18
ग्रांग्रा दितीक गेय मपने
1 मिनु परमप्रभु यावेमी मोसा कली
2 “गे इस्राएली आन कली ‘गो परमप्रभु यावे, इन परमप्रभु नङ।
3 गेपुकी इजीप्त रागीम पशो खोदेंशो मपने। मिनु गो इन कली कनान रागी लाइक्नन्नी। गेपुकीमी मेक ङा मुर आन पशो खोदेंशो मपने। प्रस्थान २३:२४
4 गेपुकीमी आं पावो, दे अरेशो लोव़ नु आं फुल्लुम मुशा ब्रेक्शो लोव़ पचा माल्नीनी। मारदे हना गो परमप्रभु यावे, इन परमप्रभु नङ।
5 सुमी आं फुल्लुम मुशा ब्रेक्शो लोव़ नु आं पावो, दे अरेशो लोव़ पाइबा, मेको ब्रोंइचा ताइब। मारदे हना गो परमप्रभु यावे नङ। नेहेम्याह ९:२९; इजीकीएल २०:११; रोमी ७:१०; रोमी १०:५; गलाती ३:१२
6 गेपुकी सुइ आंम नेक्था ङा नाता नु मइपीन। मारदे हना गो परमप्रभु यावे नङ।
7 इन ममा नु इप्शा इन आफ कली मुने मतोक्कीन। इन ममा नु इप्चा मदुम्ब।
8 गे इ आफ आ अरु मीश नु मइपो। मो पाइतीनी हना, गेपुकीमी इन आफ कली मुने तोक्नीनी। उत्पत्ती ३५:२२; ब्यवस्था २७:२०; २सामुएल १६:२२; १कोरिन्थी ५:१
9 गे इ दिदी, बहिनी नु मइपो। इ आफ आ तमी बाक्त हना यो, इ ममा आ तमी बाक्त हना यो नु आंम खिंम जरमेशो बाक्त हना यो अर्को रागीम जरमेशो बाक्त हना यो, मेको नु इप्चा मदुम्ब।
10 मिनु तौ आ तमी बाक्त हना यो, इ तमी आ तमी बाक्त हना यो, इ चच बाक्त हना यो मेको नु मइपो। मो पाप्तीवी हना, गे आंमा मुने दोक्नेवे।
11 गे इ आफ आ अरु मीश आ तमी नु मइपो। मेको इन समी बाक्ब।
12 गे इन फुपु नु मइपो। मेको इन आफ आ समी बाक्ब। प्रस्थान ६:२०
13 गे इ ममा आ लोक्ब नु मइपो। मेको इन ममा आ नाता बाक्नीम।
14 इन बोडमा नु आमा कान्छी नु मइपो। मेको इन बोडमा नु आमा कान्छी बाक्नीम।
15 गे इ चाइमी नु मइपो। मेको इ तौ आ मीश बाक्ब। गे मेको नु इप्चा मदुम्ब।
16 गे इ भोग्यु, बोहारी नु मइपो। मोपा इ लोक्ब कली मुने मतोक्को। लेवी २०:२१; मर्कूस ६:१८
17 गे मीश मुर का नु आ तमी निम्फा नु मइपो। मिनु मेको आ तौ आ तमी नु आ तमी आ तमी, चच नु मइपो। मेकोपुकी नेक्था ङा नाता बाक्नीम। मो पचा मरिम्शो बाक्ब।
18 गे इ मीश बाक्ना बाक्न, मेको आ लोक्ब मचाक्को। मेको नु मइपो।
19 गे रां ब्रोल्शा ग्रांग्रा दिशो दुम्शो मीश मुर नु मइपो।
20 गे अर्को मुर आ मीश नु इप्शा आंम कली ग्रांग्रा मसेलो। २सामुएल ११:४
21 गे मोलेक कली आंम तमी तौपुकी चढ़ेशा, आंम परमप्रभु यावे, इन परमप्रभु आ नें ग्रांग्रा मसेलीन। गो परमप्रभु यावे नङ।
22 मीश मुर नु इप्शो खोदेंशो पा वोंइश मुर नु मइपो। मेको थम ग्रांग्रा बाक्ब।
23 गे बस्तु भाव नु इप्शा, आंम कली ग्रांग्रा मसेलो। मीश मुर यो बस्तु भाव नु इप्चा मदुम्ब। मेको थम मरिम्शो दूली गेय बाक्ब। प्रस्थान २२:१८; लेवी २०:१६
24 गेपुकीमी मोदेंशो पाप पा आंम कली ग्रांग्रा मसेलीन। मारदे हना गो मोदेंशो पाप आ पर्बम जात जात ङा मुर इन ङोंइती रे ग्रुंइनुङमी। मेको नेल्लेम मोदेंशो पाप पा ग्रांग्रा दिशो दुम्शो बाक्तेक्म।
25 मोपान मेको रागी ग्रांग्रा दिशो दुम्त। मिनु गो मेको आन पाप आ पर्बम सजाइ गेता। मिनु रागीम मेक ङा मुर आन कली उक्बे पा ताइक्ताक्व।
26 तन्न गे आं फुल्लुम मुशा ब्रेक्शो लोव़ नु आं पावो, दे अरेशो लोव़ टिने। मिनु गे इस्राएली नु इन दातेमी बाक्ब अर्को रागी ङा मुर मोदेंशो ग्रांग्रा दिशो गेय मपने।
27 मारदे हना इन ङोंइती मेकेर बाक्ब मुरपुकीमी मोदेंशो ग्रांग्रा नेल्ल पाम्तेक्म। मिनु रागी ग्रांग्रा दिशो दुम्त।
28 मिनु आं अरेशो मपथु, मेको रागी ग्रांग्रा दिशो सेल्तीनी हना, मेको ङोंइती बाक्ब मुर आन कली खोदेंशो पा मेको रागीमी इन कली यो उक्बे पा ताइक्ब।
29 सुइमी मेको मरिम्शो का ला पाप्तु हना, मेको मुर आ मुर रे तिल्चा पुंइसीब।
30 मोपतीके गे ङोंइती ङा मुरपुकीमी पशो खोदेंशो पा मेको दूली ग्रांग्रा दिशो पाप मपने। मिनु आंम कली ग्रांग्रा दिशो मसेलीन। मारदे हना गो परमप्रभु यावे, इन परमप्रभु नङ’ देनो” देंत।