14
येसु कली साइक्चा माल्शो
मत्ती २६: - २८:-; लूका २२: - २४:-; यूहन्ना १८: - २१:-
1 मिनु बोरब ओख्ती मसुप्शो शोब्ले जतीक पास्सा चाड आ निक्शी नाक्ती ङोंइती ठेयब चढ़ेब नु सास्त्रीपुकीमी “येसु कली दोपा मुर आन मतुइक्थु ग्याइश्शा, साइक्पाइक्चा” दे लोव़सी पमुमानु
2 “चाड नाक्ती मदुम्ब, मुरपुकीमी मरिम्शो पाइनीम” देंमुमा बाक्त।
येसु तेल ख्रेक्चा पुंइसीशो
3 येसु बेथानीमी कोर पाइब सिमोन आ खिंमी खमे जना जन बाक्मेनु, मीश मुर कामी शुश क्येट लाइब ब्रोव़शो रिना पाइश्शो तेल कुरशा जाक्शा, मेको तेल येसु आ पियामी लुक्ता बाक्त।
4 मिनु मेकेर बाक्ब का निक्शीमी “ओदेंशो तेल मारदे एकोमी ओपा ताइक्ता?
5 लेयङ हना, सहे सां देनार क्येङा शुश ताक्शा, श्येत जाइब आन कली योक्शा, वारच पने चाम्स वा” दे आन थुं मनुथु, मीश मुर कली हुइक्तमे बाक्त। देनार का नाक्त का ङा गाल्च बाक्त। मेको रोम ङा चांदी के क्येट बाक्त।
6 मिनु येसुमी “महुइक्तीने, मारदे आ थुं खाइक्पाइक्नी? आं कली रिम्शो पाइक्ती।
7 श्येत जशो मुर गेना हना यो थित्नीनी, मिनु शिशी पाइक्चा दाक्ताक्नी हना, गेना हना यो पाइक्ने चाप्नीनी। आं कली चहिं नोले मथित्नीनी। ब्यवस्था १५:११
8 आ चाप्शो पाप्तु। बेक्चा क्येङा ङोंइती आं रां थिम्चा कली तेल ख्रेक्ताक्व।
9 नोफा दाइश्शा नेनीने, रागीम ते ते आं लोव़ नेंपाइक्नीमी, मेक मेक एको आ पशो आ पर्बम यो लोव़ पाइनीम” देंमाक्त।
इस्कारीयोत ङा यहूदा आ पशो
10 इस्कारीयोत ङा यहूदा येसु आ शेंसीब कामी ठेयब चढ़ेब आन कली “येसु कली ग्याइक्चा वारच पाइनन्नी” दे लोव़ पथ लमाक्त। मिनु मेकोपुकीमी आ देंशो नेंशा, ग्येरशा “लो, रिम्शोन दुम्त। क्येट गेनीकी” देंमा बाक्त।
11 में ङा मेरे “गेना नु दोपा ग्याइक्चा वारच पदुमी” दे योव़की पना पन गाक्माक्त।
पास्सा चाड ङा भोज
12 बोरब ओख्ती मसुप्शो शोब्ले जतीक चाड आ ङोंइती ङा नाक्ती पास्सा ङा पाठा क्योरशा ब्वाइनीम। मिनु येसु आ शेंसीबपुकीमी “पास्सा मानेचा कली ते लशा साचा? मार देंनीनी?” दे हिल्लो पामे बाक्त।
13 मिनु येसुमी शेंसीब निक्शी आस कली “सहर लसे। मिनु गाग्री कुरशो मुर का कली ग्रुम्नीसी। मेको आ नोले खोतीसे।
14 मिनु मेको तेको खिं ओव़बा, गे यो ओव़ङीसे। मिनु खिं ङा मुर कली ‘शेंबमी सोइश्शो नस्कु। शेंबमी आ शेंसीबपुकी नु काथा बाक्शा, पास्सा ते मानेचा? दे हिल्लो पथ सोइक्ताक्सकी’ दे मतीसे। मर्कूस ११:३
15 मो माइक्सीनु, मेकोमी इस कली तला तारी ठेयब कोठा का कोंइब। मेको कोठामी गुन्द्री पीरा ब्रशा वोइश्शो थित्नीसी। मिनु मेकेरन साचा” दे सोइक्तीम्सी बाक्त।
16 मिनु मेको निक्शी लशा, सहर जाक्दीश्शा, येसुमी दोदेंशो देंमे, मोदेंशो थित्से बाक्त। मिनु पास्सा चाड ङा भोज सादसे बाक्त।
17 मिनु नां रिक्मेनु, येसु नु आ १२ जना शेंसीब खुम्समा बाक्त।
18 मिनु जना जन बाक्मानु, येसुमी “नोफा दाइश्शा नेनीन। मुल एक बाक्ब काम आं कली ग्याइक्ब आन कली वारच पाइब। मुल गो नु काथा जना जन बाक्ब” देंमाक्त। यूहन्ना १३:२१-२६
19 मिनु नेल्लेमी शुश मरिम्शो लाक्शा “ए प्रभु, मेको वारच पाइब गो दुम्नुङा कों?” दे का का पा हिल्लो पामे बाक्त।
20 मिनु येसुमी “१२ जना शेंसीब इन दाते ङा का बाक्ब। गो नु काथा शोब्ले शेक्कुम तेप्बमी आं कली ग्याइक्पाइक्चा वारच पाइब।
21 मारदे हना रागीम जरमेशो आ पर्बम ब्रेक्शो लोव़ नेल्ल थमा दुम्चा माल्ब। मेको बेक्चा माल्ब। मो हना यो रागीम जरमेशो कली ग्याइक्पाइक्चा वारच पाइब कली शुश मरिम्शो दुम्ब। मो देंशो पाइब मुर मजरमेस हना, मेको कली रिम्शो दुम्ब वा” दे माइक्मी बाक्त।
22 मिनु जना जन बाक्मानु, शोब्ले शेशा “गे रिम्शो पाइब बाक्नीनी” दे प्रार्थना पशा जिक्शा, आ शेंसीब आन कली योक्शा “दांइसीने, एको आं रां बाक्ब” देंमाक्त। १कोरिन्थी ११:२३-२५
23 मिनु कचौरा शेशा “गे रिम्शो पाइब बाक्नीनी” दे प्रार्थना पा, मेको आन कली तूचा गेमी बाक्त। मिनु नेल्लेमी तूङमे बाक्त।
24 मिनु “एको आं हुश बाक्ब। आं हुशेमी परमप्रभु यावे आ गेशो नक लोव़ खाप्ता। आं हुश जारशोमी शुश मुर आन पाप क्याम्सीब। प्रस्थान २४:८; हिब्रू ९:१५-१६
25 नोफा दाइश्शा नेनीन, मुल ङा मेरे एको अङगुर रे सेल्शो तूतीके मतूनुङ। नोले नेल्ल नक दुम्शा, परमप्रभु यावे आ राज्यमी बाक्शा तूनुङ” दे माइक्मी बाक्त।
26 मिनु कुम्सो पा बोक्शा, जैतून डांडा ग्येत्थ लमा बाक्त। भजन संग्रह ११३:- ११८:-
पत्रुसमी “गेनायो मप्रोंइनन्नी” देंशो
27 मिनु लना लन बाक्मानु, येसुमी “गे नेल्लेमी इन थुं ग्यशा, आं कली प्रोंइनीनी। मारदे हना ओदें ब्रेक्शो लोव़ थमा दुम्ब ‘गो गोठला कली तुप्शा खेरनुङ। मिनु भेडापुकी प्रोक्शा, साव सुव ब्राइनीम’ देंशो बाक्ब। जकरिया १३:७; यूहन्ना १६:३२
28 नोले गो बेक्शो रे सेंचा पुंइसीशा, इन ङोंइती गालील रागी जाक्दीत्नुङ” देंमाक्त। मर्कूस १६:७
29 मिनु पत्रुसमी “मेको नेल्लेमी इन कली प्रोंइशा प्रोक्तेक्म हना यो, गो मप्रोंइनन्नी” देंमेनु, यूहन्ना १३:३८
30 येसुमी “नोफा दाइश्शा नेनो, में नाक्दोन भाले खेयप निक्शी मग्रीथु, खेयप सां सम्म ‘मेको कली मतुइक्नुङ, सु बाक्म’ दे आं पर्बम देंनेवे” दे मदा बाक्त।
31 मिनु पत्रुसमी “मदेंनुङ, गे नु काथा बाक्शा, साइक्चा पुंइसाक्यी हना यो, मोदेंशो गेनायो मदेंनुङ” दे लोव़ थोक्शा देंमाक्त। आ शेंसीब नेल्लेमी यो मो देंमा बाक्त।
गेथ्सेमनेमी प्रार्थना पशो
32 मिनु गेथ्सेमने जाक्दीम्मा बाक्त। मिनु येसुमी “लो, एक बाक्कीन। गो इच्ची आइक्था लशा, प्रार्थना पाइनुङ” देंशा,
33 पत्रुस, याकूब नु यूहन्ना सां आन कली आइक्था लाइश्शा लमाक्त। येसु आ थुं शुश खाइक्माक्त। मत्ती १७:१
34 मिनु सां आन कली “आं थुं शुश खाइश्शा, बेक्चा ङा दुम्ती। मइप्थु गो नु काथा बाक्कीन” दे माइक्मी बाक्त। यूहन्ना १२:२७
35 मिनु इच्का ङोंइती लशा, खपीम बाप्शा “दुम्त हना, मुल दुम्चशो श्येत मदुम्ल” दे प्रार्थना पवा बाक्त।
36 मिनु “आब्बा, आं आफ, गे मारेइ मारेइ पने चाप्नीनी। एको कचौरा आं कली मतूपाइक्थु लतीने। तन्न आं दाक्शो मदुम्ल। इन दाक्शोन दुम्ल” दे प्रार्थना पशा, लेश्शा जाक्माक्त। येसुमी आइक्च आल खोदेंशो पा आ आफ कली आब्बा देंत।
37 लेश्शा जाक्मेनु, सांफा आन कली इप्शो तामी बाक्त। मिनु पत्रुस कली “ए सिमोन, इमे? छिन का यो मइप्थु बाक्ने मचबी? मर्कूस १०:३८
38 थुं थाम्चा पुंइसेनु, पाप मपङ, दे मइप्थु बाक्शा प्रार्थना पावो। थुंमी पाइनुङ, चाप्नुङ देंब, तन्न रांमी फाल्ने मचाप्ब” दे मदा बाक्त।
39 मिनु लेंशा इच्का आइक्था लशा, ङोंइती प्रार्थना पशो खोदेंशो पा, प्रार्थना पवा बाक्त।
40 मिनु लेंशा लेश्शा जाक्शा, निन्द्रामी दुक्शा बाक्शो तामी बाक्त। मेकोपुकीमी मार देंचा, दे मारेइ मतुइक्तमे बाक्त।
41 मिनु लेंशा प्रार्थना पथ लशा, लेश्शा जाक्शा, मेको आन कली “गे मुल सम्म इप्शा बाक्नीनी? मुल गाप्त। रागीम जरमेशो पापी आन गुइमी गेचा पुंइसीचा चिक्ताक्व।
42 लो बोक्कीन, लय। आं कली ग्याइक्चा वारच पाइब जाक्चाप्तु” दे माइक्मी बाक्त।
येसु ग्याइक्चा पुंइसीशो
43 मो माइक्मीनु, आ शेंसीब यहूदामी ठेयब चढ़ेब, सास्त्री नु जोक्ब तुइक्ब खालपापुकीमी सोइश्शो तरवार कोक्के कुरब हुल, येसु कली ग्याइक्थ चाक्गा बाक्त।
44 यहूदामी “सु कली पुक्पु पदु, मेको कली ग्याइश्शा लतीने” दे ग्याइक्थ जाक्ब आन कली तुइक्पाइश्शो बाक्माक्त।
45 मिनु जाक्मानु, यहूदा येसु आ नेक्था लशा “रब्बी” दे बे मुप्शा, पुक्पु पवा बाक्त। हिब्रू लोव़मी ठेयब शेंब कली रब्बी देंनीम।
46 मिनु ग्याइक्थ जाक्बपुकीमी येसु कली ग्याइक्तमे बाक्त।
47 मिनु येसु नु काथा बाक्ब कामी तरवार ग्रि शोइश्शा, ठेयब चढ़ेब आ वाइल का आ नोफा दि ख्रोदा बाक्त।
48 मिनु येसुमी आ कली ग्याइक्ब हुल आन कली “तरवार कोक्के कुरशा, खुइ पाइब कली ग्याइक्थ जाक्शो खोदेंशो पा आं कली ग्याइक्थ जाक्नी?
49 नाक्त किंत किंत परमप्रभु यावे आ खिंमी गेपुकी नु काथा बाक्शा, शेंना शेंन बाक्ङानु, मग्याइक्तीनी। तन्न परमप्रभु यावेमी ब्रेक्पाइश्शो लोव़ थमा दुम्चा कली ओदेंशो दुम्त” दे माइक्मी बाक्त।
50 मिनु आ शेंसीबपुकी येसु कली थु था प्रोंइशा, साव सुव ब्रशा प्रोक्मा बाक्त।
51 मिनु येसु कली ग्याइश्शा फ्रेंशा लदमेनु, ठिटा का आन नोले खोदा बाक्त। मेको ठिटाम वा का ला गिल्सीशो बाक्माक्त।
52 मारदे हना मेको कली ग्याइक्तमेनु, आ फेक्शो वा प्रोंइशा, शिश्रा प्रोक्शो बाक्माक्त। आमोस २:१६
येसु कली चढ़ेब आ ङोंइती चाक्शो
53 मिनु येसु कली नेल्ल क्येङा ठेयब चढ़ेब आ ङोंइती चाक्दीत्मे बाक्त। मेकेर ठेयब चढ़ेब, जोक्ब तुइक्ब खाल्पा नु सास्त्रीपुकी खुम्सीशा बाक्शो बाक्मा बाक्त।
54 पत्रुस मेको आन नोनोले खोइश्शा लशा, नेल्ल क्येङा ठेयब चढ़ेब आ लाङगा जाक्दीम्माक्त। मेकेर सिपाइपुकी नु काथा मी थेरशा बाक्माक्त।
55 ठेयब चढ़ेब नु मेकेर बाक्ब नेल्लेमी मार पामे बाक्त देंशा हना, जोल पा दोस गेशा, येसु कली साइक्पाइक्चा माल्मे बाक्त। तन्न दोस गेने मचाप्मे बाक्त।
56 शुश मुरुमी जोल पा सांकछी गेमे बाक्त, तन्न आन लोव़ मगारमाक्त।
57 सांकछी का निक्शी बोक्शा “एको ग्याइश्शो मुरुमी साबेर मार देंशो नेंतक देंशा हना
58 ‘एको गुइमी सेल्शो परमप्रभु यावे आ खिं प्रेश्शा, नाक्त सांमी अर्को सेल्नुङ। मेको चहिं गुइमी सेल्शो ममाइ’ देंशो नेंतक” देंमा बाक्त। यूहन्ना २:१९-२१
59 मो देंमा बाक्त हना यो, आन लोव़ मगारमाक्त।
60 मिनु नेल्ल क्येङा ठेयब चढ़ेब बोक्शा, आन दातेमी राप्शा, येसु कली “एकोपुकीमी देंशो लोव़ नेंशा, मार देंनेवे?” दे हिल्लो पवा बाक्त। मर्कूस १५:५; यसैया ५३:७
61 मिनु येसु सिक्सी पा बाक्शा, लोव़ का यो मलेत्ता बाक्त। मिनु नेल्ल क्येङा ठेयब चढ़ेबमी “गे नेल्ल क्येङा मान ताइब परमप्रभु यावे आ तौ ख्रीस्त नवे?” दे हिल्लो पवानु,
62 येसुमी “गो नङ। गे रागीम जरमेशो कली नेल्ल सक्ति पाइश्शो आ ग्युरा गे बाक्शो ताइनीनी। गोस्सुमी गिल्सीशा जाक्ना जाक्न पशो ताइनीनी” दे मदा बाक्त। भजन संग्रह ११०:१; दानीएल ७:१३-१४
63 मिनु नेल्ल क्येङा ठेयब चढ़ेबमी आंम आ फेक्शो वा खाक्शा “परमप्रभु यावे कली शुक्शी लोव़ पाइबाक्त।
64 मार सांकछी माल्दा ङा? आ शुक्शी पशो लोव़ गे नेल्लेमी नेंशा, सांकछी दुम्तीनी। एको कली मार पाइक्चा? मार देंनीनी?” दे माइक्मीनु, नेल्लेमी “साइक्चा माल्ब” देंमा बाक्त। यूहन्ना १९:७
65 मिनु साइक्चा माल्ब देंशा ङा मिन, का निक्शीमी आ कुलम तोक्तमे बाक्त। का निक्शीमी आ मिक्च सुम्शा, तुप्शा “सुमी तुमे? लो देन” दे शुक्शी पामे बाक्त। मिनु सिपाइ आन गुइमी गेमे बाक्त। मेकोपुकीमी तुप्ना तुप्न लदमे बाक्त।
पत्रुसम “मेको कली मतुइक्नुङ” देंशो
66 आगाम मोदेंशो दुम्मेनु, पत्रुस लाङगामी बाक्माक्त। मिनु गेय पाइब मीश मुर कामी जाक्शा,
67 पत्रुस कली मी थेरशो तशा, शिरशा कोव़शा “गे यो मेको नासरथ ङा येसु नु काथा गाक्ब का बाक्ङे बाक्त” देंमाक्त।
68 मिनु पत्रुसमी “इ देंशो मरुबु। मारेइ मतुइक्तु” देंमाक्त। मिनु ग्रूशा, ठेयब लाप्चो ङा लां जाक्दीम्माक्त।
69 मिनु मेको गेय पाइब मीश मुरुमी पत्रुस कली लेंशा तशा, मेकेर बाक्ब आन कली “मेरे यो मेको नु गाक्ब का बाक्त” देंमेनु,
70 पत्रुसमी “गो मनङ, मेको कली मतुइक्नुङ” देंमाक्त। मिनु छिन का नोले मेकेर बाक्बपुकीमी यो “गे मेको नु काथा गाक्ब का बाक्ङे बाक्त, मारदे हना गालील ङा बाक्ङे बाक्त, दे तुंइसीब” देंमानु,
71 पत्रुसमी “जोल पाता हना, यावेमी सजाइ गेयील, इन देंशो मुर कली तुंइसीन मतुइक्नुङ” दे कसम जशा, आ लोव़ थोक्शा देंमाक्त।
72 मो देंम चोटी भाले खेयप निक्शी ग्रीमाक्त। मिनु पत्रुसमी “भाले खेयप निक्शी मग्रीथु, खेयप सां सम्म मेको कली मतुइक्नुङ, सु बाक्म? देंनेवे” दे येसुमी देंशो लोव़ ति फ्रुक्गा बाक्त। मिनु आ पशो मिम्शा ङाक्माक्त।