10
1 मिनु मेकेर रे लशा, यहूदीया रागी नु यर्दन खोला आइक्ची हांबु जाक्दीम्मा बाक्त। मिनु लेंशा शुश मुर देल्मा बाक्त। मिनु तेइ तेइ गाक्शा, दोपा शेंदा, मोपा मेको आन कली यो शेंदा बाक्त।
वोंइश मीश आस नाता
मत्ती १९:१-९
2 मिनु फरिसीपुकी जाक्शा, आ थुं थाम्चा कली “मीश कली प्रोंइचा दुम्बा देय मदुम्बा?” दे हिल्लो पामे बाक्त।
3 मिनु येसुमी “मोसामी इन कली मार पन देंमे?” देंमेनु
4 “छोड पत्र ब्रेक्शा, सोइक्चा दुम्ब देंत” देंमा बाक्त। ब्यवस्था २४:१; मत्ती ५:३१-३२
5 मिनु येसुमी “मुरपुकीमी शिशी मपाइनीम, दे तुइश्शा, मोदेंशो पचा गेवा बाक्त।
6 नेल्ल क्येङा ङोंइती परमप्रभु यावेमी वोंइश मुर नु मीश मुर सेल्तीम्सी। उत्पत्ती १:२७
7 मोपतीके मुरुमी आम आफ प्रोंइशा, आ मीश नु गारशा बाक्ब। उत्पत्ती २:२४
8 मिनु मेको निक्शी रां का दुम्नीस। मोपतीके वोंइश मीश निक्शी मनसी, निम्फा का नस।
9 परमप्रभु यावेमी कांइचीक सेल्शो आस कली मुरुमी मफ्रादमेक्ल” दे माइक्मी बाक्त।
10 मिनु खिंमी बाक्मेनु, आ शेंसीबपुकीमी “इन शेंशो मार रुम्सीबा” दे हिल्लो पामे बाक्त।
11 मिनु येसुमी “सुमी आ मीश प्रोंइशा, अर्को चाक्बा, मेकोमी वोंइश मीश आस नाता ख्रोइक्ब। लूका १६:१८; १कोरिन्थी ७:८-११
12 मीश मुरुमी आ वोंइश प्रोंइशा, अर्को खोइक्तु हना, मेकोमी यो वोंइश मीश आस नाता ख्रोइक्ब” देंमाक्त।
येसु नु आलपुकी
मत्ती १९:१३-१५; लूका १८:१५-१७
13 मिनु येसुमी आ गुइ आल आन तारी वोदल दे आलपुकी चाक्ग्मे बाक्त। मिनु शेंसीबपुकीमी आल चाक्ब आन कली “मचाक्कीन” दे हुइक्तमे बाक्त।
14 मिनु येसुमी मेको तशा, आ थुं मनुथु, हुइक्ब आन कली “आल आन कली आं बाक्तीके जाक्चा गेने, मतेक्कीन। मारदे हना परमप्रभु यावे आ राज्य आल आन केन बाक्ब।
15 नोफा दाइश्शा नेनीने, मुरपुकीमी आल आन थुं ङा मिम्शो खोदेंशो पा ममिम्ताक्म हना, परमप्रभु यावे आ राज्यमी ओव़चा मताइनीम” दे माइक्मी बाक्त।
16 मिनु आल आन कली मुप्शा, आ गुइ आन तारी वोइश्शा, आसीक गेमी बाक्त।
शोंप आ पर्बम लोव़
मत्ती १९:१-९
17 मिनु मेकेर रे लमेनु, मुर का दोरशा पिशा, येसु आ ङोंइती पोक्च थेक्शा बाप्शा “शेंब, गे रिम्शो ननी। गेना हना यो ब्रोंइशा बाक्चा कली मार पचा माल्नुङा?” दे हिल्लो पवा बाक्त।
18 मिनु येसुमी “मारदे आं कली रिम्शो मुर दे माइय्यी? सुइ रिम्शो मनमी। परमप्रभु यावे ला रिम्शो बाक्ब।
19 परमप्रभु यावे आ अरेशो लोव़ तुइक्नेवे। मसाइक्चा, वोंइश मीश आस नाता मख्रोइक्चा, खुइ मपचा, सांकछी बाक्शोनु, जोल मपचा, हिंच कोंइशा मारेइ मरोइक्चा, आम आफ आस कली मान पचा, दे ब्रेक्शो बाक्ब” दे मदा बाक्त। प्रस्थान २०:१२-१७
20 मिनु मेकोमी “गो आल रेन मेको नेल्ल पन पन बाक्ती” देंमेनु,
21 येसुमी मेको आ कुल शिरशा कोव़शा, मेको कली दाक्शा “का चहिं मपवी। लशा, इ शोंप नेल्ल लेयशा, जचा फेक्चा मताइब आन कली योक्शा गेमी। मिनु लेश्शा, आं नोले खोइय्यी। मिनु इ शोंप स्वर्गमी बाक्ब” देंमाक्त। मर्कूस ८:३४; मत्ती १०:३८
22 मेको लोव़ नेंशा, आ कुल राव किक्पाइश्शा, आ थुं खाइश्शा, गाक्माक्त। मारदे हना मेको शुश शोंप पाइश्शो मुर बाक्माक्त।
23 मिनु येसुमी एर ओंथ कोव़शा, आ शेंसीब आन कली “शुश शोंप पाइश्शो मुर परमप्रभु यावे आ राज्य ओव़चा गिश श्येत बाक्बा” देंमाक्त।
24 मेको लोव़ नेंशा, शेंसीबपुकी छक लाक्मा बाक्त। मिनु येसुमी लोव़ थोक्शा “आलपुकी, आन शोंपोम थमा सुइक्ब आन कली परमप्रभु यावे आ राज्य ओव़चा शुश श्येत दुम्ब।
25 शोंप पाइश्शो मुर परमप्रभु यावे आ राज्य ओव़ने चाप्चा क्येङा, दलओंठ लूजे आ पोलाम ग्रीने चाप्ब” देंमाक्त।
26 मिनु शेंसीबपुकी थाम्पा छक लाक्शा “मो हना, सु ओव़चा ताइबा ङा?” देंमुमा बाक्त।
27 मिनु येसुमी आन कुल गे कोव़शा “मुरपुकीमी पने मचाप्नीम। तन्न परमप्रभु यावेमी पने चाप्ब, मारदे हना परमप्रभु यावेमी मारेइ मारेइ पने चाप्ब” दे माइक्मी बाक्त।
येसु आ नोले खोइक्ब आन इनाम
मत्ती १९:२७-३०; लूका १८:२८-३०
28 पत्रुसमी येसु कली “गो मारेइ मारेइ प्रोंइशा, इन नोले खोइक्तक” देंमेनु,
29 येसुमी “नोफा दाइश्शा नेनीन, सुमी आं पर्बम नु ग्येरपाइक्ब लोव़ आ पर्बम आ खिं, लोक्बम लोक्ब, आम आफ, तमी तौ नु रू प्रोंइबा,
30 मेकोमी खेदा पा श्येत जचा पुंइसाक्व हना यो, मुल आ प्रोंइशो क्येङा शुश खिं, लोक्बम लोक्ब, आम आफ, तमी तौ नु रू ताइब। मिनु नोले गेना हना यो परमप्रभु यावे नु बाक्चा ताइब।
31 ङोंइती दुम्शोपुकी नोले दुम्नीम। नोले दुम्शोपुकी ङोंइती दुम्नीम” दे शेंदीमी बाक्त।
रागीम जरमेशो साइक्चा पुंइसीब देंशो
मत्ती २१:१७-१९; लूका १८:३१-३४
32 मिनु यरूसलेम ङा लां खोइश्शा गाक्मानु, येसु नेल्ल आन ङोंइती गाक्माक्त। आ नोले खोइक्बपुकी छक लाक्शा हिंमा बाक्त। मिनु १२ जना शेंसीब आन कली लेंशा आ नेक्था ब्रेश्शा, आ कली मार दुम्बा दे तुइक्पाइक्चा गोवा बाक्त। मर्कूस ९:११
33 मिनु “मुल यरूसलेम लाइनय। मिनु रागीम जरमेशो ठेयब चढ़ेब नु सास्त्री आन गुइमी गेचा पुंइसीब। मिनु मेकोपुकीमी दोस गेशा, साइक्चा माल्ब, दे अर्को जात ङा मुर आन गुइमी गेनीम।
34 मिनु मेकोपुकीमी शुक्शी पशा, आ कुलमी तोक्शा युक्नीम। मिनु साइक्नीम। मिनु बेक्शो आ नित्थ नाक्ती बेक्शो रे सेंसीब” दे तुइक्पाइक्मी बाक्त।
ठेयब सु बाक्बा?
मत्ती २०:२०-२८
35 मिनु जब्दी आ तौ याकूब नु यूहन्ना येसु आ नेक्था जाक्शा “ए शेंब, मार पुंइस्कु, मेको तस्कुल” दे पुन्से बाक्त।
36 मिनु येसुमी “मार पुंइनीसी?” दे हिल्लो पवानु,
37 मेको निक्शीमी “गे सक्ति पाइश्शो दुम्शा, हुकुम पाइब दुम्नीनु, का इन ग्युरा, का इन पेरा गे बाक्चा गेचा नस्कु” दे पुन्से बाक्त।
38 तन्न येसुमी “गे मार पुंइसी, मेको मरुप्नीसी। आं तूचा माल्शो कचौरा तूने चाप्नीसी? आं बुद पा श्येतम ख्रुम्चा पुंइसीने चाप्नीसी?” देंमेनु मर्कूस १४:३६; लूका १२:५०
39 “चाप्नस्कु” देंसा बाक्त। मिनु येसुमी “आं तूचा माल्शो कचौरा यो तूनीसी। आं बुद पा श्येतम ख्रुम्चा यो पुंइसीनीसी। प्रेरित १२:२
40 तन्न आं ग्युरा पेरा गे बाक्चा गेचा चहिं आं गुइमी ममाइ। परमप्रभु यावेमी योव़चा पुंइसीशो मुर ला मेकेर बाक्चा ताइनीम” दे माइक्सी बाक्त।
41 मिनु शेंसीब १० जनामी मेको आस कली मोदेंशो पुंइशो तशा “याकूब नु यूहन्ना दोदेंशो बाक्सा” दे आन थुं मनुथु, लोव़ पमुमा बाक्त। लूका २२:२५-२७
42 मिनु येसुमी नेल्ल आन कली खुप्शा “अर्को जात ङा मुर आन कली हुकुम पाइनुङ, दे मिम्बपुकीमी मुर आन कली दिप्शा वोइश्शा, हुकुम पाइनीम, दे तुइक्नीनी।
43 तन्न इन दातेमी मोदेंशो पचा मदुम्ब। सुमी ठेयब दुम्चा दाक्बा, मेको नेल्ल आन गेय पाइब दुम्चा माल्ब।
44 सु नेल्ल क्येङा ङोंइती दुम्चा दाक्बा, मेको नेल्ल आन वाइल दुम्चा माल्ब। मर्कूस ९:३५; १पत्रुस ५:३
45 मारदे हना रागीम जरमेशो यो मान पपांइसीचा कली ममाइ, तन्न वारच पथ नु शुश मुर आन कली प्रोंइचा कली आ गिंम गेथ जाक्शो बाक्त” दे माइक्मी बाक्त।
मिक्च मताइब बारतीमै
मत्ती २०:२९-३४; लूका १८:३५-४३
46 मिनु यरीको सहरमी जाक्दीम्मा बाक्त। मिनु यरीको रे लशा, येसु नु आ शेंसीब आन नोले खोइश्शा, शुश मुर गाक्मानु, तिमै आ तौ मिक्च मताइब पुंइब बारतीमै मेको लां उइ बाक्शो बाक्माक्त।
47 मिनु बारतीमैमी नासरथ ङा येसु एको लां पिना पिन बाक्त देंशो नेंशा “ए येसु, दाऊद आ तौ, शिशी पाइय्यीनी” दे वाइ ब्रेत्चा गोवा बाक्त।
48 मिनु शुशेमी “सिक्सी पावो” दे हुइक्तमे बाक्त। आं चहिं ङोंइती क्येङा शुश वाइ ब्रेश्शा “दाऊद आ तौ, शिशी पाइय्यीनी” दे ब्रेम्माक्त।
49 मिनु येसु ख्रा दिक्शा “मेको कली एके ब्रेत्तीने” देंमाक्त। मिनु मिक्च मताइब कली “ठेयब थुं पावो। मिनु बोक्को। मारदे हना इ कली ब्रेत्ताक्व” दे मदमे बाक्त।
50 मिनु आ बरखी ताइश्शा, छुल बोक्शा, येसु आ ङोंइती जाक्माक्त।
51 मिनु येसुमी “इ कली मार पङ, मार पुंइनेवे?” दे हिल्लो पवा बाक्त। मिनु मिक्च मताइबमी “ए शेंब, मिक्च ताइब सेल्यीनी” दे पुना बाक्त।
52 मिनु येसुमी “साशा लावो। इ थमा सुइश्शोमी साते” दे मदानु, ब्रा साशा मिक्च ताइब दुम्शा, येसु आ नोले खोदा बाक्त।