9
परमप्रभुमी लोव़ पशो
1 परमप्रभुमी “आं पिया ब्वाक्कु बुक्तीक दुम्शो हना, नु आं मिक्ची प्रेक्कु बुक्तीक दुम्शो हना, गो नाक्दो नाक्ती ङाक्ङ वा। श्येत जशो साइश्शो आं मुर आन पर्बम ङाक्ङ वा। येरमीया १३:१७; लूका १९:४१
2 गोरशो रागीम मुर आन कली बास बाक्तीक बाक्शो हना, गो आं मुर आन कली प्रोंइशा, मेकेर लशा बाक्ङ वा। मिनु मेको आन रे ङोन लङ वा। मारदे हना मेको नेल्ल आन नाता ख्रोइश्शा अरु नु इप्नीम। मेको नेल्ल मरिम्शो हुल का बाक्नीम।
3 मेकोपुकीम जोल पस ला जोक्नीम। मोपा जोल पतीकेमी रागी ङा ठेयब मुर दुम्तेक्म। थमा लोव़ पतीकेमी ममाइ। मेकोपुकी मरिम्शो पशो का रे अर्को मरिम्शो पाइनीम। मिनु आं कली मतुइक्नीम। येरमीया ५:१
4 आंम नेक्था ङा मुरपुकी रे होस पा बाक्कीन। आंम लोक्ब आन कली यो थमा मसुतीन। मारदे हना इन लोक्ब नेल्ल मिक्च सिल्ब बाक्नीम। मिनु इन नेक्था ङा मुरपुकी हिरशा, इन पर्बम जोल पा दोस गेना गेन बाक्नीम। येरमीया १२:६; भजन संग्रह ४१:१०; मीका ७:५-६
5 मेको नेल्लेम आन नेक्था ङा मुर आन कली जोल पाइनीम। सुइमी थमा लोव़ मपाइनीम। मेकोपुकीम जोल पचा शेंसीशो बाक्नीम। मेकोपुकीम मरिम्शो ला पाइनीम।
6 मेकेर दिम्मुतीके नु जोल पमुतीके ला बाक्ब। मेकोपुकीमी आं कली तुइक्चा मदाक्नीम” दे परमप्रभुमी यावे, मुर नेल्ल आन परमप्रभुमी देंत।
7 मोपतीके मुर नेल्ल आन परमप्रभु यावेम “गो मेको आन कली यपाइश्शा नाक्नुङमी। पाप पाइब आं मुर आन कली गो अरु मार पने चाप्नुङा ङा?
8 मेको आन लें बीस पाइश्शो ब्रा खोदेंशो बाक्ब। मेकोपुकीम जोल लोव़ ला पाइनीम। मुर नेल्लेम आन नेक्था ङा मुर नु रिम्शो लोव़ पखु पाइनीम। तन्न आन थुंमी दोपा मेको कली ब्वारद दाइक्चा, दे मिम्नीम। बजन संग्रह १२:३
9 मार, मोदेंशो पशो आ पर्बम गो मेको आन कली सजाइ मगेनुङमी? ओदेंशो रागी ङा मुर आन कली गो सजाइ गेचा माल्नुङ” दे परमप्रभु यावेम देंत। येरमीया ५:९,२९
10 गे डांडा आन पर्बम ङाक्शा रोंका पने। मिनु गोरशो रागी ङा योव़तीक आन पर्बम बिलाना पने। मेको गोरशो सेल्शो बाक्नीम। मेकेर सुइ मगाक्नीम। मिनु मेकेर बी ब्यफ क्यारश भेडा आन ग्रीशो मनेंसीब। सरीङ ङा चिक्ब नु जन्तु नेल्ल प्रोक्शा लाम्तेक्म। येरमीया ४:२५; येरमीया १२:४
11 गो यरूसलेम कली खिं ब्रेश्शा देल्तीके सेल्नुङ। सिवार आन बाक्तीके सेल्नुङ। गो यहूदा ङा सहर आन कली मुर मबाक्तीके सेल्नुङमी। मिनु मेकेर सुइ मबाक्नीम। येरमीया २६:१८
12 मेको लोव़ रुप्चा कली जोक्ब तुइक्ब सु बाक्बा ङा? परमप्रभु यावेम सु कली लोव़ पवा, मेकोमी एको शेंने चाप्ब। मारदे मेको रागीम ब्रेश्शो खिं ला बाक्नीमी? मारदे मेको मुर मबाक्तीके खोदेंशो दुम्शा, सुइ लने मचाप्चा ङा पा, श्येत्थ दुम्शो बाक्बा? लूका १९:४२
13 मारदे हना मेकोपुकीमी आन ङोंइती वोइश्शो आं अरेशो लोव़ प्रोंइतेक्म। आं देंशो मटिथु आन दला दाक्स पाम्तेक्म।
14 मेको आन खकटा थुंमी आन दला दाक्स पा बाल देवता आ नोले खोइक्तेक्म। मेको आन किकी पिपी शेंशो लांम गाक्तेक्म। येरमीया ७:२४
15 मोपतीके परमप्रभु यावे, मुर नेल्ल आन परमप्रभु, इस्राएली आन परमप्रभुमी “गो एको मुर आन कली कशो थोव़क उम्नुङमी। मिनु तूचा कली बीस ब्वाइश्शो ब्वाक्कु तूपाइक्नुङमी। येरमीया २३:१५; येरमीया ८:१४
16 गो मेको आन कली रागी रागी ङा मुर आन दातेमी फ्राइनुङमी। मेकेर आन मतुइश्शो नु आन किकी पिपी आन मतुइश्शो मुर बाक्नीम। मिनु गो मेको आन कली मसदुमी सम्म मेको आन नोनोले तरवार सोइक्नुङ” देंत। लेवी २६:३३
17 मिनु मुर नेल्ल आन परमप्रभु यावेमी “मुल मिम्तीन। रोंका पाइब मीश मुर आन कली ब्रेत्तीन। मेको आन दाते ङा नेल्ल क्येङा रोंका पस जोक्ब कली ब्रेत्थ सोइक्तीन” देंत
18 मेकोपुकीमी “रीब पा जाक्मल। मिनु आंइ पर्बम रोंका पामेक्ल। इं मिक्च नेल्ल प्रेक्कु मदुम सम्म नु इं मिक्च आ पारला रे ब्वाक्कु खोदेंशो पा प्रेक्कु मदोक्म सम्म, मेकोपुकीमी रोंका पामेक्ल।
19 सियोन रे रोंका पशो नेंसाक्व। गोपुकी खतम दुम्तय। गोपुकी मुनेम सुम्सीशो बाक्नय। गोपुकीम आंइ रागी प्रोंइचा माल्नीकी। मारदे हना मेकोपुकीम आंइ खिं प्रेत्तेक्म” देंतेक्म।
20 मिनु गे मीश मुरपुकी परमप्रभु यावे आ लोव़ नेनीन। मेको आ लोव़ नेंचा कली इन नोफा दाइक्तीन। इन तमी आन कली रोंका पचा शेंदीन। आंम नेक्था ङा मुर नु रोंका पतीक शेंमुने।
21 बेक्पाइक्ब झेल रे ङोइश्शा आंइ बाक्तीकेम ओव़त। मेको आंइ आल आन कली लां रे नु आंइ ठिटा आन कली बुक्शा बाक्तीक रे साइक्चा कली जाक्त।
22 परमप्रभु यावेमी “गे मुर आन कली मोदेंशो लोव़ पावो ‘मुर आन बेक्शो रां रूम मोव़ल खोदेंशो पा दोक्नीम। अन्न खुप्ब मुर आन नोले प्रोंइशो अन्न खोदेंशो पा, गोल्शा लीशो बाक्नीम। मिनु मेको आन कली सुइम सिला मपाइनीम’ देनो” देंत। येरमीया ७:३३; येरमीया १४:१६; येरमीया १६:४; येरमीया २५:३३; भजन संग्रह ७९:२
मार आ पर्बम नें बोरपाइक्चा
23 परमप्रभु यावेम “जोक्ब तुइक्ब मुरपुकी आन जोक्तीक तुइक्तीक आ पर्बम ठेयब मलेम्मल। सक्ति पाइश्शो मुरपुकी आन सक्ति आ पर्बम ठेयब मलेम्मल। शुश शोंप पाइश्शो मुरपुकी आन शुश शोंपोम ठेयब मलेम्मल।
24 तन्न सु ठेयब लेत्नीमी, मेकोपुकीम ‘गो परमप्रभु यावे कली तुइक्नुङ’ देंमल ‘मेको थमा पा परमप्रभु यावे बाक्ब, दे तुइक्नुङ, दे नें बोरपाइक्ने चाप्नीम। परमप्रभु यावेमी रागी कली शिशी पाइब, ठीक निसाफ नु ठीक पाइब बाक्ब’ देंमल। मारदे हना मेको आं दाक्शो बाक्ब, दे ग्येरसीनुङ” दे परमप्रभु यावेम देंत। १कोरिन्थी १:३१; २कोरिन्थी १०:१७
चिनु मख्रोइश्शो खोदेंशो दुम्शो
25 परमप्रभु यावेम “रांम ला ख्रोइक्तीक चिनु ख्रोइश्शो मुर आन ग्रुम्तीक नाक्ती थमा पा जाक्ब।
26 गो इजीप्त, यहूदा, एदोम, अम्मोन, मोआब नु गोरशो रागीम बाक्ब, आन चां एर ओंथ ख्रोइक्ब मुर नेल्ल आन कली ग्रुम्नुङ। मारदे हना मेको नेल्ल ख्रोइक्तीक चिनु मख्रोइश्शो बाक्नीम। मिनु इस्राएल आ खिं ङा मुर नेल्ल यो आन थुंम ख्रोइक्तीक चिनु मख्रोइश्शो बाक्नीम” देंत। लेवी १९:२७; येरमीया ४:४; लेवी २६:४१; ब्यवस्था ३०:६