17
इस्राएल ङा पिप होशेआ
1 एलाह आ तौ होशेआ सामरीयाम इस्राएल ङा पिप दुम्माक्त। मेना यहूदा ङा पिप आहाज पिप दुम्शो १२ बर्स दुम्शो बाक्माक्त। मिनु होशेआम ९ बर्स सासन पवा बाक्त। २राजा १८:९-१२; २राजा १५:३०
2 मेकोम परमप्रभु यावे आ ङोंइती मार मरिम्शो बाक्मे, मेको पवा बाक्त। तन्न आ ङोंइती ङा इस्राएल ङा पिप आन पशो खोदेंशो चहिं मपवा बाक्त।
3 मिनु अस्सुर ङा पिप शाल्मानेसेर होशेआ कली लडाइ तोथ जाक्माक्त। मिनु होशेआमी मेको कली तिरो थाप्चा माल्दा बाक्त।
4 तन्न अस्सुर ङा पिपमी होशेआम आ कली मटिशो तवा बाक्त। मारदे हना मेकोमी इजीप्त ङा पिप सो कली लोव़ कुरब मुर सोइश्शो तुइक्ता बाक्त। मिनु बर्स बर्सम गेतीक तिरो यो अस्सुर ङा पिप कली मथाप्ता बाक्त। मोपतीके अस्सुर ङा पिपमी मेको कली ग्याइश्शा जेल्खानम चोक्गा बाक्त। होसे १२:२
5 मिनु अस्सुर ङा पिपम रागी नेल्ल आन कली लडाइ तोशा, सामरीया जाक्माक्त। मिनु मेको कली लडाइ तोशा, बर्स सां सम्म पुम्दा बाक्त। यसैया २८:२
6 अस्सुर ङा पिपमी होशेआम सासन पशो ९ बर्स दुम्मेनु, सामरीया कली ग्रामाक्त। मेकोमी इस्राएल ङा मुर आन कली ग्याइश्शा अस्सुर लाइक्मी बाक्त। मिनु मेको आन कली हालाह सहर नु गोजान ङा खोला हाबोर आ नेक्था नु मादी आन सहरम वोइक्मी बाक्त।
इस्राएली ग्याइक्चा पुंइसीशो
7 मारदे मोदेंशो दुम्शो बाक्त देंशा हना, परमप्रभु यावे, आन परमप्रभुम मेको आन कली इजीप्त रागी ङा पिप फाराओ आ गुइ रे ग्रुंइशा चाक्गा रे इस्राएलीपुकीम देवी देवता आन कली पूजा पशो बाक्मा बाक्त।
8 मेकोपुकीम परमप्रभु यावेमी आन ङोंइती ग्रुंइशो रागी रागी ङा मुर आन पतीके पशो बाक्मा बाक्त। इस्राएल ङा पिप आन पशो मरिम्शो गेय नेल्ल पशो बाक्मा बाक्त। मेकोपुकीमी परमप्रभु यावे कली मटिशो बाक्मा बाक्त। २राजा १६:३
9 इस्राएल ङा मुरपुकीम परमप्रभु यावे, आन परमप्रभु आ ङोंइती ख्रुइश्शा मरिम्शो पशो बाक्मा बाक्त। खाल पतीक लाइश्शो खिं रे सहर नेल्लेम आंम कली थान सेल्मे बाक्त।
10 मेकोपुकीम डांडा नेल्ल नु शुश गिग रवा आन पुंमी ख्रुक्शो फुल्लु नु मूर्ति पाइश्शो थामपुकी सेल्मे बाक्त। २राजा १६:४; १राजा १४:२३
11 मेकोपुकीम परमप्रभु यावेमी मेको आन ङोंइती रे ग्रुंइशो रागी रागी ङा मुर खोदेंशो पा डांडा ङा थानम धूप चोव़मे बाक्त। मेकोपुकीम परमप्रभु यावे आ अरेशो काइ मटिथु, गाइक्पदमे बाक्त।
12 मेकोपुकीमी मूर्ति पूजा पामे बाक्त। ङोंइती परमप्रभु यावेमी “मोदेंशो पचा मदुम्ब” देंशो बाक्माक्त।
13 मो हना यो परमप्रभु यावेमी आ लोव़ पाइब नु आ कोंइतीक ताइब नेल्ल रे पा इस्राएल नु यहूदा ङा मुर आन कली “गे इन मरिम्शो लां रे लेतीन। आं शेंशो, आं फुल्लुम मुशा ब्रेक्शो लोव़ नु इन किकी पिपी आन कली गेशा आं अरेशो नेल्ल पने” दे आ गेय पाइबपुकीमी मेको आन कली थाम्पा हिंच कोंइपदा बाक्त।
14 तन्न मेकोपुकीम आन थमा मसुइक्ब किकी पिपी खोदेंशो पा परमप्रभु यावे आ लोव़ मनेंथु, काइ मटीमे बाक्त।
15 मेकोपुकीम मेको आ फुल्लुम मुशा ब्रेक्शो लोव़, मेको आन किकी पिपी नु पशो कबल नु हिंच कोंइशो ममिम्तमे बाक्त। मेकोपुकी शोर गाक्शो मूर्ति आन नोले खोइश्शा, आंमा यो शोर गाक्शो दुम्शो बाक्मा बाक्त। मेको आन एर ओंथ बाक्ब रागी रागी ङा मुर आन नोले खोदमे बाक्त। परमप्रभु यावेमी मेको आन कली “गे मेको आन पशो खोदेंशो मपने” देंशा, अरेशो बाक्माक्त। प्रस्थान २३:२४
16 मेकोपुकीम परमप्रभु यावे, आन परमप्रभु आ शेंशो मटिथु, आंम कली यपाइश्शा बाछा निक्शी नु मूर्ति पाइश्शो थाम का सेल्समा बाक्त। मेकोपुकी नां, तास्ला नु सोरुल आन ङोंइती बाम्मा बाक्त। मिनु बाल देवता कली पूजा पामे बाक्त। १राजा १२:२८; १राजा १६:३३
17 मेकोपुकीम आंम तमी तौ आन कली क्योरशा चोशा चढ़ेमे बाक्त। मिनु लिंक्यु कोव़शा, मन्तर तन्तर पामे बाक्त। मिनु परमप्रभु यावे आ ङोंइती मार मरिम्शो बाक्मे, मेको पना पन बाक्मा बाक्त। मिनु मेको कली गाइक्पदमे बाक्त। लेवी १८:२१
18 मोपतीके परमप्रभु यावे इस्राएल आ पर्बम थाम्पा गाइक्ता बाक्त। मिनु मेको आन कली आ ङोंइती रे खेरमी बाक्त। यहूदा आ थर ङा मुर ला प्रोंइशा वोइक्चा पुंइसमा बाक्त।
19 मिनु यहूदा आ मुरपुकीम यो परमप्रभु यावे, आन परमप्रभु आ शेंशो लोव़ मटीमे बाक्त। मेकोपुकीम इस्राएली आन पशो पामे बाक्त।
20 मोपतीके परमप्रभु यावेम इस्राएल आ चच युइ नेल्ल आन कली प्रोंइमी बाक्त। मिनु मेको आन कली सजाइ गेशा, रोइक्ब आन गुइमी गेमी बाक्त। आ ङोंइती रे मखेरा सम्म मो पवा बाक्त।
21 मेकोमी “इस्राएली आन कली दाऊद आ खिं रे तिल्नुङ” दे नेबात आ तौ येरोबाम कली पिप सेल्पदा बाक्त। मिनु येरोबामम इस्राएली आन कली परमप्रभु यावे कली प्रोंइपाइश्शा, ठेयब पाप पपाइक्मी बाक्त। १राजा १२:२०
22 मिनु इस्राएलीपुकीम येरोबाम आ पपाइश्शो पाप नेल्ल पामे बाक्त। मिनु मेको मप्रोन्मे बाक्त।
23 परमप्रभु यावेमी आ गेय पा, आ लोव़ पाइबपुकी रे ङोंइती देंशो खोदेंशो पा इस्राएली आन कली आ ङोंइती रे खेरमी बाक्त। मोपतीके इस्राएलीपुकी आंम आन रागी रे अस्सुर रागीम ग्याइश्शा लाइक्चा पुंइसमा बाक्त। मिनु मुल सम्म मेक उइ बाक्शो बाक्नीमी। ब्यवस्था २८:६३-६४
सामरीयाम अर्को रागी ङा मुर वोइश्शो
24 मेको नोले अस्सुर ङा पिपमी बेबीलोन, कूथाह, अव्वा, हमाथ नु सेफारवाइम रे मुरपुकी चाक्मी बाक्त। मिनु मेको आन कली इस्राएली आन पा ङा सामरीया ङा सहरपुकीम बाक्पाइक्मी बाक्त। मेकोपुकी सामरीया आंम के सेल्शा मेकेर बाक्मा बाक्त।
25 मिनु ङोंइती मेकोपुकी मेकेर बाक्मानु, परमप्रभु यावे कली ममानेमे बाक्त। मोपतीके परमप्रभु यावेमी मेको आन दातेमी गुप्स सोइक्तीमी बाक्त। मिनु मेको गुप्सपुकीम कोइ कोइ आन कली सदमे बाक्त। होसे १३:८
26 मिनु मेकोपुकीमी अस्सुर ङा पिप कली “गे इन सोइश्शो रागी रागी ङा मुर सामरीया ङा सहरम बाक्नीम। मेकोपुकीमी मेको रागी ङा परमप्रभु आ अरेशो मतुइक्नीम। मोपतीके परमप्रभुम मेको आन दातेमी गुप्स सोइक्ताक्व। मारदे हना मेकोपुकी मेको रागी ङा परमप्रभु कली मतुइक्तीके ठेयब सेल्स मजोक्तीके, मेको गुप्समी मुर आन कली साइक्तेक्म” दे लोव़ कुरब मुर सोइक्तमे बाक्त।
27 मिनु अस्सुर ङा पिपमी “सामरीया रे ग्याइश्शा लाइश्शो अस्सुर रागीम चाक्शो तेकोइ चढ़ेब का मेक बाक्चा कली लेश्शा सोइक्तमेक्ल। मिनु मेकोमी मेको रागी ङा परमप्रभु आ अरेशो लोव़ मुर आन कली शेंचा माल्ब” दे अरेवा बाक्त।
28 मोपतीके ङोंइती सामरीया रे ग्याइश्शा लाइश्शो चढ़ेब का बेथेलम लेश्शा जाक्शा, मेकेर बाक्माक्त। मिनु मेकोमी मुर आन कली परमप्रभु यावे कली दोपा ठेयब सेल्चा माल्नीमी मेको शेंदीमी बाक्त।
29 मो हना यो रागी रागी ङा मुरपुकीम आंम आन बाक्तीके सहर सहरम आन देवी देवता सेल्शा, मेको डांडा ङा थानम वोदमे बाक्त। मोपा आन बाक्शो सहर नेल्लेमी सामरीया ङा मुर आन सेल्शो डांडा ङा थान यो बाक्मा बाक्त।
30 बेबीलोन ङा मुरपुकीम आन देवता सुक्कोथ-बेनोथ सेल्मे बाक्त। कूथ ङा मुरपुकीम नेरगल सेल्मे बाक्त। हमाथ ङा मुरपुकीम अशीमा सेल्मे बाक्त।
31 अव्वा सहर ङा मुरपुकीम निभाज नु तारतक सेल्मे बाक्त। मिनु सेफारवाइम ङा मुरपुकीमी आन आल आन कली आन देवता अद्राम्मेलेक नु अनाम्मेलेक आस कली चोशा चढ़ेमे बाक्त। २राजा १७:३१
32 मेकोपुकीम परमप्रभु यावे कली यो ठेयब सेल्मे बाक्त। मिनु डांडा ङा थानमी अरु मुर आन कली चढ़ेब सेल्मे बाक्त। मेकोपुकीमी डांडा ङा थानपुकीम मुर आन पर्बम चढ़ेमे बाक्त। १राजा १२:३१
33 मिनु मोपा मेकोपुकीम परमप्रभु यावे कली ठेयब सेल्शा, आंम आन देवी देवता आन कली यो पूजा पामे बाक्त। तेको रागी रे चाक्शो बाक्मा, मेको आन देवी देवता आन पतीक पशा, पूजा पामे बाक्त।
34 मेकोपुकीमी मुलाक्त सम्म मोदेंशो पना पन बाक्नीम। मिनु मेकोपुकीमी परमप्रभु यावे कली मान पा महिंनीम। मेको आ फुल्लुम मुशा ब्रेक्शो लोव़, आ निसाफ पतीक लोव़, आ अरेशो नु आ शेंशो मपामे बाक्त। परमप्रभु यावेमी मोदेंशो पचा माल्नीनी, दे इस्राएल माइश्शो याकूब आ आल आन कली अरेशो बाक्माक्त। उत्पत्ती ३२:२९
35 परमप्रभु यावेमी इस्राएली नु कबल का पवा बाक्त। मिनु मेकोमी इस्राएली आन कली “गेपुकीम देवी देवता आन कली ममानेन। मेको आन ङोंइती मबपीन। मेको आन गेय मपने। मेको आन कली मारेइ मचढ़ेन। प्रस्थान २३:२४
36 मिनु आ सक्ति नु आ क्युक्शो गुइम इन कली इजीप्त रे ग्रुंइशा एक चाक्ब परमप्रभु यावे कली ला ठेयब सेलीन। मेको आ ङोंइती ला बाप्पीन। मेको कली ला चढ़ेचा माल्नीनी” देंमाक्त।
37 मेकोमी इन कली “आं फुल्लुम मुशा ब्रेक्शो लोव़ नु आं पतीके लोव़, आं अरेशो नु आं शेंशो लोव़ नेल्ल शुश होस पा गेना हना यो पचा माल्नीनी। गेपुकीमी देवी देवता आन कली मानेचा मदुम्नीनी।
38 गेपुकीम गो नु पशो कबल मप्रेंदीन। मिनु देवी देवता आन कली मानेचा मदुम्नीनी।
39 तन्न गेपुकीम परमप्रभु यावे, इन परमप्रभु कली ला ठेयब सेलीन। मेकोमी इन कली इन जोरी सत्रु आन गुइ रे प्रोंइब” दे अरेशो बाक्माक्त। ब्यवस्था ६:१२-१९
40 मो हना यो मेकोपुकीम मेको लोव़ मनेन्मे बाक्त। मिनु मेको आन ङोंइती ङा पशो खोदेंशो पामे बाक्त।
41 मेको रागी रागी ङा मुरपुकीमी परमप्रभु यावे कली ठेयब सेल्शा यो आन मुशा सेल्शो मूर्ति आन कली पूजा पामे बाक्त। मुल सम्म आन चच युइमी आन किकी पिपीम पशो खोदेंशो पना पन बाक्नीम।