18
लीशो रागीपुकी योक्शो
1 मिनु इस्राएल ङा मुर नेल्ल शिलोमी बुक्तेक्म। मेकेर ग्रुम्तीक ताम्बु कीतेक्म। मेना मेको रागी मेको आन रागी दुम्शो बाक्त। न्यायाधीस २१:१९; १सामुएल १:३; येरमीया ७:१२-१५
2 तन्न इस्राएली ७ थरपुकीमी आंम कली रागी मतशो बाक्तेक्म।
3 मिनु यहोसुमी इस्राएली आन कली “गे परमप्रभु यावे, इन किकी पिपी आन परमप्रभुमी इन कली गेशो रागी आंम के सेल्चा कली मार रिम्नीनी।
4 मुल गेपुकीमी थर थर रे सां सां मुरपुकी योव़ङीन। गो मेको आन कली रागी कोव़थ सोइक्नुङ। मिनु मेकोपुकी लशा, आंम आंम रागी दोदेंशो बाक्मे, मेको ब्रेक्चा माल्नीम। मिनु नोले आं बाक्तीक लेत्चा माल्नीम।
5 मिनु गे मेको रागी कली ७ भाग पा योक्चा माल्नीनी। यहूदा दक्खिन गे आंम रागीमी बाक्ब। योसेफ आ खिं ङा मुर चहिं उत्तर गे मेको आन रागीम बाक्नीम।
6 गेपुकीमी मेको रागी कली ७ भाग पा ब्रेक्स ब्रेक्ने थुम्शा नोले, आं बाक्तीक चाक्कीन। मिनु गो परमप्रभु यावे, इं परमप्रभु आ ङोंइती मेको रागी इन कली योक्शा गेनन्नी।
7 तन्न लेवी आ थर ङा मुरपुकीमी इन दातेमी रागी मताइनीम। मारदे हना परमप्रभु यावे आ चढ़ेब दुम्तीकेन मेको आन भाग बाक्ब। मिनु गाद, रूबेन नु मनस्से आ उइक्थ थरमी यर्दन आ पूर्ब गे आन रागी तशो बाक्तेक्म। मारदे हना परमप्रभु यावे आ गेय पाइब मोसामी मेको आन कली आन रागी गेने थुम्शो बाक्त” देंत। यहोसु १३:१४,३३
8 मिनु मेको मुरपुकी बोक्शा लशा, मेको रागी आ ब्रेक्स ब्रेक्चा गोम्तेक्म। यहोसुमी मेको आन कली दोदेंशो देंमे, मोदेंशो पाम्तेक्म। मिनु ङोंइती यहोसुमी “लने, मेको रागी नेल्ल हिरसीन। मिनु मेको रागी आ ब्रेक्स ब्रेक्शा, आ बाक्तीक चाक्कीन। मिनु गो एक शिलोमी गे इन कली परमप्रभु यावे आ ङोंइती योक्शा गेनन्नी” देंत।
9 मिनु मेकोपुकी लशा, रागी नेल्ल हिरसाक्म। मिनु सहर सहर कोव़शा, मेको रागी ७ भाग सेल्शा ब्रेक्ताक्म। मिनु यहोसु आ बाक्तीके शिलोम लेत्तेक्म।
10 मिनु यहोसुमी शिलोमी परमप्रभु यावे आ ङोंइती इस्राएली थर ङा खिं खिं ङा मुर आन कली मेको रागी योक्शा गेप्तु।
बेन्यामीन आ मुर आन रागी
11 मिनु योव़ङमेनु, बेन्यामीन आ खिं खिं ङा मुरपुकीमी आन रागी ताम्तेक्म। मेको आन रागी यहूदा थर नु योसेफ आस थर निक्शी आन दातेमी बाक्त। उत्पत्ती ४९:२७
12 मेको सांद उत्तर गे यर्दन रे पा लाइश्शा यरीको आ उत्तर ङा देम्सीलो लाक्शा, पच्छिम गे ङा पहाड लाक्शा गोरशो रागी बेथ-आवेन सम्म जाक्दीश्शो बाक्त। यहोसु ७:२
13 मेकेर रे मेको सांद दक्खिन ङा लूज ङा देम्सीलो लाक्शा, अतारोथ-अदार आ आइदी जाक्दीश्शो बाक्त। लूज कली बेथेल यो देंनीम। मेको आ दक्खिन गे जाक्दीश्शा, आइदी बेथ-होरोन आ दक्खिन गे ङा पहाड रे पा लुक्च लशो बाक्त। उत्पत्ती १२:८; उत्पत्ती २८:१९
14 मिनु मेको सांद मेकेर ङा पहाड आ ङोंइती बाक्शो बेथ-होरोन आ दक्खिन पच्छिम रे पा दक्खिन गे हिरशो बाक्त। मिनु किरयथ-बाल सम्म जाक्दीश्शो बाक्त। किरयथ-बाल कली किरयथ-यारीम यो देंनीम। मेको यहूदा आ थर ङा मुर आन सहर बाक्त। मेको पच्छिम गे बाक्ब। यहोसु १५:६-९,६०
15 दक्खिन गे ङा सांद चहिं किरयथ-यारीम आ एर ओंथ ङा पच्छिम गे बाक्त। मिनु मेको सांद एफ्रोन रे नेप्तोआह आ ब्वाक्कु बुक्तीकेमी जाक्दीश्शो बाक्त। यहोसु १५:९
16 नोले मेको सांद बेन-हिन्नोम दिंम आ ङोंइती ङा डांडा आ पुं रे लाइब। मेको रेफाइम आन दिंम ङा उत्तर गे बाक्ब। मेको सांद हिन्नोम दिंम गे लशा, यबुसी आन सहर आ दक्खिन ङा देम्सीलो रे पा लुक्च लशा एन-रोगेलमी तोइश्शो बाक्त।
17 मिनु उत्तर गे लशा, एन-शेमेश लाक्शा, अदुम्मीम आ ङोंइती बाक्शो गेलीलोत रे रूबेन आ तौ बोहान आ फुल्लु सम्म जाक्दीश्शो बाक्त।
18 मेकेर रे पा लाक्शा बेथ-अराबाह आ उत्तर ङा देम्सीलो रे अराबाह रागीम जाक्दीश्शा नुप्शो बाक्त। यहोसु १५:६३; न्यायाधीस १:२१
19 मेको सांद बेथ-होग्ला आ उत्तर ङा देम्सीलो लाक्शा यर्दन आ दक्खिन गे बाक्शो हिक्सी समुन्द्र आ उत्तर ङा ओव़तीक सम्म लशो बाक्त। मेको दक्खिन गे ङा सांद बाक्ब।
20 मिनु यर्दन खोला मेको आ पूर्ब ङा सांद बाक्ब। बेन्यामीन आ खिं खिं ङा मुर आन रागी ङा सांद नेल्ल एकोन बाक्नीम।
21 बेन्यामीन आ खिं खिं ङा मुरपुकीमी तेको तेको सहर ताम्तेक्म देंशा हना, यरीको, बेथ-होग्ला, एमेक-केसीस,
22 बेथ-अराबाह, सेमाराइम, बेथेल,
23 आव्वीम, पारा, ओफ्रा,
24 केफार-अम्मोनी, ओप्नी, गेबा मेको आन के बाक्तीक नेल्ल पा १२ ओटा सहर नु मेको आन गाउंपुकी बाक्तेक्म।
25 गिबोन, रामाह, बेयरोथ,
26 मिस्पा, केफीरा, मोचाह,
27 रेकेम, इरपेल, तरालाह,
28 जेला, हा-एलेफ, यबुसी आन सहर, मेको कली यरूसलेम यो देंनीम, गिबा नु किरयथ-यारीम बाक्नीम। मेको आन के बाक्तीक नेल्ल पा १४ ओटा सहर नु आन गाउंपुकी बाक्तेक्म। मेको बेन्यामीन आन खिं खिं ङा मुर आन रागी बाक्ब।