोले खोइक्तेक्म” देंत।
9 मोपतीके परमप्रभु यावेमी “गो इन कली लेंशा दोस गेचा माल्नुङ। गो इन चच युइ आन कली दोस गेनुङ।
10 कित्तीम माइश्शो साइप्रस ङा समुन्द्र आ नेक्था बाक्ब आन कली कोव़ङीन। केदारमी क्यारी पाइब मुर सोइश्शा कोव़ङीन। मार, मेकेर मोदेंशो गेय दुम्शो बाक्बा?
11 मार, तेकोइ रागी ङा मुरुम आन देवी देवता फाइश्शो बाक्नीमी ङा? मेको परमप्रभु मनम हना यो, मफाइक्नीम। तन्न आं मुरपुकीम आन ठेयब सक्ति पाइश्शो कली शोर गाक्शो मूर्तिपुकी नु फाइक्तेक्म। रोमी १:२३
12 गे सरीङम बाक्बपुकी एको लोव़ नेंशा हिंशा, छक लाक्कीन। मिनु थाम्पा हिंशा थिर थिर पा ख्रिंख्रि पने।
13 मारदे हना आं मुरपुकीम निक्शी खेयप मरिम्शो पाम्तेक्म। मेकोपुकीमी, ब्रोंइतीक ब्वाक्कु बुक्तीके, आं कली प्रोंइतेक्म। मिनु आंम कली सोव़शो रागीमी ब्वाक्कु मदेम्तीक इनार दोम्तेक्म। येरमीया १७:१३; भजन संग्रह ३६:१०; यूहन्ना ७:३८
14 मार, इस्राएल वाइल का बाक्बा? आ होव़प आ खिंम जरमेशो वाइल का बाक्बा ङा? मेको मारदे रोइक्चा पुंइसे?
15 गुप्सपुकी मेको कली तशा ग्रीनीम। ठेयब सेंदा पा ग्रीनीम। मेकोपुकीमी आ रागी कली मुर मबाक्तीके सेल्तेक्म। मेको आ सहर नेल्ल ब्रेत्तेक्म। मिनु मेकेर मुर मबाक्नीम। येरमीया ४:७
16 मेम्फीस नु ताहपनेस ङा मुरपुकीम इन पिया ङा सिरपेच पुइक्तेक्म। येरमीया ४४:१
17 इन कली लां कोंइब, इन परमप्रभु यावे कली प्रोंइशा, गे मोदेंशो श्येत आंमा इन कली मचाक्नी ङा?
18 गे मारदे इजीप्त रागी लाइनीनी? नील खोला ङा ब्वाक्कु तूथ लाइनीनी? गे अस्सुर रागी लनीनु, मार रिम्शो दुम्बा ङा? गे युफ्रेटीस खोला ङा ब्वाक्कु तूथ लाइनीनी?
19 इन परमप्रभु यावे आ अरेशो लोव़ मटितीकेमी इन कली सजाइ गेब। इन प्रोंइशोमी इन कली हुइक्ब। गेपुकीम इन परमप्रभु यावे कली प्रोंइशो थम मरिम्शो नु इन थुं कशो दुम्शो बाक्ब, दे तुइक्तीन। मिनु आं कली मान पा हिंतीके गे नु मबाक्ब” दे परमप्रभु, मुर नेल्ल आन परमप्रभु यावेमी देंत।
20 परमप्रभु यावेमी “साइ ङोंइती रे गे इ जुवा जिक्तीवी। मिनु इ डोरी प्रोइक्तीवी। मिनु गे ‘गो इ गेय मपाइनुङ’ देंते। गे डांडा नु रवा नेल्ल आन पुंम तेल्लेम पाप्तीवी। यसैया ५७:५५; इजीकीएल ६:१३
21 गो इ कली नेल्ल क्येङा रिम्शो अङगुर बोट ख्रुम्ता। गे दोपा मरिम्शो दुम्शा ब्वाकी ङा अङगुर बोट खोदेंशो दुमे? भजन संग्रह ८०:९; यसैया ५:१-४
22 गे इ कली मार, मार, हिक्सी नु शुश साबुनम चिक्साक्वे हना यो, इ दोस ततीके लुम्सीशो आं ङोंइती बाक्ब” दे परमप्रभु, परमप्रभु यावेमी देंत।
23 मिनु “गे ‘गो ग्रांग्रा मदिशो नङ’ दे दोपा देंने चाप्नेवे? ‘गो बाल देवता आ नोले मखोइश्शो बाक्नुङ’ दे गे दोपा देंने चाप्नेवे? गे बेंसीम मार, पवी? मेको मिम्तो। गे थाम्पा एर ओंथ दोरशा गाक्ब दलओंठ बाक्नेवे।
24 गे गोरशो रागीम बाक्चा दाक्ब, फश नाम्शा गाक्ब ब्वाकी ङा गधैनी बाक्नेवे। मेको आ डागो माल्तीके सुम तेक्ने चाप्बा ङा? सु सुमी मेको कली माल्नीमी, मेको मदाइनीम। मारदे हना ब्वांइसीतीक महिनाम मेको कली थित्नीम।
25 इ खोइल शिश्रा मगाक्को। गे तूतू दाक्शा खिं रे मलावो। तन्न गे ‘एको मोशा बाक्ब। मारदे हना गो अर्को रागी ङा देवता आन कली दाक्ताक्ङ। मिनु मेको आन नोले खोइक्नुङ’ देंते।
26 दोपा खुइ ग्याइक्चा पुंइसेनु, मुने दोक्बा, मोपा इस्राएल आ खिं ङा मुरपुकी मुने दोक्नीम। मेकोपुकी, आन पिपी, आन ठेयब मुरपुकी, आन चढ़ेबपुकी नु मेको आन जोल पा परमप्रभु यावे आ लोव़ पाइबपुकी मुने दोक्नीम।
27 मेकोपुकीमी रवा कली ‘गे आं आफ नवे’ मिनु फुल्लु कली ‘गे आं कली जरमेब नवे’ देंनीम। मेकोपुकीमी आं कली आन ची हिरशा कोंइशो बाक्नीम। आन कुल ममाइ। मो हना यो मेको श्येत जामे नाक्ती जाक्शा ‘आंइ कली प्रोंइकी’ देंनीम। येरमीया ७:२४; येरमीया १८:१७; येरमीया ३२:३३
28 तन्न आंम इन सेल्शो देवी देवता ते लाक्गमे? मेकोपुकीमी इन कली प्रोंइने चाप्तेक्म हना, इन श्येत जची ना मेको आन कली जाक्पतीन। मारदे हना यहूदा, गे इ के गिश सहर बाक्मा, मिश देवी देवता बाक्नीम। ब्यवस्था ३२:३७-३८; न्यायाधीस १०:१४; येरमीया ११:१३
29 गेपुकीम मारदे आं कली गन गन पाइनीनी? गे नेल्ल आं कली काइ मटीब दुम्शो बाक्नीनी।
30 गो इन आल आन कली मोशा तुप्तामी। गो मेको आन कली शेंचा दाक्ताक्ङ। तन्न मबिस्सम। इन कली सोइश्शो आं लोव़ पाइब इन तरवारमी साइक्चा पुंइसाक्म। गेपुकी ग्रु दाक्ब गुप्स खोदेंशो बाक्नीनी। यसैया १:५; मत्ती ५:१२; मत्ती २२:६; मत्ती २३:३७; मर्कूस १२:५
31 मिनु गे, मुल ङा पाला ङा मुरपुकी, परमप्रभु यावे आ लोव़ मिम्तीन। मार, गो इस्राएली आन कली मुर मबाक्शो रागी नु थम छिङछिङ ङा रागी दुम्ङा ङा? मारदे आं मुरपुकीम ‘गो आंइ कली हिरचा कली सुइम तेक्ने मचाप्ब। गो इन ङोंइती गेनायो लेंशा मजाक्नीकी’ देंमा?
32 मार, मीश आलम आ सुन चांदी नु ग्युम्लीम आ ग्युंबे पशो दारशो वा प्रेंने चाप्नीमी ङा? तन्न आं मुरपुकीम दा आं कली शुश नाक्ती रे प्रेंताक्यीमी।
33 गे दाक्मुतीक माल्शा गाक्चा कली शुश जोक्ब बाक्नेवे? मिनु गे परमप्रभु यावे आ अरेशो लोव़ मटीब मीश मुर अरु लां शेंशा गाक्पाइक्तीवी।
34 इ फेक्शो वाम दोस मताइब नु प्रुङग आन हुश लुम्सीशो बाक्ब। मिनु गेमी मेको आन कली खिं प्रोल्शा खिं ओव़शो मथिदी। मेको मोदेंशो नेल्ल दुम्ना दुम्न यो, येरमीया २६:२०-२३; प्रस्थान २३:७
35 गे ‘गो दोस मताइब बाक्नुङ। मेको थमा पा गो नु मगाइक्ब’ देंनेवे। मारदे हना गेमी ‘गो पाप मपङ’ देंतीके गो इ कली निसाफ पाइनुङ। यसैया ४३:२५-२६
36 गे इ गाक्तीक लां फाइक्ना फाइक्न एर ओंथ पाइक्नेवे? दोपा अस्सुरम इ कली मुने दोक्पदा। मोपान इजीप्तमी यो इ मुने तोक्ब। २राजा २२:३३-३५; यसैया ३०:३
37 गे मेकेर रे यो हिंचा ङा पा प्रोक्चा माल्नेवे। मारदे हना परमप्रभु यावेमी थमा सुइक्चा कली योव़शो आन कली आ नेक्था मजाक्चा ङा पा तिल्तु। मेको आन वारच पतीके इ कली शोर गाक्शो बाक्ब” दे परमप्रभुम देंत।