11
येसु यरूसलेमम जाक्दीश्शो
मत्ती २१:१-११; लूका १९:२९-४०; यूहन्ना १२:१२-१९
1 मिनु यरूसलेम आ नेक्था जैतून डांडा बेथफागे नु बेथानी जाक्दीम्मा बाक्त।
2 मिनु येसुमी आ शेंसीब निक्शी आस कली “मेरे गाउं लसे। मिनु गाउं ओव़सीनु, सुइ मङोइश्शो गधा आ चाइक्ब पाइश्शा, वोइश्शो थित्नीसी।
3 मेको चाक्कीसे। मुरपुकीमी ‘मारदे लाइक्सी?’ देंतेक्म हना ‘प्रभु कली माल्ताक्व। नोले लेश्शा सोइक्ब’ देंसीनु, लाइक्चा गेनीम” दे सोइक्तीम्सी बाक्त।
4 मिनु मेको निक्शी लशा, मेक जाक्दीश्शा, लांमी लाप्चो आ ङोंइती पाइश्शो गधा आ चाइक्ब थित्से बाक्त। मिनु प्रोन्से बाक्त।
5 मेकेर बाक्ब मुरपुकीमी “मारदे प्रोंइसी?” देंमा बाक्त।
6 मिनु येसुमी देंशो खोदेंशो पा, लोव़ लेत्से बाक्त। मिनु लाइक्चा गेमे बाक्त।
7 मिनु गधा आ चाइक्ब चाक्ग्से बाक्त। मिनु आन वासी ब्रामे बाक्त। मिनु येसु ङोंइसे बाक्त।
8 मिनु शुशेमी आन बरखी लांमी ब्रामे बाक्त। अरुमी एर ओंथ ङा राशी जिक्शा, लांमी ब्रामे बाक्त।
9 ङोंइती नोले गाक्बपुकीमी “होसन्ना, प्रभु आ नेंमी जाक्ब ठेयब दुम्ल। होसन्ना आ देंशो ‘परमप्रभु वारच पने’ बाक्ब।भजन संग्रह ११८:२५-२६
10 मुल जाक्चशो इं किकी पिपी दाऊद आ राज्य कली जाइ। परमप्रभु कली होसन्ना” दे रेयके पा ठेयब सेल्ना सेल्न गाक्मा बाक्त।
11 मिनु यरूसलेम जाक्दीशा, परमप्रभु यावे आ खिं ओव़माक्त। मिनु एर ओंथ मारेइ मारेइ कोव़शा, आ शेंसीब १२ जना नु बेथानी लेम्माक्त। मारदे हना नां रिक्चशो बाक्माक्त।
फल मसिश्शो फोव़शी रवा
मत्ती २१:१२-२२; लूका १९:४५-४८; यूहन्ना २:१३-१६
12 आ दीसा बेथानी रे पिशा, लांमी गाक्मानु, येसु शोव़लु बेक्माक्त।
13 मिनु इच्ची आइक्था सफा पाइश्शो फोव़शी रवा तशा, फोव़शी सिश्शो बाक्म कों दे कोव़थ लमाक्त। मिनु जाक्दीश्शा कोव़ङानु, सफा ला तवा बाक्त। मारदे हना सित्ची मजाक्शो बाक्माक्त।
14 मिनु “मुल ङा मेरे सुइमी इ फल जचा मतामेक्ल” दे मदा बाक्त। आ शेंसीबपुकीमी मो देंशो नेन्मे बाक्त।
ग्याप्ब लेयब आन कली खेरशो
15 मिनु यरूसलेम जाक्दीम्मा बाक्त। जाक्दीश्शा येसु परमप्रभु यावे आ खिं ओव़शा, मेकेर ग्याप्ब लेयब आन कली खेरचा गोवा बाक्त। क्येट फाइक्ब आन क्येट वोइक्तीके नु ढुकुर लेयब आन नित्तीके खोल्शा गेमी बाक्त।
16 मिनु सुइ कली मारेइ यो चाक्शा लेयचा मगेथु,
17 “जात जात ङा मुरपुकीमी एकेर प्रार्थना पामेक्ल दे आं खिं वोइश्शो बाक्त दे ब्रेक्शो बाक्बा, ममाइ ङा? गेपुकीमी चहिं खुइपुकीमी खुइ पा चाक्शा आन बाक्तीके पुक्खी सेल्तीनी” दे हुइक्तीमी बाक्त। यसैया ५६:७; येरमीया ७:११
18 मिनु फरिसी नु सास्त्रीपुकीमी मेको नेंशा, दोपा साइक्चा दे लां कोव़ङमे बाक्त। तन्न येसु कली तशा, हिंमा बाक्त। मारदे हना मुर नेल्लेमी आ शेंशो नेंशा, छक लाक्बाक्मा बाक्त।
19 मिनु नां रिक्चावानु, येसु नु आ शेंसीबपुकी सहर रे लेम्मा बाक्त।
दल्गीर मपथु, प्रार्थना पचा
20 मिनु सुनी लां गाक्मानु, फोव़शी रवा आ ङर रे पुं सम्म सोव़शो तामे बाक्त।
21 मिनु पत्रुसमी ति फ्रुक्शा, येसु कली “ए शेंब, कोव़ङीन, इन सराप पशो फोव़शी रवा सोव़माक्त” देंमाक्त।
22 मिनु येसुमी मेको आन कली “परमप्रभु यावे कली थमा सुतीने।
23 नोफा दाइश्शा नेनीने, सुमी आं देंशो थमा दुम्ब, दे दल्गीर मपथु, मेको डांडा कली ‘एकेर रे समुन्द्रमी याक्सो’ देंत हना, मेको आ थमा सुइश्शोमी डांडा याक्सीशा लाइब। मर्कूस ९:२३; मत्ती १७:२०
24 मोपतीके ‘आं पुंइशो ताइनुङ’ दे थमा सुइश्शा, प्रार्थना पा पुंइतीनी हना, इन पुंइशो ताइनीनी। मत्ती ७:७; यूहन्ना १४:१३; १यूहन्ना ५:१४-१५
25 प्रार्थना पा बाक्नीनु, सुइ नु चुरशो बाक्तीनी हना, मेको कली माफ गेने। मिनु स्वर्गम बाक्ब इन आफोमी यो इन मरिम्शो पशो क्याम्शा माफ गेब।
26 माफ मगेतीनी हना, स्वर्गम बाक्ब इन आफोमी यो इन कली माफ मगेब” दे शेंदीमी बाक्त।
अधिकार आ पर्बम हिल्लो पशो
मत्ती २१:२३-२७; लूका २०:१-८
27 मिनु यरूसलेममी जाक्दीम्मा बाक्त। मिनु येसु परमप्रभु यावे आ खिंमी हिरसेनु, ठेयब चढ़ेब, सास्त्री नु जोक्ब तुइक्ब खाल्पापुकी जाक्शा
28 “तेको अधिकारमी मोदेंशो पवी? मो पचा, दे सुमी अधिकार गेवे?” देंमा बाक्त।
29 मिनु येसुमी “गो इन कली लोव़ का हिल्लो पाइनुङ, मेको लोव़ लेत्तीने। मिनु तेको अधिकारमी एको गेय पङा शेंनन्नी।
30 यूहन्नामी मुर आन कली ब्वाक्कुमी ख्रुम्शा ग्रुंइतीके अधिकार स्वर्ग रे तवा देय मुर रे तवा? लो देनीन” दे माइक्मीनु,
31 मेकोपुकीमी “स्वर्ग रे तवा बाक्त देंतय हना, मो हना यूहन्ना आ लोव़ मारदे थमा मसुइक्नी देंब।
32 मुर रे तवा बाक्त देंचा यो दोपा देंय” दे लोव़सी पमुमा बाक्त। मोदेंशो देंचा हिंमा बाक्त। मारदे हना मुर नेल्लेमी यूहन्ना थमान परमप्रभु यावे आ लोव़ पाइब बाक्ब, दे थमा सुइश्शो बाक्मा बाक्त। लूका ७:२९-३०
33 मोपतीके “मतुइक्नीकी” देंमानु, येसुमी “मो हना तेको अधिकारमी एको गेय पङा दे गो यो मशेंनन्नी” दे माइक्मी बाक्त।