8
“मारेइ मारेइ मोशा दुम्नीम” देंशो
1 परमप्रभु यावेम “मेना यहूदा ङा पिप आन रुश, सरकार आ गेय पाइब आन रुश, चढ़ेब आन रुश, परमप्रभु यावे आ लोव़ पाइब आन रुश नु यरूसलेममी बाक्ब मुर आन रुश मेको आन तुरस रे याक्नीम।
2 मिनु मेको रुश नेल्ल, नां, तास्ला नु सोरुल आन ङोंइती फ्रचा माल्नीम। मारदे हना मेको मुरपुकीमी मेको आन कली गेय पा शुश दाक्ताक्म। मेको आन नोले खोइक्ब दुम्तेक्म। मेको आन कली लां कोंइब सेल्शा पूजा पाम्तेक्म। मेको रुश आन कली खुप्शा थिम्चा मदुम्ब। मेको खप कली मोव़ल दुम्चा माल्नीम। ब्यवस्था ४:१९
3 एको मरिम्शो खिं ङा लीशो मुर नेल्लेमी, ते प्रोक्पाइक्तामी हना यो, मार देंनीम देंशा हना ‘गो ब्रोंइचा क्येङा यो बेक्चा दाक्नीकी’ देंनीम” दे मुर नेल्ल आन परमप्रभु यावेमी देंत।
पाप कली सजाइ
4 गे मेको आन कली परमप्रभु यावेमी मार देंत, देंशा हना “मुरपुकी गोल्नीमी। मिनु मार, मेको लेंशा मबोक्नीमी ङा? मिनु सुइ लां जाम्शा ग्युरा पेरा गे लमानु, मेकोपुकी लेश्शा मजाक्नीमी ङा?
5 मो हना यो एको मुरपुकी मारदे ची हिरशा गाक्मा? मारदे मेको नोले शोंइसीना सीन बाक्नीमी? आन मरिम्शो पतीके मप्रोंइथु, लेश्शा जाक्ने मबित्नीम।
6 गो, आं नोफा दाइश्शा नेंनुनु, मेकोपुकीम आं कली ठीक लोव़ मपाइनीम। आन मटिशो आ पर्बम माफ मपुंइनीम। मेकोपुकीमी ‘गो मरिम्शो पाता’ मदेंनीम। नेल्ल आन दला दाक्स पाइनीम। मेकोपुकी शारा खोदेंशो पा लडाइम दोरनीम।
7 सरीङम बेरब सारसम आ लची ना नु लेत्ची ना तुइक्ब। मिनु ढुकुर, बेल्लुम नु बोकुला आन लची ना नु लेत्ची ना तुइक्नीम। तन्न आं मुरपुकीमी आंम परमप्रभु यावे आ देंशो पतीक लोव़ मतुइक्नीम। यसैया १:३
8 मिनु गेपुकीम दोपा ‘गो जोक्ब तुइक्ब बाक्नीकी। मिनु परमप्रभु यावे आ अरेशो लोव़ गो नु बाक्ब’ देंने चाप्नीनी? थमा पा देंशा हना, सास्त्री आन जोल पा ब्रेक्शोम मेको आन कली जोल सेल्शो बाक्ब। सास्त्री ब्रेक्चा जोक्ब मुर बाक्नीम
9 जोक्ब तुइक्ब मुरपुकी मुने तोक्चा पुंइसीनीम। मेकोपुकी हिंनीम। मेकोपुकी लाइक्चा पुंइसीनीम। मारदे हना मेकोपुकी परमप्रभु यावे आ लोव़ मटीनीम। मेको आन जोक्तीक तुइक्तीक मार बाक्म माइ?
10 मोपतीके गो मेको आन मीश अरु आन कली नु मेको आन रू लडाइ ग्राब आन कली गेनुङमी। नेल्ल क्येङा आइक्च मुर रे नेल्ल क्येङा ठेयब सम्म ठीक पा मचेम्शो क्येट तचा कली शिंम बाक्नीम। परमप्रभु यावे आ लोव़ पाइब रे चढ़ेब सम्म नेल्ल जोल पाइब दुम्शो बाक्नीम। येरमीया ६:१३-१५; यसैया ५६:११
11 मेकोपुकीमी आं मुर आन कली ममिम्थु, आन गार सापाइक्खु पशो बाक्नीम। मेकोपुकीमी थुं नाइक्तीक मबाक्त हना यो ‘नांइसीन, नांइसीन’ देंनीम।
12 मेकोपुकीमी मुने दोक्चा ङा गेय पाम्तेक्म। ग्रांग्रा दिशो गेय पाम्तेक्म। तन्न मेकोपुकी मुने मदोक्म। मुनेम लल जिचा देंशो मार, बाक्बा, दे मतुइक्तेम। मोपतीके साइक्चा पुंइसीशो आन दातेमी साइक्चा पुंइसीनीम। गो मेको आन कली सजाइ गेनुङ। मिनु मेको खतम दुम्नीम” दे परमप्रभु यावेमी देंत।
13 परमप्रभु यावेम “गो, अङगुर सेक्नुङ देंङानु बोटम अङगुर मबाक्म। फोव़शी रवाम फोव़शी मबाक्म। मेको आन सफा यो सोव़तेक्म। मेकोपुकी आं गेशो यो रोइक्चा पुंइसीनीम” दे परमप्रभु यावेमी देंत।
14 मुरुमी “गो मारदे एकेर निश्शा बाक्या। मुर आन कली पुक्शा, गो गारो हिरशो सहर आ आगा मेर प्रोक्य। मिनु मेकेरेन बेक्य। मारदे हना परमप्रभु इं परमप्रभु यावेम इं कली बेक्पाइक्चा कली सोइश्शो बाक्ब। मिनु इं कली बीस ब्वाइश्शो ब्वाक्कु तूचा गेप्तु। मारदे हना गो परमप्रभु यावे कली पाप पाइतय। येरमीया ९:१४
15 गोपुकीम थुं नाइश्शा बाक्तीक आस पाइतय। तन्न मारेइ रिम्शो मदुम। साचा आ पर्बम रिम्ताक्य। तन्न शुश हिंतीक ला दुम्त” देंतेक्म। येरमीया १४:१९
16 मिनु “दान रे जोरी सत्रु आन शारा आन सोंव सोंव पशो नेंसाक्व। मेको आन शारा आन ग्रीशो आ पर्बम रागी नेल्ल ख्रिंख्रि पाइब। मेकोपुकी रागी नु मेकेर बाक्शो मारेइ मारेइ, सहर नु मेकेर बाक्ब नेल्ल आन कली दाक्चा कली जाक्शो बाक्नीम। येरमीया ४:१५
17 कोव़ङीन, गो इन दातेम बीस पाइश्शो बुस्सपुकी सोइक्नुङमी। मेको बुस्स आन कली मारेइ मन्तर तन्तर मराइब। मिनु मेकोपुकीमी इन कली कोक्नीम” दे परमप्रभु यावेम देंत।
18 मिनु “गो आं ग्येरसीतीक नेल्ल जाम्त। गो आं थुं खाइक्ती। येरमीया ४:१९
19 श्येत जशो आं मुर आन ङाक्शो नेनीन। ङोन रागी रे नेनीन। मार, परमप्रभु यावे सियोनम मबाक्शो बाक्बा ङा? मेको आ पिप मेकेर मबाक्शो बाक्बा? मारदे मेकोपुकीमी आं कली आन मूर्ति नु आन शोर गाक्शो अर्को रागी ङा देवी देवता आन पर्बम गाइक्पाइय्यीमी?
20 बाली नाली रिक्ची ना लाक्तु। बर्खा नुप्त। मो हना यो इं श्येत रे ब्रोंइची ना मजा।
21 आं श्येत जशो मुर आ पर्बम गो रोंका पा थुं खाइक्ती।
22 मिनु गिलादमी मारेइ ख्रेक्तीक मबाक्बा? मार, मेकेर इ कली ओख्ती पाइब मबाक्बा? मारदे आं श्येत जशो मुर मसामा?” देंत। येरमीया ४६:११