27
1 मिनु नां सोव़मेनु, ठेयब चढ़ेब नु जोक्ब तुइक्ब खाल्पापुकीमी येसु कली साइक्पाइक्चान, दे सल्ला पामे बाक्त।
2 मिनु फ्रेंशा लाइश्शा, पिलातस, सरकार ङा ठेयब मुर आ गुइमी जिम्मा गेमे बाक्त।
यहूदा ग्युक्शा बेक्शो
3 ग्याइक्पाइक्चा वारच पाइब यहूदामी येसु कली साइक्चा, दे उजुर पाम्तेक्म देंशो नेंशा “मरिम्शो पङा बाक्त। मार पचा ङा मुल” दे ठेयब चढ़ेब नु जोक्ब तुइक्ब खाल्पा आन कली परमप्रभु यावे आ खिंमी ग्रुम्थ लशा मत्ती २६:१५
4 “रिम्शो मुर कली ग्याइक्पाइक्चा वारच पा पाप पाता” देंमेनु “गोपुकीमी मार पाइनीकी? गे आंमा तुइक्तो” देंमा बाक्त।
5 मिनु चांदी मेको आन ङोंइती ताइश्शा, मेकेर रे फो ग्रूशा लशा, ग्युक्शा बेक्माक्त। प्रेरित १:१८-१९
हुशेम ग्याप्शो रू
6 ठेयब चढ़ेबपुकीमी मेको ताइश्शो चांदी गुप्शा “परमप्रभु यावे कली चढ़ेशो क्येट नु काथा वोइक्चा मदुम्ब। मारदे हना हुश के दाम बाक्ब” देब्यवस्था २३:१९
7 सल्ला पशा, खप के ग्योंब सेल्ब आ रू का ग्याप्मे बाक्त। मेको रू यहूदी धर्म मपाइब यरूसलेममी बेक्शो मुर आन कली थिम्तीके पामे बाक्त।
8 मेको रू कली मुल सम्म “हुश रू” देंसीब।
9 मोदेंशो आन पशोमी साइ नेसी परमप्रभु यावे आ लोव़ पाइब येरमीयामी ब्रेक्शो लोव़ थमा दुम्त। आ ब्रेक्शो लोव़ चहिं ओदेंशो बाक्ब “इस्राएल आ खिं ङा मुरपुकीमी एको मुर आ मोल ३० टुक्रा चांदी ङा बाक्ल देंतेक्म।
10 मिनु ३० टुक्रा चांदी लाइश्शा, खप के ग्योंब सेल्ब आ रू ग्याप्तेक्म, दे परमप्रभु यावेमी लोव़ पपाइक्ती” दे ब्रेक्शो बाक्ब। येरमीया ३२:९, जकरिया ११:१२-१३
येसु पिलातस आ ङोंइती राप्शो
11 येसु सरकार ङा ठेयब मुर आ ङोंइती राम्मेनु, मेकोमी “यहूदी आन पिप नवे?” दे हिल्लो पवानु “गे आंमा देंतीनी” देंमाक्त।
12 मिनु ठेयब चढ़ेब नु जोक्ब तुइक्ब खालपापुकीमी शुश दोस गेमेनु, ब्वालेइ पा बाक्माक्त। मत्ती २६:६३; यसैया ५३:७
13 मिनु पिलातसमी येसु कली “एकोपुकीमी इ कली शुश दोस गेशा, लोव़ पशो मनेंनी?” देंमेनु,
14 लोव़ का यो मलेत्ता बाक्त। मिनु सरकार ङा ठेयब मुर आ छक लाक्माक्त। यूहन्ना १९:९
15 पास्सा नाक्त सरकार ङा ठेयब मुर आन दाक्शो मुर का कली जेल्खान रे प्रोंइतीके पशो बाक्माक्त।
16 बारब्बा माइश्शो मरिम्शो पाइब मुर का चोक्सीशो बाक्माक्त।
17 मिनु सरकार ङा ठेयब मुरुमी “बारब्बा कली प्रोंइचा, दे ख्रीस्त देंशो येसु कली प्रोंइचा? तेको कली प्रोंइचा?” दे हिल्लो पामी बाक्त।
18 मारदे हना आन थुं चोशा, येसु कली ग्याइक्पदमे बाक्त, दे तुइक्ता बाक्त, मोपतीके येसु कली प्रोंइचा माला बाक्त। यूहन्ना १२:१९
19 मिनु निसाफ पचा कली बाक्मेनु, आ मीशेमी “मेको सुइ कली मरिम्शो मपाइब कली मारेइ मपतीने। मारदे हना मुलाक्दो इम्ङानु, मेको आ पर्बम गो शुश श्येत जचा ङा ङोमु ताता” दे शोव़थ सोइक्ता बाक्त।
20 तन्न ठेयब चढ़ेब नु जोक्ब तुइक्ब खाल्पापुकीमी मुर आन कली हुल पोक्शा “बारब्बा कली प्रोंइचा, येसु कली साइक्चा” दे रेयके पा पुंइपदमे बाक्त।
21 मिनु पिलातसमी “मुल सु कली प्रोंइचा?” देंमेनु “बारब्बा कली प्रोंइचा, सरकार” देंमा बाक्त।
22 मिनु पिलातसमी “ख्रीस्त देंशो येसु कली मार पदु, मिनु?” देंमेनु “शीमी केप्शा कांटी थोक्शा क्याइश्शा साइक्चा माल्ब, सरकार” देंमा बाक्त।
23 मिनु “मार मरिम्शो पवा, मार दोस गेचा” देंमेनु “शीमी केप्शा कांटी थोक्शा क्याइश्शा साइक्चा माल्ब” दे रेयके पामे बाक्त।
24 मुरपुकीमी मोदेंशो रेयके पा प्रेक्शो तशा “मुल येसु कली प्रोंइने मचबु” दे मिम्शा “एको सुइ कली मरिम्शो मपाइब आ हुश इन गुइमी ला लुम्सेक्ल, आं गुइमी मलुम्सेक्ल” देंशा, नेल्ल आन कुल आ गुइ चिक्शा कोंइदीमी बाक्त। ब्यवस्था २१:६
25 मिनु हुलपुकीमी “आंइ कली नु आंइ चच युइ आन कली लुम्सेक्ल” दे रेयके पामे बाक्त। प्रेरित ५:२८
26 मिनु बारब्बा कली प्रोंइशा सोइक्ता बाक्त। येसु कली कोर्राम युक्पाइश्शा शीमी केप्शा कांटी थोक्शा क्याइश्शा साइक्चा कली आ सिपाही आन गुइमी जिम्मा गेमी बाक्त।
येसु कली क्याइश्शा साइश्शो
27 मिनु सिपाहीपुकीमी येसु कली हेरोद आ दरवार ङा सिपाही बाक्तीकेमी चाक्दीश्शा, आन पल्टन नेल्ल खुप्शा, शुक्शी पदमे बाक्त।
28 आ फेक्शो वा प्रुइश्शा, लल वा फेक्पा
29 चू के सिरपेच सेल्शा, आ पियामी गुप्पा, सुन के कोक्के, दे किन्दा आ ग्युरा गुइमी शेपदमे बाक्त। मिनु आ ङोंइती आन पोक्च थेक्शा “हे यहूदी आन पिप, सेउ ताक्कीन” दे शुक्शी पा सेउ पदमे बाक्त।
30 मिनु आ कुलम तोक्तमे बाक्त। मेको किन्दा रोइश्शा, आ पियामी तेत्मे बाक्त। यसैया ५०:६
31 मिनु शुक्शी पने थुम्शा, लल वा प्रुइश्शा, आंमा आ वा फेक्पा शीमी केप्शा कांटी थोक्शा क्याइश्शा साइक्चा कली लदमे बाक्त।
32 मिनु लना लन पामेनु, साइरेनी ङा सिमोन नें पाइश्शो मुर का ग्रुम्मे बाक्त। मिनु मेको कली येसु कली क्याइक्तीक शी “लो, कुर कि कुर” दे कुरपदमे बाक्त।
33 मिनु गोल्गथा माइक्तीकेमी चाक्दीत्मे बाक्त। गोल्गथा कली खप्परे यो देंसीब।
34 मिनु ग्युरशो अङगुर शांबु खाइल ब्वाइश्शा तूतीके सेल्शा, तूचा गेमेनु, येसुमी थाम्शा ङा मिन, तूने मबिस्से बाक्त। भजन संग्रह ६९:२२
35 मिनु शीमी केप्शा कांटी थोक्शा क्याइश्शा, फेन्टे ग्यारशा आ वासी योक्सीशा, यूहन्ना १९:२४
36 खाल पा बाक्मा बाक्त।
37 “यहूदी आन पिप येसु” दे आ कली दोस गेशा ब्रेक्शो आ पिया तार एरे शीमी केप्तमे बाक्त।
38 मिनु खुइ निक्शी आस कली यो आ कली खोदेंशो पा आ ग्युरा नु पेरा गे क्युक्गमे बाक्त।
39 मिनु कोव़ब मुर शुश जाक्शा, आन पिया हिम्शा भजन संग्रह २२:८
40 “परमप्रभु यावे आ खिं प्रेश्शा, सां नाक्तीमी नक सेल्नुङ देंते। खोइ मिनु, सेल्ने चबी? थमान परमप्रभु यावे आ तौ नवे हना, शीमी केप्शा कांटी थोक्शा क्याइश्शो रे ब्रोंइशा यीवो” दे शुक्शी पामे बाक्त। मत्ती २६:६१; यूहन्ना २:१९
41 ठेयब चढ़ेब, सास्त्री नु जोक्ब तुइक्ब खाल्पापुकीमी यो
42 “शुश आन कली श्येत रे प्रोंइना प्रोंइन गाक्बाक्माक्त। आंमा आ कली चहिं प्रोंइने मचाप्बाक्माक्त। इं इस्राएल ङा पिप बाक्ब, मोपतीके शीमी केप्शा कांटी थोक्शा क्याइश्शो रे ब्रोंइल। ब्रोंइने चाप्तु हना, गो आ लोव़ नेल्ल थमा सुइक्नय।
43 परमप्रभु यावे कली थमा सुइक्बाक्माक्त। मोपतीके परमप्रभु यावेमी एको कली दाक्ताक्व हना, एको श्येत रे प्रोनल। ‘परमप्रभु यावे आ तौ नङ’ देंत, मोपतीके परमप्रभु यावे आ दाक्शो बाक्माक्त” दे शुक्शी पामे बाक्त। भजन संग्रह २२:९
44 आ ग्युरा नु पेरा गे क्युक्शो खुइ निक्शीमी यो मोदेंशो पान शुक्शी पदसे बाक्त।
येसु बेक्शो
45 मिनु नाक्ती १२ बजे रे ३ बजे सम्म नेल्ल रागीमी नां रिक्शो खोदेंशो पा छिङछिङ दुम्त।
46 ३ बजे गे येसुमी “एली, एली, लामा आसबथानी” दे वाइ ब्रेम्माक्त। आ देंशो मार रुम्सीब देंशा हना “परमप्रभु यावे, आं परमप्रभु, आं कली मारदे प्रोंइयीनी” देंशो रुम्सीब। भजन संग्रह २२:२
47 एर ओंथ बाक्बपुकीमी मो देंशा वाइ ब्रेश्शो नेंशा “एलीया कली ब्रेत्ताक्व” देंमुमा बाक्त।
48 मिनु कामी रुवामी ग्युरशो तूतीके नुप्शा, कोक्केम फ्रेंशा, युप्चा गेचवा बाक्त। भजन संग्रह ६९:२२
49 मिनु मेकेर बाक्बपुकीमी “कते, वारच पाइक्थ एलीया जाक्बा कों, कोव़य” देंमा बाक्त।
50 मिनु येसुमी लेंशा वाइ ब्रेश्शा, आ सोक्त प्रोना बाक्त।
येसु बेक्मे नोले चिन्ड ग्रूशो
51 मिनु बेक्म चोटी मार दुम्माक्त देंशा हना, परमप्रभु यावे आ खिं ङा आगा ङा कोठामी बारेशो वा इर रे उइ सम्म उइक्थ पा जेर गाक्माक्त। ख्रिनु कुशा, प्रस्थान २६:३१-३३; २इतिहास ३:१४
52 सेरथे फुल्लु नेल्ल एश्शा ब्रोल्मा बाक्त। लास थिम्तीके यो एश्शा ब्रोल्मा बाक्त। मिनु परमप्रभु यावे कली थमा सुइश्शा बेक्शोपुकी सेंसमा बाक्त।
53 येसु सेंसीशो नोले मेकोपुकी लास वोइक्तीके रे ग्रूशा, सहर जाक्दीश्शा, शुश मुर आन कली तपांइसाक्म।
54 येसु कली खाल पाइब कप्तान नु सिपाहीपुकीमी ख्रिनु कुशा नु मोपा हिंचा ङा गेय दुम्शो तशा, शुश हिंशा “एको परमप्रभु यावे आ तौ बाक्माक्त” देंमुमा बाक्त।
55 गालील रे यरूसलेम सम्म येसु कली वारच पना पन काथा गाक्ब मीश मुरपुकीमी ङोन रे कोव़शा बाक्मा बाक्त। लूका ८:२-३
56 मोपा कोव़ब का माग्दाला ङा मरीयम बाक्माक्त। का याकूब नु योसेफ आस ममा मरीयम बाक्माक्त। का जब्दी आ तौ निक्शी आस ममा बाक्माक्त।
येसु आ लास पुक्खीमी वोइश्शो
57 मिनु नां रिक्मेनु, येसु आ नोले खोइक्ब अरीमाथीया ङा योसेफ माइश्शो शोंप पाइश्शो मुर कामी पिलातस कली ग्रुम्थ लशा, ब्यवस्था २१:२२,२३
58 “येसु आ बेक्शो रां लाइक्चा गेयीनी” दे पुना बाक्त। मिनु पिलातसमी लाइक्चा गेवा बाक्त।
59 मिनु योसेफमी लास बुश नक वामी गिल्शा,
60 आंम आ लास वोइक्तीके सेल्शो रोंगु ङा पुक्खीम ओंइशा वोदा बाक्त। मिनु पुक्खी कली ठेयब फुल्लुमी सुशा वोइश्शा गाक्माक्त।
61 माग्दाला ङा मरीयम नु अर्को मरीयममी योसेफ आ नोले खोइश्शा लशा, लास वोइक्तीके पुक्खी आ ङोंइती बाक्सा बाक्त।
फुल्लुम लाहा छाप थोक्शो
62 मेको नेल्ल दुम्शो आ दीसा ठेयब चढ़ेब नु फरिसीपुकीमी पिलातस कली ग्रुम्थ लशा मर्कूस १५:४२
63 “सरकार, एको नेल्ल आन थुं क्याल्पाइक्ब मबेक्थु बाक्मेनु, मार देंत देंशा हना ‘आं बेक्शो नित्थ नाक्त बेक्शो रे सेंपांइसीचा पुंइसीनुङ’ देंशो फ्रुक्तक। मत्ती २०:१९
64 मोपतीके मेको आ लास वोइक्तीकेमी सां नाक्त सम्म खाल पाइब वोइक्चा माल्ब। मारदे हना मेको आ नोले खोइक्बपुकीमी आ लास खुइ पा लाइश्शा, मुर आन कली ‘बेक्शो रे सेंसाक्व’ दे शेंना शेंन गाक्तेक्म हना, ङोंइती रे पशो क्येङा शुश जोल ग्रूब” दे पुन्मे बाक्त।
65 मिनु पिलातसमी “लो, सिपाही आन कली सोइक्नुङमी। गेपुकी यो चाप्नी सम्म कोव़ङीन” देंशा, आन देंशो बिश्शा सोइक्तीमी बाक्त।
66 मिनु सिपाहीपुकी नु लशा, मेक जाक्दीश्शा, सुशो फुल्लुमी लाहा छाप थोक्शा, खाल पा बाक्मा बाक्त।