18
यहूदा ङा पिप हिज्‍कीयाह
२इतिहास २९:-३१:-
आहाज आ तौ हिज्‍कीयाह यहूदा ङा पिप दुम्‍माक्‍त। मेना एलाह आ तौ होशेआ इस्राएल ङा पिप दुम्‍शो बर्स सां दुम्‍शो बाक्‍माक्‍त। २राजा १६:२० मिनु हिज्‍कीयाह पिप दुम्‍मेनु, २५ बर्स दुम्‍शो बाक्‍माक्‍त। मेकोमी यरूसलेमम २९ बर्स सासन पवा बाक्‍त। मेको आ ममा आ नें आबी बाक्‍माक्‍त। मेको जकरिया आ तमी बाक्‍माक्‍त। मेकोम आ किकी दाऊदम खोदेंशो पा, परमप्रभु यावे आ ङोंइती मार रिम्‍शो बाक्‍मे, मेको पवा बाक्‍त। २राजा २०:३ मेकोम डांडा ङा थानपुकी प्रेश्‍शा, ताइक्‍तीमी बाक्‍त। ख्रुक्‍शो फुल्‍लु जिक्‍शा, मूर्ति पाइश्‍शो थाम क्‍योरशा ताइक्‍तीमी बाक्‍त। मेकोमी मोसा आ सेल्‍शो कांसा के बुस्‍स कली टुक्रा टुक्रा पवा बाक्‍त। मारदे हना मेना सम्‍म इस्राएलीपुकीम मेको कली धूप चोइबाक्‍मा बाक्‍त। मेकोपुकीम मेको कली नहुश्‍तन देंबाक्‍मा बाक्‍त। २राजा १५:३५; गन्‍ती २१:८-९ हिज्‍कीयाहम परमप्रभु यावे, इस्राएली आन परमप्रभु कली थमा सुदा बाक्‍त। मेको आ क्‍येङा ङोंइती ङा नु आ क्‍येङा नोले ङा यहूदा ङा पिप नेल्‍ले मेको खोदेंशो मदुम्‍मा बाक्‍त। २राजा २३:२५ मेकोमी परमप्रभु यावे आ नोले खोइक्‍चा गेनायो मप्रोना बाक्‍त। मिनु परमप्रभु यावेमी मोसा कली शेंशो लोव़ नेल्‍ल टिवा बाक्‍त। मिनु परमप्रभु यावे मेको नु बाक्‍माक्‍त। मेको आ पशो गेय नेल्‍लेमी रिम्‍शो दुम्‍माक्‍त। मेको अस्‍सुर ङा पिप कली मटीब दुम्‍माक्‍त। मिनु मेको आ देंशो मपवा बाक्‍त। मेकोमी पलिस्‍ती आन रागी गाजा रे खाल पाइब आन लाइश्‍शो खिं नु गारो हिरशो सहर नेल्‍ल ग्रामाक्‍त।
सामरीया खतम दुम्‍शो
हिज्‍कीयाहमी सासन पशो ४ बर्स दुम्‍माक्‍त। इस्राएल ङा पिप एलाह आ तौ होशेआम सासन पशो ७ बर्स दुम्‍मेनु, अस्‍सुर ङा पिप शाल्‍मानेसेरमी सामरीया कली लडाइ तोशा पुम्‍दा बाक्‍त। २राजा १७:३-६ 10 मिनु अस्‍सुरीपुकीमी मेको सहर कली बर्स सां सम्‍म पुम्‍शा, आन के सेल्‍मे बाक्‍त। मेना हिज्‍कीयाह पिप दुम्‍शो ६ बर्स नु इस्राएल ङा पिप होशेआ पिप दुम्‍शो ९ बर्स दुम्‍शो बाक्‍माक्‍त। मिनु अस्‍सुर ङा पिपमी सामरीया ग्रामाक्‍त। 11 मिनु मेकोमी इस्राएली आन कली ग्‍याइश्‍शा अस्‍सुर लाइक्‍मी बाक्‍त। मिनु मेको आन कली हालाह, गोजान ङा खोला हाबोर आ नेक्‍था नु मादी आन सहरम बाक्‍पाइक्‍मी बाक्‍त। 12 मारदे हना मेकोपुकीमी परमप्रभु यावे, आन परमप्रभु आ देंशो मटिथु, आ कबल पशो हेंथे पशो बाक्‍मा बाक्‍त। परमप्रभु यावे आ गेय पाइब मोसामी शेंशो लोव़ मनेंशो नु मटिशो बाक्‍मा बाक्‍त।
यरूसलेम कली लडाइ तोशो
२इतिहास ३२:१-१९; यसैया ३६:-
13 पिप हिज्‍कीयाहमी सासन पशो १४ बर्स दुम्‍मेनु, अस्‍सुर ङा पिप सन्‍हेरीबमी यहूदा ङा गारो हिरशो सहर नेल्‍ल कली लडाइ तोशा ग्रामाक्‍त। 14 मोपतीके यहूदा ङा पिप हिज्‍कीयाहमी लाकीश सहरम बाक्‍ब अस्‍सुर ङा पिप कली “गो मरिम्‍शो पाता। आं रागी रे लेतीन। मिनु गे आं कली मार देंनीनी, मेको पाइ‍नुङ” दे लोव़ कुरब मुर सोइक्‍ता बाक्‍त। मिनु अस्‍सुर ङा पिपम हिज्‍कीयाह कली सहे सां टलेन्‍ट चांदी नु ३० टलेन्‍ट सुन थाप्‍पदा बाक्‍त। टलेन्‍ट का ३४ किलो बाक्‍ब। 15 मिनु हिज्‍कीयाहमी परमप्रभु यावे आ खिं नु पिप आ खिंम थिश्‍शो चांदी नेल्‍ल मेको कली गेवा बाक्‍त। २राजा १६:८ 16 मेना हिज्‍कीयाहमी परमप्रभु यावे आ खिं ङा लाप्‍चो नु लाप्‍चो ङा शीम आंम आ गिल्‍शो सुन नेल्‍ल शोल्‍शा, अस्‍सुर ङा पिप कली गेवा बाक्‍त।
सन्‍हेरीबम हिंच कोंइशो
17 मिनु अस्‍सुर ङा पिपम लडाइ पाइब आन नेल्‍ल क्‍येङा ठेयब मुर तारतान, दरवार ङा ठेयब मुर राब्‍सारीस, पिप आ ठेयब गेय पाइब राब्‍शाके नु ठेयब हुल का लडाइ पाइब आन कली लाकीश रे पिप हिज्‍कीयाह आ बाक्‍तीक यरूसलेम सहरम सोइक्‍तीमी बाक्‍त। मिनु मेकोपुकी यरूसलेम जाक्‍मा बाक्‍त। मिनु आइक्‍था दोम्‍ली ङा ब्‍वाक्‍कु शाइक्‍तीक वा मुरब आन लांमी जाक्‍शा राम्‍मा बाक्‍त। यसैया ७:३ 18 मिनु मेकोपुकीम पिप कली ब्रेत्‍मे बाक्‍त। मिनु पिप आ खिं ङा ठेयब मुर हिल्‍कीयाह आ तौ दरवार कोव़ब एल्‍याकीम, ब्रेक्‍ब शेब्‍ना नु आसाफ आ तौ पिप आ लोव़ कुरब योआह मेको आन कली ग्रुम्‍थ जाक्‍मा बाक्‍त।
19 मिनु राब्‍शाकेमी मेको आन कली “हिज्‍कीयाह कली, ठेयब पिप, अस्‍सुर ङा पिपमी, मार देंब देंशा हना, गे सु कली तशा, महिंब बाक्‍नीनी? 20 गे लोव़ पा ला लडाइ ग्रानीनी ङा? सुम इन कली वारच पा आं क्‍येङा महिंथु, आं कली मटि‍पदा? 21 गे इजीप्‍त रागीम इन कली वारच पाइब, दे मिम्‍नीनी। मेको जिक्‍शो किन्‍दा खोदेंशो बाक्‍ब। मेकोमी ‘वारच पाइब’ देंब आन गुइ थोक्‍ब। ‘मेकोमी वारच पाइब’ देंब नेल्‍ल आन कली इजीप्‍त ङा पिप फाराओ मोदेंशोन बाक्‍ब। 22 तन्‍न गे आं कली ‘गो परमप्रभु यावे, आंइ परमप्रभु आ मुर नकी। मेकोम आंइ कली वारच पाइब’ देंतीनी हना, मार, हिज्‍कीयाहम मेको डांडा ङा थान नु चढ़ेतीक प्रेश्‍शा यहूदा नु यरूसलेम सहर ङा मुर आन कली ‘गेपुकीम यरूसलेमम बाक्‍शो चढ़ेतीकेम ला चढ़ेचा माल्‍नीनी’ मदेंम ङा? ब्‍यवस्‍था १२:१४ 23 मुल आं होव़प अस्‍सुर ङा पिप नु गारीन। इन के मिश ङा शारा ङोइक्‍ब बाक्‍‍तेक्‍म हना, गो इन कली हजार निक्‍शी शारा गेनन्‍नी। 24 आं होव़प आ नेल्‍ल क्‍येङा आइक्‍च लडाइ पाइब आन ठेयब मुर का कली ला यो दोपा नोले शोइक्‍पाइक्‍ने चाप्‍नीनी ङा? गे बग्‍गी नु शारा ङोइक्‍ब आन पर्बम इजीप्‍त कली थमा सुइश्‍शो बाक्‍नीनी। 25 मिनु अर्को लोव़, मार गो एको रागीम परमप्रभु यावे नु सल्‍ला मपथु खतम पोक्‍थ जाक्‍ङा ङा? परमप्रभु यावेमी आं कली ‘एको रागीम लडाइ पा खतम पोक्‍को’ देंशो बाक्‍ब” देंमाक्‍त।
26 मिनु हिल्‍कीयाह आ तौ एल्‍याकीम, शेब्‍ना नु योआहमी मेको लडाइ पाइब आन ठेयब मुर राब्शाके कली “शिशी पा, इन वाइल गोपुकी नु अरामी लोव़म ब्‍वाक्‍कीन। मारदे हना गो मेको लोव़ रुप्‍नीकी। गारोम बाक्‍ब मुर नेल्‍लेम नेंचा ङा पा यहूदी लोव़म मब्‍वाक्‍कीन” देंमा बाक्‍त। 27 तन्‍न राब्‍शाकेम मेको आन कली “मार, आं होव़पमी एको लोव़ इन कली नु इन होव़प कली ला नेंपाइक्‍चा कली सोइश्‍शो बाक्‍बा ङा? मार, गारोम बाक्‍ब मुर नेल्‍ल आन कली यो ममाइ ङा? गेपुकीम खोदेंशो पा, मेकोपुकीम यो आन ख्री चारनाक जचा तूचा माल्‍नीम” देंमाक्‍त।
28 मिनु मेको लडाइ पाइब आन ठेयब मुर राब्‍शाके राप्‍शा यहूदी लोव़मी ठेयब सेंदा पा “ठेयब पिप, अस्‍सुर ङा पिप आ लोव़ नेनीन। 29 मेकोमी मार देंत देंशा हना ‘हिज्‍कीयाहमी इन कली जोल पशो थमा मसुतीन। मारदे हना मेकोमी इन कली आं गुइ रे प्रोंइने मचाप्‍ब’ देंत। 30 हिज्‍कीयाहमी ‘परमप्रभु यावेम थमा पा इं कली श्‍येत रे प्रोंइब। मिनु एको सहर अस्‍सुर ङा पिप आ गुइम मदुम्‍ब’ दे इन कली परमप्रभु यावे कली थमा मसुइक्‍पदल। 31 हिज्‍कीयाह आ लोव़ मनेनीन। अस्‍सुर ङा पिपम ‘गो नु गारीन। मिनु ग्रूशा आं बाक्‍तीक जाक्‍कीन। मिनु गेपुकीमी इन अङगुर रू ङा अङगुर नु इन रवा ङा फोव़शी जचा ताइनीनी। इन इनार ङा ब्‍वाक्‍कु तूचा ताइनीनी। १राजा ५:५ 32 गो जाक्‍शा इन कली आंम इन रागी खोदेंशो रागीम लाइक्‍नन्‍नी। मेको रागी अन्‍न नु अङगुर शांबु, शोब्‍ले नु अङगुर रू, तेल रवा नु खुदो बाक्‍शो रागी बाक्‍ब। गेपुकी बेक्‍तीक आ पा ङा ब्रोंइतीक योव़ङीन। हिज्‍कीयाह आ लोव़ मनेनीन, मेकोम इन कली “परमप्रभु यावेमी इं कली प्रोंइब” दे जोल पाइब। 33 मार रागी रागी ङा तेकोइ देवी देवताम आन रागी कली अस्‍सुर ङा पिप आ गुइ रे प्रोंइने चाप्‍शो बाक्‍नीमी ङा? यसैया १०:१०-११ 34 हमाथ नु अरपाद ङा देवी देवता ते लाक्‍गमे? सेफारवाइम, हेना नु इव्‍वाह ङा देवी देवता ते बाक्‍मा? मार, मेकोपुकीम सामरीया कली आं गुइ रे प्रोंइने चाप्‍मे ङा? 35 मार, मेको रागी ङा देवी देवता आन दाते ङा तेकोइमी आ रागी कली आं गुइ रे प्रोंइने चबा ङा? मिनु परमप्रभु यावेमी यरूसलेम कली आं गुइ रे दोपा प्रोंइने चाप्‍बा ङा?’ ” दे इस्राएली आन कली देंमाक्‍त। दानीएल ३:१५
36 तन्‍न मुर नेल्‍ल सिक्‍सी पा बाक्‍शा, लोव़ का यो मलेत्‍मे बाक्‍त। मारदे हना पिपमी मेको आन कली “सुइम लोव़ मलेत्‍चा” दे अरेशो बाक्‍माक्‍त। 37 मिनु पिप, हिल्‍कीयाह आ तौ दरवार कोव़ब एल्‍याकीम, ब्रेक्‍ब शेब्‍ना नु आसाफ आ तौ पिप आ लोव़ कुरब योआहम आन वा खाक्‍गमे बाक्‍त। मिनु हिज्‍कीयाह आ बाक्‍तीक जाक्‍शा, राब्‍शाके आ लोव़ नेंपदमे बाक्‍त।