3
नाता ख्रोइश्शो
1 मिनु परमप्रभु यावेमी “वोंइश मुरुमी आ मीश कली प्रोंइशा, छोड पत्र गेप्तु हना, मेको मीश मुर अर्को वोंइश मुर आ मीश दुम्त हना, मेको वोंइश मुरुम लेंशा आ मीश कली चाक्बा कों? मो दुम्त हना मेको रागी ग्रांग्रा दिशो मदुम्बा ङा? गे चहिं तेल्लेम का खोदेंशो पा शुश आन बाक्तीके जाक्दीश्शो बाक्ते। मिनु मार, गे आं गे लेश्शा जाक्नेवे?” दे परमप्रभु यावेमी देंत। ब्यवस्था २४:१-४
2 परमप्रभु यावेम “इर कोव़ङो। गोरशो डांडा मेर कोव़ङो। गे सु नु मइमे? गे मुर मबाक्तीके अराब खोदेंशो पा लांमी बाक्शा, गे नु इप्ब मुर आन कली रिम्ना रिम्न बाक्ते। गे इ तेल्लेम पतीके नु आं अरेशो मटितीकेम मेको रागी ग्रांग्रा दिशो सेल्तीवी। होसे ४:१३
3 मोपतीके रेउ मयिशो बाक्त। मिनु बर्खा ङा रेउ मयी। मो हना यो गे मुने मपाइश्शो बाक्नेवे। गे इ मुनेम लल मजिनेवे। येरमीया ३:१९; येरमीया ३१:९; यसैया ६३:१६
4 मार, गे मुल नक आं कली ‘आं आफ, आं ठिटी रे ङा वारच, देंते।
5 मार, मेको गेना हना यो गाइक्स ङा गाइक्स बाक्बा ङा? मार, इन गाइक्चा गेना हना यो बाक्बा ङा?’ दे आं कली ब्रेत्ते। मिनु गे ओदेंशो लोव़ पाइनेवे। तन्न मार मरिम्शो बाक्मे, मेको नेल्ल पाप्तीवी” दे परमप्रभु यावेमी देंत।
थमा मसुइक्ब इस्राएली
6 योसीयाहम सासन पची ना परमप्रभु यावेमी आं कली “थमा सुइक्ने मचाप्ब इस्राएलम मार, पवा, मतवी? मेकोमी डांडा नेल्ल ङोइश्शा, गिगी रवा नेल्ल आन पुंम तेल्लेम पाप्तु। येरमीया २:२०
7 मेकोमी मोदेंशो नेल्ल पा आं गे लेप्ब, दे मिम्ताक्ङ। तन्न मेको मले। मिनु मेको नेल्ले जोल पाइब आ लोक्ब यहूदाम ताप्तु। २कोरिन्थी ७:८-९; इजीकीएल २३:२,४१
8 मेको थमा सुइक्ने मचाप्ब इस्राएल कली आ शुश तेल्लेम पतीके, गो छोड पत्र गेशा, सोइक्ताक्ङ, दे तुइश्शो बाक्त। मो हना यो आ लोक्ब देंखु पशो यहूदामी मेको तशा महिंथु। मेकोमी यो तेल्लेम पाप्तु।
9 इस्राएलमी आ तेल्लेम पतीके थम आइक्च मिम्ताक्व। मेकोमी फुल्लु नु रवापुकी नु यो लशा तेल्लेम पा रागी ग्रांग्रा दिशो सेल्तु।
10 मेको नेल्ल दुम्त हना यो, मेको आ लोक्ब देंखु पशो यहूदा आ थुं नेल्लेमी आं गे मले। आं गे लेश्शो खोदेंशो ला पखु पाप्तु” दे परमप्रभु यावेम देंत।
11 मिनु नोले परमप्रभु यावेमी आं कली “थमा सुइक्ने मचाप्ब इस्राएल, जोल पा मरिम्शो पाइब यहूदा क्येङा ठीक पाइब दुम्त।
12 ‘गे लावो। मिनु एको लोव़ उत्तर गे शेंदीमी। थमा सुइक्ने मचाप्ब इस्राएल, परमप्रभु यावेम लेतो। गो इ कली तशा मगाइक्नुङ। मारदे हना गो शिशी पाइब नङ। गो गेना हना यो मगाइक्नुङ’। प्रस्थान ३४:६;
13 गे ‘गो पापी नङ। गो आं परमप्रभु यावे कली काइ मटीब दुम्ती। मिनु गिगी रवा नेल्ल आन पुंमी अरु देवी देवता आन कली दाक्ताक्ङ’ देंते। मिनु आं देंशो मटिवी। इ पाप शोव़ङो, दे मतो” देंत।
14 मिनु परमप्रभु यावेम मेको आन कली “लेतीन। थमा सुइक्ने मचाप्ब आलपुकी लेतीन। मारदे हना गो इन होव़प नङ। गो सहर रे मुर का कली नु खिं रे मुर निक्शी आस कली योव़नुङमी। मिनु इन कली सियोनम चाक्नन्नी। यसैया ६:१३
15 मिनु गो इन कली आं थुं नु गारब गोठलापुकी गेनुङ। मिनु मेको जोक्ब नु रुप्ब दुम्शा, इन कली थुल्नीम। येरमीया २३:३-४; यसैया ४४:२८; इजीकीएल ३४:२३
16 गे रागीम सोशा बोशा शुश दुम्तीनी हना, मुरपुकीम गेनायो ‘परमप्रभु यावे आ कबल पशो सन्दोस’ मदेंनीम” देंत। मिनु परमप्रभु यावेम “मेकोपुकीमी मेको कली ममिम्नीम। मेको कली सुइमी ममाल्नीम। मेको खोदेंशो लेंशा अर्को यो मसेल्नीम। गन्ती १०:३३-३६; २राजा २५:८-९; हिब्रू ४:१४-१६
17 मेना यरूसलेम कली ‘परमप्रभु यावे आ ठेयब नित्तीके’ देंनीम। मिनु रागी रागी ङा मुर नेल्ल मेकेर देल्नीम। मुर नेल्ल परमप्रभु यावे आ नेक्था यरूसलेमम देल्नीम। मेना रे आन थुं ङा मरिम्शो लोव़ मपाइनीम। प्रस्थान १७:१६; यसैया २:२-४; मत्ती ४:२
18 मेको नाक्ती यहूदा आ खिं ङा मुर, इस्राएल आ खिं ङा मुरपुकी नु गारनीम। मिनु मेकोपुकी कालेम उत्तर रे पा इन किकी पिपी आन कली गेशो रागीम जाक्नीम। यसैया १:१-१३
19 मिनु गो इन कली आंम आल आन दातेमी बाक्चा गेनुङ। गो इन कली रिम्शो रागी का गेनुङ। मेको रागी नेल्ल आन दाते ङा नेल्ल क्येङा दारशो रिम्शो रागी बाक्ब। मिनु गे आं कली ‘आं आफ’ देंनीनी। गे नोले मशोइक्ब दुम्नीनी, दे मिम्ताक्ङ। ब्यवस्था ७:६; ब्यवस्था ३२:६; ब्यवस्था ८:७; येरमीया ३:४
20 तन्न दोपा थमा सुइक्ने मचाप्ब मीश मुरुम आ वोंइश कली प्रोंइबा, मोपा गे थमा सुइक्ने मचाप्ब, इस्राएल, गे आं कली प्रोंइती” दे परमप्रभु यावेम देंत।
21 गोरशो डांडाम वाइ ब्रेश्शो सेंदा का नेंसीब। मेको इस्राएल आ आल आन शुश ङाक्शो सेंदा बाक्ब। मारदे हना मेकोपुकी दूली लांम गाक्शो बाक्तेक्म। मेकोपुकीमी परमप्रभु यावे, आन परमप्रभु कली प्रेंशो बाक्तेक्म। येरमीया ३:२
22 मिनु मेकोमी “थमा सुइक्ने मचाप्ब आलपुकी लेतीन। इन थमा सुइक्ने मचाप्तीके सापाइक्नन्नी” देंत। मिनु मेकोपुकीमी “दुम्ब, गो इन गे लेश्शा, जाक्नीकी। मारदे हना गे परमप्रभु यावे, आंइ परमप्रभु बाक्नीनी।
23 थमा पा, पहाड ङा देवी देवता आन थान जोल बाक्नीम। डांडा मेर ठेयब चाड सेल्तीके नेल्ल जोल बाक्नीम। थमा पा परमप्रभु यावे, आंइ परमप्रभु इस्राएल कली पाप रे प्रोंइब बाक्ब।
24 गोपुकी आंइ ठिटा ठिटी रेन मेको मुने तोक्ब गेयमी आंइ किकी पिपी रे श्येत पा गेय पशो नेल्ल नेक्तु। मेको आन क्यारश भेडा, आन बी ब्यफ नु आन तमी तौ आन कली नेक्तु।
25 मुल गो इं मुनेम ग्रुम्य। मिनु इं दोस ततीकेमी इं कली सुमल। मारदे हना गो परमप्रभु यावे, इं परमप्रभु कली पाप पाइतय। इं किकी पिपी नु गो इं ठिटा ठिटी रेन मुल सम्म परमप्रभु यावे, इं परमप्रभु आ देंशो मटिशो बाक्तय” देंतेक्म। येरमीया १४:७,२०