10
शेबा ङा पिपीम जाक्शो
२इतिहास ९:१-१२
1 शेबा ङा पिपीममी सोलोमन आ रिम्शो पशो नेल्ल, परमप्रभु यावे आ ठेयब नें नु आ पशो नेल्ल नेना बाक्त। मिनु लोव़ लेन्ने मचाप्चा ङा लोव़ कुरशा सोलोमन कली नाक्चा कली जाक्माक्त। मत्ती १२:४२; १राजा ५:१४
2 मेको शुश मुर नु शुश मस्ला, सुन नु शुश क्येट लाइब हीरा दलओंठम कुरपाइश्शा यरूसलेम जाक्माक्त। मिनु आ थुंम बाक्शो लोव़ नेल्ल सोलोमन कली देंमाक्त।
3 मिनु सोलोमनम मेको आ हिल्लो पशो लोव़ नेल्ल लेत्ता बाक्त। मेको हिल्लो पशो लोव़ लेत्चा कली पिप कली मारेइ श्येत मदुम्माक्त।
4 मिनु शेबा ङा पिपीममी सोलोमन आ जोक्तीक तुइक्तीक नेल्ले, मेको आ सेल्शो पिप आ खिं,
5 मेको आ जचा थोव़क, मेको आ एर ओंथ बाक्ब आ ठेयब गेय पाइब आन बाक्तीके, आ गेय पाइब आन गेय पशो, मेको आन फेक्शो वा, आ ग्योंबपुकी, परमप्रभु यावे आ खिंम चोशा चढ़ेतीकपुकी तशा, शुश छक लाक्माक्त।
6 मिनु मेकोमी पिप कली “गो आं रागीमी इन गेय नु जोक्तीक तुइक्तीक आ पर्बम लोव़ नेंता।
7 तन्न गो आंमा जाक्शा, मतङा सम्म थमा मसुदु। मेको आं कली नेंशो दा उइक्थ लाइ यो मनेंशो बाक्ती। इन जोक्तीक तुइक्तीक, इन पशो गेय नु इन शोंप आ पर्बम आं नेंशो क्येङा यो शुश बाक्त।
8 इन मीशपुकी नु इन गेय पाइबपुकीमी गेना हना यो इन जोक्शो तुइश्शो लोव़ नेंशा ग्येरसीशो बाक्नीमी।
9 मिनु परमप्रभु यावे, इन परमप्रभु ठेयब बाक्ब। मेकोमी इन कली दाक्शा इस्राएल कली सासन पचा कली पिप सेल्तु। परमप्रभु यावेमी इस्राएली आन कली गेना हना यो दाक्ताक्व। मोपतीके मेकोमी इन कली ठीक निसाफ पचा नु ठीक पचा कली मेको आन पिप सेल्शो बाक्त” देंमाक्त। १राजा ५:२१
10 मिनु नोले मेकोमी पिप कली सहे का २० टलेन्ट सुन, शुश मस्लापुकी नु शुश क्येट लाइब हीरापुकी गेवा बाक्त। शेबा ङा पिपीममी सोलोमन कली गेशो खोदेंशो पा शुश मस्ला ङोंइती सुइम मचाक्गमे बाक्त। टलेन्ट का ३४ किलो बाक्ब।
11 मेको नेल्ल प्रोंइशा यो हीराम आ जहाजपुकीम ओफीर रे सुन चाक्बाक्मा बाक्त। मेकोपुकीमी जहाजम सिरी खन्ड के शुश क्येट लाइब शी नु हीरापुकी चाक्बाक्मा बाक्त। १राजा ९:२७-२८
12 मिनु पिपमी मेको सिरी खन्ड के शी रे परमप्रभु यावे आ खिं नु आ बाक्तीके खिं कली क्रेसी ङा ग्याइक्तीक सेल्पदा बाक्त। मिनु कुम्सो पाइब आन कली बीना नु तार पाइश्शो ताप्तीक यो मेको शी के सेल्पदा बाक्त। मेको मोदेंशो पा सिरी खन्ड के शी गेना यो मचाक्शो बाक्मा बाक्त। मिनु मेना रे मुल सम्म यो गेनायो मतांइसीशो बाक्ब।
13 मिनु पिप सोलोमनम शेबा ङा पिपीम कली आ गेशो प्रोंइशा यो आ दाक्शा पुंइशो थोव़क नेल्ल गेवा बाक्त। मेको नोले मेको आ गेय पाइब नेल्ल लाइश्शा आ रागी लेम्माक्त।
सोलोमन आ शोंप
२इतिहास ९:१३-२८
14 सोलोमन आ बाक्तीकेम बर्स बर्सम जाक्शो सुन सहे सां ६६ टलेन्ट दुम्बाक्माक्त। टलेन्ट का ३४ किलो बाक्ब।
15 मेको प्रोंइशा, ग्याप्ब लेयब आन चाक्शो, अराब रागी ङा पिपपुकी नु अर्को रागी ङा सासन पाइबपुकी रे यो सुन जाक्बाक्माक्त।
16 मिनु पिप सोलोमनम तुप्शा सेल्शो सुन के सहे निक्शी ठेयब तेक्तीक सेल्पदा बाक्त। मेको का सेल्चा कली ६ सहे शेकेल सुन माल्दा बाक्त। शेकेल का ११.५ ग्राम खोदेंशो बाक्ब। १राजा १४:२६
17 मेकोमी तुप्शो सुन के सहे सां आइक्च आइक्च तेक्तीक यो सेल्पदा बाक्त। मेको का सेल्चा कली सहे सां शेकेल सुन माल्दा बाक्त। मिनु पिपमी मेको नेल्ल लेबानोन ङा ब्वाकी माइश्शो खिंम वोइक्पाइक्मी बाक्त। १राजा ७:२
18 मिनु पिपम हात्ती आ दारा के ठेयब नित्तीक का सेल्शा, मेको कली क्येख सुनमी गिल्पदा बाक्त।
19 मेको नित्तीक तार ङोइक्तीक ६ ओटा थेंका बाक्मा बाक्त। मेको नित्तीक आ नोले गे कुल कुल पा सेल्शो बाक्माक्त। मेको नित्तीक आ निम्फा गे गुइ वोइक्तीक पाइश्शो बाक्माक्त। मेको गुइ वोइक्तीक आस नेक्था गुप्स निक्शी सेल्शो बाक्माक्त।
20 मेको ६ ओटा थेंका नेल्लेम एर गे का, ओंथ गे का पा १२ ओटा गुप्स बाक्मा बाक्त। मेको मोदेंशो नित्तीके तेकोइ राज्य ङा पिप आन पर्बम मसेल्शो बाक्माक्त।
21 पिप सोलोमन आ तूतीक कचौरा नेल्ल सुन के बाक्मा बाक्त। मिनु लेबानोन ङा ब्वाकी माइश्शो पिप आ खिंम बाक्शो ग्योंब नेल्ले क्येख सुन के बाक्मा बाक्त। चांदी के मारेइ मबाक्मा बाक्त। मारदे हना सोलोमन आ पालाम चांदी मारेइ खोदेंशो मबाक्माक्त।
22 मिनु पिप नु हीराम आस जहाजपुकी टारसीस गे लाइबाक्मा बाक्त। मिनु बर्स सां सांमी मेको जहाजम काले टारसीस रे सुन, चांदी, हात्ती आन ख्रुइ, बुदी नु मजुर चाक्शा, जाक्बाक्मा बाक्त।
23 मोपा सोलोमन आ शोंप नु आ जोक्तीक तुइक्तीकेमी पिप नेल्ल आन क्येङा ठेयब दुम्माक्त।
24 रागी नेल्ल ङा मुरपुकी परमप्रभुम सोलोमन कली गेशो जोक्शो तुइश्शो लोव़ नेंचा कली जाक्बाक्मा बाक्त।
25 मेको मोपा जाक्ब नेल्लेमी बर्स बर्सम कोसेली सुन चांदी के मार मार, फेक्तीक वा, यापुकी, मस्ला, शारा नु खच्चर चाक्बाक्मा बाक्त।
26 सोलोमनम शुश बग्गी नु शारा तेल्मी बाक्त। मेको के १४ सहे बग्गी नु १२ हजार शारा बाक्मा बाक्त। मेकोमी बग्गी आन कली बग्गी वोइक्तीक सहरम वोदा बाक्त। का निक्शी आन कली चहिं आं नुन यरूसलेमम वोइक्मी बाक्त। १राजा ५:६
27 पिपमी यरूसलेमम चांदी फुल्लु खोदेंशो पा तेल्मी बाक्त। मिनु लेबानोन ङा लाइश्शो रवा आ शी चहिं शेफेलाह ङा फोव़शी रवा खोदेंशो पा शुश तेल्मी बाक्त।
28 सोलोमन आ शारा इजीप्त नु क्युए रे ग्याप्शा चाक्शो बाक्मा बाक्त।
29 मेकोपुकीम इजीप्त रे ६ सहे शेकेल चांदीम बग्गी नु सहे का ५० शेकेल चांदीम शारा ग्याप्बाक्मा बाक्त। मिनु पिप आ ग्याप्ब लेयबपुकीम हित्ती आन पिप नु अराम ङा पिप नेल्ल आन कली लेयबाक्मा बाक्त। शेकेल का ११.५ ग्राम, तोला का खोदेंशो बाक्ब।