13
“परमप्रभु आ खिं मलीब” देंशो
मत्ती २४:-; लूका २१:५-३६; लूका १७:२३-३७
1 मिनु येसु परमप्रभु यावे आ खिं रे ग्रूमेनु, आ शेंसीब कामी “ए शेंब, कोव़ङीन, एको खिं ठेयब फुल्लु के सेल्शा, दोमो कोल्शो गिश दारशो तांइसाक्व” देंमाक्त।
2 मिनु येसुमी “मुल ओमो ठेयब दारशो सेल्शो खिं ताप्तीवी। तन्न नोले ब्रेश्शा, फुल्लु का यो ख्रोप्शा मलीब” देंमाक्त।
श्येत दुम्चा गोइब
3 मिनु परमप्रभु यावे आ खिं तांइसीचा ङा पा जैतून डांडामी निस्सेनु, पत्रुस, याकूब, यूहन्ना नु अन्द्रीयास जाक्शा, मत्ती १७:१
4 येसु कली “एको इन देंशो लोव़ गेना दुम्बा? एको नेल्ल दुम्चाप्तु, दे तुइक्पाइक्चा ङा चिन्ड दोपा तांइसीनीमी? शेंदीकी” देंमा बाक्त।
5 मिनु येसुमी “सुइमी इं थुं मक्यामेक्ल, दे होस पा बाक्कीन।
6 शुश मुरुमी आं नें ब्रशा ‘गो एको नङ’ देंशा, मुर आन थुं क्याइक्नीम। यूहन्ना ८:४९
7 शुश लडाइ दुम्शो लोव़ नेंनीनु, महिनीन। मोदेंशो दुम्चान माल्ब। रागी नुप्ची चहिं मजा।
8 रागी नुप्चा क्येङा ङोंइती जात जात नु राज्य राज्यमी लडाइ पमुइनीम। रागी रागीमी ख्रिनु कुइब। अन्काल दुम्ब। मो दुम्मेनु, श्येत दुम्चा गोवा बाक्त, दे तुंइसीब।
थमा सुइक्ब ग्याइक्चा पुंइसीनीम
9 आंम इन कली मिम्शा होस पा बाक्कीन। कछडी वोइक्चा पुंइसीनीनी। ग्रुम्तीक खिंमी तुप्चा पुंइसीनीनी। आं नें आ पर्बम हुकुम पाइब नु पिप आन ङोंइती राप्पाइक्चा पुंइसीशा, सांकछी दुम्चा माल्नीनी।
10 मोदेंशो दुम्चा क्येङा ङोंइती रागी नेल्ल ङा मुर आन कली ग्येरपाइक्ब लोव़ नेंपाइक्ने थुम्शो दुम्चा माल्ब। मर्कूस १६:१५
11 मिनु इन कली ठेयब मुर आन ङोंइती राप्पदमेनु, मार लोव़ पय, मार देंय? दे हिंशा, मिम्स ङा मिम्स मबाक्कीन। इन कली दोदेंशो लोव़ पचा गेशो बाक्मे, मोदेंशो लोव़ पने। मारदे हना गे लोव़ मपाइनीनी, परमप्रभु यावे आ सोक्तीम इन कली लोव़ पपाइक्ब।
12 लोक्बमी आ लोक्ब कली साइक्पाइक्चा गेब। आफोमी तौ कली साइक्पाइक्ब। मिनु तमी तौपुकीमी आम आफ आस कली ग्याइक्पाइश्शा साइक्पाइक्नीम।
13 आं नें आ पर्बम सुइम इन कली मदाक्नीम। सु सु चहिं नेल्ल क्येङा नोले सम्म थमा सुइक्चा मप्रोंइथु बाक्नीमी, मेकोपुकी श्येत जचा रे ब्रोंइशा, गेना हना यो परमप्रभु यावे नु बाक्चा ताइनीम। यूहन्ना १५:१८,२१
मुल सम्म मदुम्शो श्येत दुम्ब
14 परमप्रभु यावे आ खिं गेनायो मदुम्चा ङा पा बिथोलो दुम्मेनु, मेको मुल पढ़ेबपुकीमी रुप्मेक्ल, यहूदीया रागीम बाक्बपुकी डांडा ग्येत्थ प्रोक्मल। दानीएल ९:२७; दानीएल ११:३१; दानीएल ११:३१
15 बारदालीम बाक्बपुकीमी ‘तोइश्शा, खिं ओव़शा मारेइ लाइक्चा ताइनुङ’ दे ममिम्तमेक्ल, दिव दाव प्रेक्शा प्रोक्मल।
16 रूमी गेय पाइबपुकीमी ‘फेक्तीक का लाइक्नुङ’ देंशा, खिं मलेम्मल। तन्न आन गेय थु था प्रोंइशा प्रोक्मल।
17 कोव़ज कुरशो नु दूध तूब आल पाइश्शो मीश मुर अरु क्येङा शुश श्येत जाइनीम।
18 हिउंदमी मोदेंशो श्येत मदुम्ल, दे परमप्रभु यावे कली पुनीने।
19 परमप्रभु यावेमी रागी सेला रे मुल सम्म सुइमी मतुइश्शो श्येत दुम्ब। मोदेंशो श्येत लेंशा गेनायो मपीब। दानीएल १२:१
20 प्रभुमी मोदेंशो श्येत जतीक नाक्त शुश वोइश्शो हना, सुइ ब्रोंइने मचाप्नीम। तन्न आ योव़शो आन पर्बम प्रभुमी मेको श्येत शुश नाक्ती लीचा मगेब।
21 मिनु मुरपुकीमी ‘ख्रीस्त एकेर जाक्त, मेरेक बाक्ब, लो कोव़ङीन’ देंतेक्म हना, थमा मसुतीन।
22 शुशेमी ‘गो ख्रीस्त नङ’ दे जोल पा गाक्नीम। ‘परमप्रभु यावे आ लोव़ पाइब नकी’ दे जोल पाइबपुकीमी चिन्ड नु छक लाक्चा ङा गेय पा कोंइनीम। मेकोपुकीमी परमप्रभु यावे आ योव़शो आन कली यो लां प्रोंइपाइक्चा माल्नीम।
23 मेको दुम्चा ङोंइतीन नेल्ल शेंशा तुइक्पाइक्तन्नी। एको लोव़ मिम्शा मप्रेंथु बाक्कीन।
रागीम जरमेशो जाक्ब
24 रागीमी मोदेंशो ठेयब श्येत नुम्मेनु, सरीङमी चिन्ड तांइसीनीम। नां आ छेङछेङ जाम्शा, जिक रिक्शो दुम्ब। तास्ला आ हाम्सो यो जाम्ब।
25 सोरुल खपीम दोक्नीम। सरीङमी बाक्शो सक्तिपुकी हिम्सीनीम। हिब्रू १२:२६
26 मिनु मुरपुकीमी रागीम जरमेशो कली गोस्सुमी गिल्सीशा, शुश सक्ति पाइश्शा, यिना यिन पशो ताइनीम। दानीएल ७:१३
27 मिनु रागीम जरमेशोमी परमप्रभु यावे आ गेय पाइब आन कली रागी तेइ तेइ रे परमप्रभु यावे आ योव़शो नेल्ल आन कली खुप्शा चाक्थ सोइक्ब। मत्ती १३:४१
28 फोव़शी रवा कोच्वा दाप्शा कुशो तनीनु, बर्खा जाक्माक्त दे तुइक्नीनी।
29 आं देंशो लोव़ थमा दुम्शो तनीनु, आं जाक्ची जाक्माक्त दे तुइक्नीनी।
30 नोफा दाइश्शा नेनीने, एको जात ङा मुर मनुप्थु, आं देंशो थमा दुम्ब।
31 सरीङ नु रागी नेल्ल जाम्शा लाइनीम, आं लोव़ चहिं गेना हना यो मजाम्थु लीब।
32 मोदेंशो गेना दुम्ब, दे सुइमी मतुइक्नीम। परमप्रभु यावे आ स्वर्ग ङा गेय पाइबपुकीमी यो मतुइक्नीम। तौमी लायो मतुइक्ब। आं आफोमी ला तुइक्ब।
सासीशा बाक्चा माल्ब
33 मोदेंशो गेना दुम्बा मतुइक्नीनी। मोपतीके सासीशा बाक्कीन। लूका १२:३५-४०; लूका २१:३६
34 दोदेंशो दुम्ब देंशा हना, मुर का तेइ तेइ हिरथ लमेनु, लचा ङोंइती आ गेय पाइब आन कली का का पा आन गेय योक्शा, लाप्चो खाल पाइब कली ‘गेना हना यो लां कोव़शा बाक्को’ दे माइश्शा लाइब।
35 आं खिं ङा प्रभु गेना लेश्शा जाक्बा, दे मतुइक्नीनी। नां रिक्शा जाक्बा कों? नाक्दो जाक्बा कों? भाले ग्रीची ना जाक्बा कों? सुनी जाक्बा कों दे मारेइ मतुइक्नीनी। मेको इन मतुइक्थु जाक्ब। लूका १२:३८
36 इन मतुइक्थु जाक्मेनु, इन कली इप्शो मथिदल।
37 मोपतीके लां कोव़शा सासीशा बाक्कीन दे माइक्तन्नी। मोदेंशो नेल्ल आन कली माइक्नुङमी” दे शेंदीमी बाक्त।