28
येसु बेक्शो रे सेंसीशा तपांइसीशो
मर्कूस १६:३-१०; लूका २४:१-१०; यूहन्ना २०:१-१८
1 मिनु नाइक्तीक नाक्त सां लाक्शा, हप्ता ङा ङोंइती नाक्त नां सोव़सोव़मी माग्दाला ङा मरीयम नु अर्को मरीयम येसु आ लास वोइक्तीके कोव़थ लसा बाक्त। प्रेरित २०:७; १कोरिन्थी १६:२; प्रकाश १:१०
2 मिनु जाक्दीस्सानु, ठेयब ख्रिनु कुमाक्त। मारदे हना परमप्रभु यावे आ स्वर्ग ङा गेय पाइब का यिशा, सुशो ठेयब फुल्लु तिल्शा, मेको आ तारी निस्से बाक्त।
3 मेको आ कुल चिला पशो खोदेंशो नु आ वा बुबु पा छेङछेङ तांइसे बाक्त। मत्ती १७:२; प्रेरित १:१०
4 मेको कली तशा, मेकेर खाल पाइब सिपाहीपुकी हिंशा ख्रिंख्रि पा थशा गोल्मा बाक्त।
5 मिनु परमप्रभु यावे आ स्वर्ग ङा गेय पाइबमी मीश मुर आस कली “महिनीसे। गे शीमी क्याइश्शा साइश्शो येसु कली माल्थ पिसी ममाइ?
6 मुल एके मबा। मारदे हना ङोंइती देंशो खोदेंशो पा बेक्शो रे सेंचा पुंइसाक्व। प्रभु कली वोइक्तीके कोव़ङीसे। मत्ती १२:४०; मत्ती १६:२१; मत्ती १७:२३; मत्ती २०:१९
7 मुल एके रे फ्रा लेश्शा लशा, आ शेंसीब आन कली ‘प्रभु बेक्शो रे सेंचा पुंइसे बाक्त। इन ङोंइती लशा, गालील जाक्दीप्ब। मिनु गे मेकेर ग्रुम्चा ताइनीनी’ दे शोव़थ लसे। इस कली तुइक्पाइक्तन्सी, मिनु मप्रेंदीसे” दे सोइक्तीम्सी बाक्त। मत्ती २६:३२
8 मिनु मेकेर रे ग्रूशा, हिंसा यो बाक्त, ग्येरसीसा यो बाक्त। मिनु गुरुर पा दोरशा, मेको लोव़ शेंचा, दे आ शेंसीब आन कली ग्रुम्थ लसा बाक्त।
9 मिनु दोरना दोरन लसानु, मार दुम्माक्त देंशा हना, येसुमी मेको आस कली ग्रुम्सी बाक्त। मिनु “आसीक रसील” दे सेत्तीम्सीनु, आ नेक्था जाक्शा बाप्शा, आ खोइल थिशा मान पदसे बाक्त।
10 मिनु येसुमी “महिनीसे। येसु कली ग्रुम्थ गालील लने, दे आं लोक्ब आन कली शोव़थ लसे” दे सोइक्तीम्सी बाक्त। हिब्रू २:११
खाल पाइबपुकीम घूस जशो
11 मेको निक्शी दोरना दोरन लसानु, सिपाही का निक्शी सहरमी जाक्दीश्शा, ठेयब चढ़ेब आन कली मेकेर मार दुम्मे, मेको नेल्ल शोव़ङमे बाक्त।
12 मिनु ठेयब चढ़ेब नु जोक्ब तुइक्ब खाल्पापुकी खुम्सीशा “मुल मार पय?” दे लोव़सी पमुमा बाक्त। मिनु सिपाही आन कली शुश क्येट गेशा
13 “लो, मुर आन कली मार देंचा देंशा हना, नाक्दो इप्कानु, आ शेंसीबपुकी जाक्शा, लास खुइ पामे बाक्त, दे लोव़ फ्रने। मत्ती २७:६४
14 सरकार ङा ठेयब मुरुमी नेंतु हना, नेल्ल गारपाइक्नीकी, इन कली मारेइ मदुम्ब” देंमा बाक्त।
15 मिनु सिपाहीपुकीमी क्येट ताक्शा लशा, मेको मोदेंशो लोव़ तेइ तेइ फ्रामे बाक्त। मुल सम्म यहूदी आन दातेमी एको लोव़ लीशो बाक्ब।
येसु आ लोव़ नेल्ल कली शेंदीन
16 येसु आ शेंसीब ११ जना चहिं येसुमी तुइक्पाइश्शो गालील ङा डांडामी जाक्दीत्तेक्म।
17 मिनु येसु कली तामेनु, मान पाम्तेक्म। का निक्शीमी चहिं दल्गीर पामे बाक्त।
18 मिनु येसु नेल्ल आन नेक्था जाक्शा “स्वर्ग नु रागी ङा अधिकार नेल्ल आं कली गेशो बाक्ब। मत्ती ११:२७; एफिसी १:२०-२२
19 मोपतीके रागीम नेल्ल हिरशा, नेल्ल जात, थर ङा मुर आन कली आं पर्बमी शेंशा, आं नोले खोइक्ब शेंसीब सेलीने। आं आफ, परमप्रभु यावे, आ तौ नु परमप्रभु यावे आ सोक्त आन नेंमी मेको आन कली ब्वाक्कुम ख्रुम्शा ग्रुंइदीने। मत्ती २४:१४; मर्कूस १६:१५-१६; २कोरिन्थी ५:२०
20 मिनु गोमी इन कली मार मार शेंदन्नी, मेको नेल्ल मेको आन कली शेंशा पपतीने। नेनीने, रागी मनुप्ची सम्म गो गेनायो गेपुक नु बाक्नुङ” देंत। मत्ती १६:२०