19
हिज्कीयाहम परमप्रभु नु लोव़ पशो
२इतिहास ३२:२०-२३; यसैया ३७:१-७
1 मिनु पिप हिज्कीयाहम मेको लोव़ नेंशा, आ वा खाक्गा बाक्त। मिनु अरन्डी फेक्शा, परमप्रभु यावे आ खिं लमाक्त।
2 मेकोमी दरवार कोव़ब एल्याकीम, ब्रेक्ब शेब्ना नु ठेयब चढ़ेब आन कली अरन्डी फेक्पाइश्शा, परमप्रभु यावे आ लोव़ पाइब आमोज आ तौ यसैया आ बाक्तीकेम सोइक्तीमी बाक्त।
3 मिनु मेकोपुकीमी यसैया कली “हिज्कीयाहमी ‘मुलाक्ती श्येत जतीक, हुइक्चा पुंइसीतीक नु मुने दोक्तीक नाक्त बाक्ब। दोपा आल थिचा चिक्शो मीश मुर कली आल थिचा कली बोल मबाक्बा, मोदेंशो दुम्शो बाक्ब।
4 परमप्रभु यावे, इन परमप्रभुमी अस्सुर ङा पिपमी सोइश्शो मेको राब्शाके आ लोव़ नेल्ल नेंना माइ। आ होव़प, अस्सुर ङा पिपमी ब्रोंइशा बाक्शो परमप्रभु कली शुक्शी पथ सोइश्शो बाक्ब। मिनु परमप्रभु यावे, इन परमप्रभुमी आ नेंशो लोव़ आ पर्बम मेको कली हुइक्बा कों। मोपतीके मुल लीशो मुर आन पर्बम प्रार्थना पने’ देंत” देंमा बाक्त। १सामुएल १७:१०; २राजा १८:३५
5 मिनु पिप हिज्कीयाह आ सोइश्शो गेय पाइबपुकी यसैया आ बाक्तीकेम बाक्मानु,
6 यसैयामी मेको आन कली “परमप्रभु यावेमी इन होव़प कली ‘इ नेंशो लोव़म महिनो। अस्सुर ङा पिप आ गेय पाइबपुकीमी आं कली शुक्शी पशो लोव़ नेंता।
7 गो मेको आ थुंम सोक्त का कुर पाइनुङ। मिनु मेकोमी लोव़ का नेंब। मिनु मेको आ रागी लेश्शा लाइब। मेकेर गो मेको कली तरवारम साइक्पाइक्नुङ’ देंत, दे मतीन” दे माइक्मी बाक्त। २राजा १९:९; २राजा १९:३५-३७
8 मिनु राब्शाकेमी “अस्सुर ङा पिपमी लाकीश प्रोंइतु” देंशो लोव़ नेना बाक्त। मिनु मेको लेम्माक्त। मिनु मेकोमी पिप कली लिब्ना नु लडाइ पना पन बाक्शो थिदा बाक्त।
9 मिनु मेको पिपमी “एथीयोपीया ङा पिप तिरहाकाह गे नु लडाइ पचा कली पिना पिन बाक्ब” देंशो लोव़ नेना बाक्त। मोपतीके मेकोमी यहूदा ङा पिप हिज्कीयाह आ बाक्तीकेम लोव़ कुरब मुर सोइश्शा,
10 यहूदा ङा पिप हिज्कीयाह कली “यरूसलेम अस्सुर ङा पिप आ गुइम मदुम्ब, दे थोक्शा लोव़ पाइब इ थमा सुइश्शो परमप्रभुमी इ कली जोल मपवल।
11 अस्सुर ङा पिपमी रागी नेल्ल आन कली मार पवा, मेको आन कली दोपा खतम पोक्गा, मेको थमा पा नेंतीनी। मिनु मार, ‘गो ब्रोंइनुङ’ दे आस पाइनीनी?
12 मार, आं किकी पिपी आन क्याम्शो रागी रागी ङा देवी देवताम मेको आन कली प्रोंइने चाप्ने ङा? गोजान, हारान, रेचेफ नु तेलास्सार सहरम बाक्ब एदेन ङा मुर आन देवी देवता ते लाक्गमे?
13 हमाथ, अरपाद सेफारवाइम सहर, हेना नु इव्वाह ङा पिप ते लाक्गमे?” देंपाइक्चा कली मुर सोइक्ता बाक्त।
हिज्कीयाह आ पुंइशो लोव़
14 मिनु हिज्कीयाह मेको चिठी चाक्ब मुर आन गुइ रे ताक्शा पढेवा बाक्त। मिनु परमप्रभु यावे आ खिं लमाक्त। मिनु मेको परमप्रभु यावे आ ङोंइती प्राक्शा वोदा बाक्त।
15 मिनु हिज्कीयाहम मेको परमप्रभु यावे आ ङोंइती प्राक्शा वोइश्शा “परमप्रभु यावे, इस्राएली आन परमप्रभु गे करूब आन तार बाक्नीनी। रागी ङा राज्य नेल्लेम गे का ला परमप्रभु बाक्नीनी। गे रागी नु सरीङ सेल्ब बाक्नीनी। प्रस्थान २५:२२; भजन संग्रह ८०:२
16 परमप्रभु यावे आं लोव़ नेनीन। परमप्रभु यावे कोव़ङीन, सन्हेरीबम ब्रोंइशा बाक्शो परमप्रभु, इन कली शुक्शी पा सोइश्शो लोव़ नेनीन।
17 परमप्रभु यावे, अस्सुर ङा पिपपुकीम रागी रागी ङा मुर नु आन रागी कली खतम पोक्तेक्म। एको थमा बाक्ब।
18 मेकोपुकीमी मेको आन देवी देवता आन कली मीम हुम्शा नेक्पाइक्तेक्म। मारदे हना मेको परमप्रभु मनम। मेको मुरुमी सेल्शो शी नु फुल्लु के ला बाक्तेक्म। मोपतीके मेको खतम दुम्तेक्म।
19 मुल परमप्रभु यावे, आंइ परमप्रभु आंइ कली मेको आ गुइ रे प्रोनीन, दे पुंइनुङ। मिनु रागी नेल्ल ङा मुरपुकीम परमप्रभु यावे, गे का ला परमप्रभु बाक्नीनी, दे तुइक्तमेक्ल” दे पुना बाक्त।
यसैयामी सन्हेरीब खतम दुम्ब देंशो
20 मिनु आमोज आ तौ यसैयाम हिज्कीयाह कली “परमप्रभु यावे, इस्राएली आन परमप्रभुमी मार देंत देंशा हना ‘गो अस्सुर ङा पिप सन्हेरीब आ पर्बम इ पुंइशो लोव़ नेंता’ देंत।
21 सन्हेरीब आ पर्बम परमप्रभु यावे आ देंशो लोव़ मार बाक्ब देंशा हना ‘सियोन ङा तमीमी इ कली शुक्शी पाइब। मिनु गे प्रोक्शा लवेनु, यरूसलेम ङा तमीमी आ पिया हिक्ब।
22 गे सु कली शाक्शा शुक्शी पवी? गे सुका आ पर्बम ठेयब लेश्शा लोव़ पवी? मेको इस्राएली आन का ला बाक्शो परमप्रभु यावे आ पर्बम बाक्ब।
23 गे इ लोव़ कुरबपुकी सोइश्शा, परमप्रभु यावे कली शुक्शी पाप्तीवी’। मिनु गे ‘गो आं शुश बग्गीम ठेयब पहाड ङोंइसाक्यी। गो लेबानोन ङा नेल्ल क्येङा ङोन ङोंइसाक्यी। गो मेकेर ङा नेल्ल क्येङा लाइश्शो रवा नु मेकेर ङा नेल्ल क्येङा रिम्शो अरु रवा तिम्तामी। गो मेको आ सुर सम्म ङा नेल्ल क्येङा ठेयब ब्वाकीम जाक्दीत्ती।
24 गो इनार दोशा, अर्को रागी ङा ब्वाक्कु तूता। गो आं खोइलीम दिम्शा इजीप्त रागी ङा खोला नेल्ल सोव़पाइक्तामी’ देंशो बाक्नेवे।
25 गे ‘गो साइ ङोंइती रे मेको नेल्ल देंशो नङ। गो मेको साइ रे मो पाइनुङ देंशो नङ। मुल गो मेको थुम्ता। मार, मेको मनेंशो बाक्नीनी? गे गारो हिरशो सहर आन कली प्रेश्शा, फुल्लु तेल्शो खोदेंशो सेल्शो बाक्नेवे।
26 मिनु मेको सहर ङा मुर आन सोक्त जाम्शा आन थुं लुक्च लत। मेकोपुकी रू ङा कल्लो घांस खोदेंशो दुम्तेक्म। मेकोपुकी खिं तार वाशो घांस खोदेंशो दुम्शा, वामा चोटीन सोव़शो बाक्नीम।
27 गो इ बाक्शो बोक्शो नेल्ल तुइक्नुङ। गो इ लाङगा खिंङगा पशो नेल्ल तुइक्नुङ। मिनु आं पर्बम इ गाइश्शो तुइक्नुङ।
28 मारदे हना गेम आं पर्बम गाइश्शा, इ ठेयब लेश्शो लोव़ पशो नेंता। मोपतीके गो इ नेंमी आं बोल्सी ब्वेक्नुङ। इ शोव़मी लगम पाइक्नुङ। मिनु गो इ जाक्शो लां रेन लेप्पाइक्नन’ दे परमप्रभु यावेमी सन्हेरीब आ पर्बम देंत” देंमाक्त।
29 मिनु लेंशा “मेको नेल्ल थमा दुम्ब, दे मार चिन्ड दुम्ब देंशा हना, गेपुकी एको बर्स आंमा वाशो जाइनीनी। मिनु नोले ङा बर्स मेको रे वाशो जाइनीनी। मिनु बर्स सांमी गेपुकीम शोक्शा खुप्शा जने, अङगुर ख्रुम्शा जने।
30 मिनु यहूदा आ खिं ङा ब्रोंइशा लीशोपुकीम रागीम शाक्श थोक्नीम। मिनु रागी तार फल सित्नीम।
31 मारदे हना यरूसलेम रे लीशो मुरपुकी लाइनीम। सियोन डांडा रे हुल का ब्रोंइशो मुर ग्रूशा जाक्नीम। मुर नेल्ल आन परमप्रभु यावेमी आ जोंब बोक्शा मेको पाइब” देंमाक्त। यसैया ९:६
32 मिनु परमप्रभु यावेमी अस्सुर ङा पिप आ पर्बम “सन्हेरीब एको सहरम मओव़ब। एको सहरम ब्रा का यो मआप्ब। मेको आ तेक्तीक कुरशा एको सहर आ ङोंइती मजाक्ब। सहर ओव़चा कली गारो ङोइक्तीक मसेल्ब।
33 मेको आ जाक्शो लां रेन लेश्शा लाइब। मेको सहरम मओव़ब।
34 मारदे हना गो आंम आं पर्बम नु आं गेय पाइब दाऊद आ पर्बम मेको सहर कली वारच पा प्रोंइनुङ” देंमाक्त। २राजा २०:६
35 मिनु मेको नाक्दो परमप्रभु यावे आ स्वर्ग ङा गेय पाइब का जाक्माक्त। मिनु मेकोमी अस्सुर ङा पिप आ लडाइ पाइब आन बाक्तीकेम ओव़शा, लाख का ८५ हजार मुर आन कली साइक्मी बाक्त। मिनु आ दीसा सुनी मुरपुकी बोक्मानु मेकेर बेक्शो मुर ला तामे बाक्त। यसैया ३७:३६-३८
36 मोपतीके अस्सुर ङा पिप सन्हेरीब ताम्बु पोक्शा लेश्शा आ खिं निनवे लमाक्त।
37 मिनु मेको काबु आ देवता निस्रोक आ खिंमी पूजा पना पन बाक्मेनु, मेको आ तौ अद्राम्मेलेक नु शरेसेरमी मेको कली तरवारम क्योरशा सदसे बाक्त। मिनु प्रोक्शा आरारात रागी लसा बाक्त। मिनु मेको आ पा ङा आ तौ एसर-हददोन पिप दुम्माक्त। २राजा १९:७