9
परमप्रभुमी लोव़ पशो
२इतिहास ७:११-२२
1 मिनु सोलोमनम परमप्रभु यावे आ खिं, पिप आ खिं नु आ सेल्चा दाक्शो मारेइ मारेइ नेल्ल सेल्ने थुमा बाक्त।
2 मेना परमप्रभु यावेम सोलोमन कली गिबोनम लोव़ पशो खोदेंशो पा लेंशा लोव़ पवा बाक्त। १राजा ३:५
3 मिनु परमप्रभु यावेमी मेको कली “गो इ आं ङोंइती पशो प्रार्थना नु इ पुंइशो लोव़ नेंता। गो एको इ सेल्शो खिं कली आं के सेल्ता। मिनु गो गेना हना यो एकेर बाक्नुङ। आं थुं एकेर बाक्शा, गो एको खिं कली गेना हना यो कोव़नुङ। १राजा ८:२९
4 मिनु गे चहिं ब्रेम्शो दुम्शा, इ आफ दाऊद खोदेंशो पा आं ङोंइती गेना हना यो रिम्शो पाइब नु रिम्शो थुं पाइश्शो दुम्ते हना, आं इ कली शेंशो नेल्ल पना पन, आं फुल्लुम मुशा ब्रेक्शो लोव़ नु आं निसाफ पतीक लोव़ नेल्ल पाप्तीवी हना,
5 गो इ राज्य इस्राएल कली गेना हना यो बोल्यो दुम्पाइक्नुङ। मिनु गो इ आफ दाऊद कली ‘इ तौ चच रे गेना हना यो इस्राएलम पिप दुम्नीम’ दे कबल पशो खोदेंशो पा गे नु यो कबल पाइनुङ। २सामुएल ७:१२; येरमीया ३३:१७
6 तन्न गे नु इ आलपुकी आं नोले खोइक्चा प्रोंइशा, गो इन ङोंइती वोइश्शो आं शेंशो नु आं फुल्लुम मुशा ब्रेक्शो लोव़ मपाइतीनी हना नु देवी देवता आन कली पूजा पाइतीनी हना,
7 गो इस्राएली आन कली आं गेशो रागी रे खेरनुङमी। मिनु एको आं कली सेल्शो खिं कली प्रोंइशा मकोव़नुङ। मिनु इस्राएली चहिं मुर नेल्ल आन दातेमी मुने दोक्शा, ग्रांग्रा दित्तीक दुम्नीम। ब्यवस्था ४:२६; ब्यवस्था ८:१९-२०; मत्ती २३:३८
8 एको खिं ब्रेश्शा, फुल्लु देल्शो दुम्ब। मिनु नोले एकेर गाक्ब मुर नेल्ल छक लाक्नीम। मिनु मुरपुकीमी मेको तशा ‘मारदे परमप्रभु यावेमी एको खिं नु एको रागी कली ओं पवा, माइ?’ दे शुक्शी पाइनीम।
9 मिनु मुरपुकीमी ‘मेकोपुकीमी परमप्रभु यावे, आन परमप्रभुम मेको आन किकी पिपी आन कली इजीप्त रागी रे ग्रुंइशा चाक्तु हना यो, मेको कली प्रोंइशा, देवी देवता आन कली मानेशा, पूजा पाम्तेक्म। मोपतीके परमप्रभु यावेमी मेको आन कली मोदेंशो श्येत गेप्तु’ देंनीम” देंमाक्त।
सोलोमन नु हीराम
२इतिहास ८:७-११
10 सोलोमन कली परमप्रभु यावे आ खिं नु आ बाक्तीक खिं सेल्चा कली २० बर्स माल्दा बाक्त। १राजा ६:३८; १राजा ७:१
11 टायर ङा पिप हीराममी सोलोमन कली माल्शो लेबानोन ङा लाइश्शो रवा आ शी, अरु शी, सुन नु आ माल्शो नेल्ल गेशो बाक्माक्त। मोपतीके पिप सोलोमनमी हीराम कली गालील रागी ङा २० ओटा सहर गेवा बाक्त। २इतिहास ८:२
12 मिनु हीरामम टायर रे मेको सोलोमन आ गेशो सहरपुकी कोव़थ लमाक्त। मिनु मेकोम मेको सहर मदाक्ता बाक्त।
13 मिनु मेकोमी सोलोमन कली “आं लोक्ब, मेको इ गेशो सहरपुकी दा दोकका देंशो बाक्तेक्मे” देंमाक्त। मिनु मेकोम मेको सहर आन कली “काबुल रागी” देंशो नें वोदा बाक्त। मेको सहर आन नें मुल सम्म मेकोन बाक्नीम।
14 मिनु हीराममी पिप सोलोमन कली सहे का २० टलेन्ट सुन सोइक्ता बाक्त। टलेन्ट का ३४ किलो बाक्ब।
सोलोमन आ गेय पाइब
15 पिप सोलोमनम पपाइश्शो गेय मार मार बाक्त देंशा हना, परमप्रभु यावे आ खिं, आ बाक्तीक खिं, मिल्लो माइश्शो बोल्यो दरवार, यरूसलेम ङा गारो, हासोर, मेगीददो नु गेजेर सहर सेल्पदा बाक्त।
16 इजीप्त ङा पिप फाराओम गेजेर सहर कली लडाइ तोशा ग्राशा, मेकेर मी सुइश्शो बाक्माक्त। मेकोम मेकेर बाक्ब कनानी आन कली साइश्शा, मेको सहर आ तमी, सोलोमन आ मीश कली दाइजो गेशो बाक्माक्त। यहोसु १६:१०; १राजा ३:१
17 मिनु सोलोमनम गेजेर सहर, बेथ-होरोन,
18 बालाथ नु मेको गोरशो रागी ङा तामार नु आ एर ओंथ ङा रागी,
19 सोलोमन आ मार मार वोइक्तीक सहरपुकी, आ बग्गी नु शारा वोइक्तीके नु शारा ङोइक्ब आन कली बाक्चा कली सहरपुकी यो सेल्पदा बाक्त। सोलोमनमी यरूसलेम, लेबानोन नु आ सासन पशो राज्य नेल्लेमी मार सेल्चा दाक्शो बाक्मे, मेको सेल्ने थुमा बाक्त। १राजा १०:२६
20 मिनु लीशो एमोरी, हित्ती, परिज्जी, हिव्वी नु यबुसी चहिं इस्राएली आन थर ङा मुर मबाक्मा बाक्त।
21 इस्राएलीपुकीमी मेको रागीम लीशो मेको आन चच युइ आन कली काइ मवोइक्थु साइक्ने मचाप्शो बाक्मा बाक्त। सोलोमनमी मेको आन कली गेय पाइब वाइल सेल्शा वोइक्मी बाक्त। मेको मुल सम्म मोपान बाक्शो बाक्नीम। यहोसु १६:१०
22 तन्न सोलोमनम इस्राएली सुइ आन कली वाइलीम वाइल मसेल्मी बाक्त। मेकोपुकी चहिं लडाइ पाइब, लडाइ पाइब आन ठेयब मुर, कप्तान, बग्गी चलेब आन ठेयब मुर नु शारा ङोइक्ब सेल्मी बाक्त।
23 मिनु सोलोमन आ ठेयब गेय पाइब ५ सहे ५० जना बाक्मा बाक्त। मेकोपुकी गेय पाइब आन कली कोव़ब बाक्मा बाक्त।
24 मिनु फाराओ आ तमी दाऊद आ सहर रे पिप सोलोमनम सेल्शा गेशो आंम खिंम लमाक्त। सोलोमनमी मिल्लो माइश्शो बोल्यो दरवार यो सेल्पदा बाक्त।
25 मिनु सोलोमनमी परमप्रभु यावे कली सेल्शो चढ़ेतीकेमी बर्सम खेयप सां परमप्रभु यावे आ ङोंइती चोशा चढ़ेतीक नु दुशा बाक्चा आ पर्बम चढ़ेतीक चढ़ेशा धूप यो चोशा चढ़ेवा बाक्त। मोपा मेकोम परमप्रभु यावे आ खिं ङा गेय नेल्ल पवा बाक्त।
सोलोमनम जहाज सेल्पाइश्शो
26 मिनु पिप सोलोमनम लल समुन्द्र आ शुंइच एदोम रागी एलोथ आ नेक्था एस्योन-गेबेर सहरम जहाजपुकी यो सेल्पदा बाक्त। गन्ती ३३:३५; २इतिहास ८:१७-१८
27 हीराममी समुन्द्र आ पर्बम तुइक्ब नु जहाजम गेय पाइब मुर सोलोमन आ गेय पाइबपुकी नु गेय पपाइक्चा कली सोइक्तीमी बाक्त। १राजा १०:११
28 मिनु मेकोपुकी जहाजम ओफीर लमा बाक्त। मिनु मेकेर रे ४ सहे २० टलेन्ट सुन चाक्ग्मे बाक्त। मिनु मेको पिप सोलोमन कली गेमे बाक्त। उत्पत्ती १०:२९