26
येसु कली साइक्चा माल्शो
मर्कूस १४:- १६:-; लूका २२:- २४:-; यूहन्ना १८:- २१:-
1 मिनु येसुमी लोव़ नेल्ल शेंने थुम्शा, आ शेंसीब आन कली
2 “नित्थ नाक्त पास्सा चाड बाक्ब, दे तुइक्नीनी। मिनु रागीम जरमेशोमी शीमी केप्शा कांटी थोक्शा क्याइश्शा साइक्चा कली जिम्मा गेचा पुंइसीब” देंत। प्रस्थान १२:१-२०; मत्ती २०:१८
3 मेना नेल्ल क्येङा ठेयब चढ़ेब काइयाफास आ खिंमी ठेयब चढ़ेब नु जोक्ब तुइक्ब खाल्पापुकी खुम्सीमा बाक्त। लूका ३:१-२
4 मेकोपुकीमी “मुर आन मतुइक्थु येसु कली दोपा ग्याइश्शा साइक्पाइक्चा” दे सल्ला पामेनु
5 “पास्सा नाक्त साइक्पाइक्चा मदुम्ब। मारदे हना मुरपुकीमी जिचा पोक्नीम” देंमुमा बाक्त।
येसु कली ब्रोव़शो तेल ख्रेक्शो
लूका ७:३६-५०; यूहन्ना १२:१-८
6 काबु येसु नु आ शेंसीबपुकी बेथानी ङा कोर पशो सिमोन आ खिंमी खमे जना जन बाक्मानु,
7 मीश मुर कामी ब्रोव़शो रिना पाइब शुश क्येट लाइब तेल कुरशा जाक्शा, मेको तेल येसु आ पियामी लुक्ताक्व।
8 मिनु येसु कली तेल लुक्शो तशा, आ शेंसीबपुकीमी “ओदेंशो तेल मारदे मो पवा?
9 लेयशा हना, शुश क्येट पी वा। मिनु श्येत जशो आन कली योक्शा, वारच पने जाम वा” दे आन थुं मनुमा बाक्त।
10 मिनु येसुमी मेको आन थुं मनुशो तुइश्शा “एको मीश मुर कली मारदे आ थुं खाइक्पाइक्नीनी? आं कली थम रिम्शो पाइक्ती।
11 श्येत जशो मुर गेना हना यो थित्नीनी, आं कली चहिं मथित्नीनी। ब्यवस्था १५:११
12 एको तेल लुक्शोमी आं रां थिम्चा कली साशो दुम्त।
13 नोफा दाइश्शा नेनीने, रागीमी तेक तेक आं लोव़ नेंपाइक्नीमी, मेक मेक एको मीश मुर आ पशो आ पर्बम यो लोव़ पाइनीम” देंत।
यहूदा आ पशो
14 मिनु इस्कारीयोत ङा यहूदा येसु आ शेंसीब का ठेयब चढ़ेब आन कली ग्रुम्थ लशा
15 “येसु कली इन गुइमी ग्याइक्पाइक्ता हना, दोशो गेनीनी” देंमेनु, ३० टुक्रा चांदी गेमे बाक्त। यूहन्ना ११:५७; जकरिया ११:१२
16 मिनु मेको चांदी ताक्गा रे “गेना नु दोपा ग्याइक्चा वारच पदुमी” दे योव़की पना पन गाक्माक्त।
पास्सा चाड ङा भोज
यूहन्ना १३:२१-२६
17 मिनु बोरब ओख्ती मसुप्शो शोब्ले जची नाक्त येसु आ शेंसीबपुकीम “पास्सा मानेचा कली ते साचा, मार देंनीनी” दे हिल्लो पाम्तेक्म। प्रस्थान १२:१८-२०
18 येसुमी “सहर लशा, आं कली तुइक्ब मुर कली ग्रुम्शा ‘शेंबमी आं कली दुम्चा माल्शो मुल दुम्चाप्तु। मोपतीके इन खिंमी बास गेशा, आं शेंसीब नु काथा बाक्शा, पास्सा मानेचा गेयी, दे पुंइथ सोइक्ताक्की’ दे मतीन” दे सोइक्ताक्मी। मत्ती २१:३
19 मिनु शेंसीबपुकीमी येसु आ देंशो खोदेंशो पा पास्सा मानेचा कली नेल्ल साताक्म।
20 मिनु नां रिक्मेनु, येसु आ शेंसीबपुकी नु काथा जचा कली निस्साक्व।
21 मिनु जना जन बाक्मानु, येसुमी “नोफा दाइश्शा नेनीने, मुल एक बाक्ब कामी आं कली ग्याइक्ब आन वारच पाइब दुम्ब” देंत।
22 मिनु नेल्लेमी शुश मरिम्शो लाक्शा “हे प्रभु, मेको वारच पाइब गो दुम्नुङा?” दे का का पा हिल्लो पाम्तेक्म।
23 मिनु येसुमी “गो नु कालेम शोब्ले शेक्कुम तेप्बमी आं कली ग्याइक्पाइक्चा वारच पाइब।
24 रागीम जरमेशो आ पर्बमी ब्रेक्शो साइ नेसी ङा लोव़ नेल्ल थमा दुम्चा माल्ब। मो दुम्चा माल्शो बाक्त हना यो, ग्याइक्पाइक्चा वारच पाइब कली थमा मरिम्शो दुम्ब। मोदेंशो पाइब मुर मजरमेशो हना, मेको कली रिम्शो दुम्ब वा” देंत। लूका १७:१-२
25 मिनु ग्याइक्चा वारच पाइब यहूदामी यो “शेंब, मेको गो दुम्नुङा?” देंमेनु “आंमा तुइक्नेवे” दे माइक्तु।
26 मिनु जना जन बाक्मानु, येसुमी आ गुइमी शोब्ले शेशा “गे रिम्शो पाइब बाक्नीनी” दे प्रार्थना पशा जिक्शा, शेंसीब आन कली योक्शा “दांइसीने, ताक्शा जने। एको आं रां बाक्ब” देंत। १कोरिन्थी १०:१६; १कोरिन्थी ११:२३-२५
27 मिनु कचौरा शेशा “गे रिम्शो पाइब बाक्नीनी” दे प्रार्थना पशा, मेको आन कली तूचा गेशा “गे नेल्लेमी तूङीने।
28 एको आं हुश बाक्ब। आं हुशेमी परमप्रभु यावे आ नक कबल खाप्ता। आं हुश जारशोमी शुश मुर आन पाप क्याम्सीब। प्रस्थान २४:८; येरमीया ३१:३१; हिब्रू ९:१५-१६
29 मुल ङा मेरे एको अङगुर रस मतूनुङ, नोले नेल्ल नक दुम्शा, आं आफ आ राज्यमी गेपुकी नु काथा बाक्शा ला तूनुङ, दे इन कली देंनुङ” दे माइक्तीमी। भजन संग्रह ११३:-११८:-
नेल्लेमी प्रोंइनीम, दे शेंशो
30 मिनु कुम्सो का पशा ङा मीन, मेकेर रे गाक्शा, जैतून डांडा ग्येत्थ लाम्तेक्म।
31 मिनु येसुमी “आपो नाक्दो गे नेल्लेमी आं कली तशा, इन थुं ग्याइक्नीनी। मारदे हना साइ नेसी ओदें ब्रेक्शो बाक्ब। ‘गो गोठला कली तुप्शा क्रेक्नुङ। मिनु भेडापुकी प्रोक्शा साव सुव ब्राइनीम’ दे ब्रेक्शो लोव़ थमा दुम्ब। जकरिया १३:७; यूहन्ना १६:३२
32 नोले गो बेक्शो रे सेंपाइक्चा पुंइसीशा, इन ङोंइती गालील रागीमी जाक्दीत्नुङ” देंत। मत्ती २८:७
33 मिनु पत्रुसमी “मेको नेल्लेमी इन कली प्रोंइशा प्रोक्तेक्म हना यो, गो मप्रोंइनन्नी” देंमेनु,
34 येसुमी “नोफा दाइश्शा नेनो, आपो नाक्दो भाले ग्रीचा ङोंइती खेयप सां सम्म ‘मेको कली मतुइक्नुङ, सु बाक्मे?’ दे आं पर्बम देंनेवे” देंत। यूहन्ना १३:३८
35 मिनु पत्रुसमी “मप्रोंइनन्नी। गे नु काथा बाक्शा, साइक्चा पुंइसाक्ङ हना यो, गेनायो मप्रोंइनन्नी” दे लोव़ थोक्शा देंत। मिनु शेंसीब नेल्लेमी यो मोन देंतेक्म।
गेथ्सेमनेमी प्रार्थना पशो
36 मिनु गेथ्सेमनेमी जाक्दीत्तेक्म। मिनु येसुमी “लो, एक बाक्कीने, गो इच्का आइक्ची लशा, प्रार्थना पशा लेश्शा पीनुङ” देंत।
37 पत्रुस नु जब्दी आ तौ निक्शी, सां आन कली इच्ची आइक्ची लाइक्तु। मेना येसु आ थुं शुश खाइश्शो बाक्माक्त। मत्ती १७:१; हिब्रू ५:७
38 मिनु सां आन कली “आं थुं शुश खाइश्शा, बेक्चा ङा दुम्ती। मुल एकेर मइप्थु गो नु काथा बाक्कीन” देंमाक्त। यूहन्ना १२:२७
39 मिनु इच्का ङोंइती लशा, खुम्की पा खपीम बाप्शा “आं आफ, दुम्ब हना, एको कचौरा आं कली मतूपाइक्थु सोइक्तीने। तन्न आं दाक्शो मदुम्ल, इन दाक्शोन दुम्ल” दे प्रार्थना पशा, लेश्शा जाक्माक्त। यूहन्ना १८:११; यूहन्ना ६:३८; हिब्रू ५:८
40 मिनु लेश्शा जाक्मेनु, सांफा आन कली इप्शो तामी बाक्त। मिनु पत्रुस कली “छिन का यो मइप्थु, बाक्ने मचाप्नी? लो, सेंसीने।
41 थुं थाम्चा पुंइसीनीनु, पाप मपय, दे प्रार्थना पने। थुंमी पाइनुङ चाप्नुङ देंब, तन्न रांमी फाल्ने मचाप्ब” देंमाक्त। एफिसी ६:१८; हिब्रू २:१८
42 मिनु लेंशा इच्का आइक्ची लशा “आं आफ, गोमी एको मतूथु सोइक्चा मदुम्बाक्त हना, इन दाक्शो दुम्ल” दे प्रार्थना पवा बाक्त।
43 मिनु लेश्शा जाक्मेनु, निन्द्रामी दुक्शा बाक्शो तामी बाक्त।
44 मिनु मेको आन कली निन्द्रामी दुक्शो तशा, लेंशा लशा ङोंइती ङा पशो खोदेंब पा प्रार्थना पवा बाक्त। २कोरिन्थी १३:८
45 मिनु लेश्शा, शेंसीब आन बाक्तीकेमी जाक्शा, मेको आन कली “इन दशो सानी, दे मुल यो इप्शो बाक्नी? तुइक्तीन, रागीम जरमेशो पापी आन गुइमी गेचा पुंइसीचा चिक्ताक्व।
46 बोक्कीन, लय। आं कली ग्याइक्पाइक्चा कली वारच पाइब जाक्चाप्तु” देंत।
येसु ग्याइक्चा पुंइसीशो
47 मो देंमेनु, आ शेंसीब यहूदामी ठेयब चढ़ेब नु जोक्ब तुइक्ब खालपापुकीमी सोइश्शो हुलमी तरवार कोक्के कुरशा, येसु कली ग्याइक्थ चाक्तीमी।
48 यहूदामी “सु कली पुक्पु पदु, मेको कली ग्याइक्चा” दे ग्याइक्थ जाक्ब आन कली तुइक्पाइश्शो बाक्माक्त।
49 मिनु यहूदामी जाक्शा, येसु कली “रब्बी” दे बे मुप्शा पुक्पु पाइक्तु।
50 मिनु येसुमी “आं वारच, मार पथ जाक्ङे लो पावो” देंत। मिनु ग्याइक्थ जाक्बपुकीमी येसु कली ग्याइक्ताक्म।
51 मिनु येसु नु काथा बाक्ब कामी तरवार ग्रि शोइश्शा, ठेयब चढ़ेब आ गेय पाइब का आ नोफा दि ख्रोइक्तु।
52 मिनु येसुमी “इ तरवार पिप्तो। मारदे हना तरवारम साइक्ब, तरवारमी साइक्चा पुंइसीब। उत्पत्ती ९:६
53 आं आफ कली ‘आफ, इन स्वर्ग ङा गेय पाइब हजार हजार आन कली सोइश्शा, आं कली वारच पा प्रोंइपाइय्यीनी’ दे पुंइता हना, गिश हना यो सोइश्शा, आं कली प्रोंइपाइक्ब, दे मतुइक्नीनी? १२ खेयप ६ हजार स्वर्ग ङा गेय पाइब ब्रेक्शो बाक्ब। मत्ती ४:११
54 मोदें पुंइता हना, साइ नेसी ङा लोव़ दोपा थमा दुम्ने चाप्बा ङा?” दे माइक्तु।
55 मिनु येसुमी हुल आन कली “तरवार कोक्के कुरशा, खुइ पाइब कली ग्याइक्थ जाक्शो खोदेंब पा आं कली ग्याइक्थ जाक्नी? नाक्त किंत किंत परमप्रभु यावे आ खिंमी मुर आन दातेमी शेंना शेंन बाक्ङानु, मग्याइक्तीनी।
56 परमप्रभु यावे आ लोव़ पाइब आन ब्रेक्शो लोव़ नेल्ल थमा दुम्चा माल्ब, मोपतीके आं कली ओदेंशो दुम्चा माल्ब” दे माइक्तीमी। मिनु आ शेंसीबपुकी येसु कली प्रोंइशा, साव सुव ब्राशा प्रोक्तेक्म।
येसु ठेयब चढ़ेब आ ङोंइती
57 मिनु येसु कली ग्याइक्बपुकीमी मेकेर रे लाइश्शा, नेल्ल क्येङा ठेयब चढ़ेब काइयाफास आ खिंमी चाक्दीत्मे बाक्त। मेकेर सास्त्री नु जोक्ब तुइक्ब खाल्पा नेल्ल खुम्सीशा बाक्शो बाक्मा बाक्त।
58 पत्रुस यो आन नोनोले खोइश्शा, मेकेर जाक्दीम्माक्त। मिनु लाङगा ओव़शा, नेल्ल क्येङा ठेयब चढ़ेब आ गेय पाइबपुकी नु काथा बाक्शा, मिनु गेपुकी परमप्रभु यावे, इन परमप्रभु कली इन थुं नेल्लेमी, इन सोक्त नेल्लेमी नु इन बोल नेल्लेमी दाक्चा माल्नीनी। कली मार पाइनीमी, मार देंनीमी, दे कोव़शा बाक्माक्त।
59 मिनु ठेयब चढ़ेब नु जोक्ब तुइक्ब खालपापुकी मार पामे बाक्त देंशा हना, कछडी वोइश्शा, जोल पा दोस गेचा माल्मे बाक्त। मारदे हना येसु कली साइक्पाइक्चा माल्शो बाक्मा बाक्त।
60 मिनु सांकछीपुकी शुश चाक्शा यो, मेको आन लोव़ मगारमाक्त। मोपतीके दोसी सेल्ने मचाप्बमे बाक्त। नोले सांकछी निक्शी आस लोव़
61 “एको ग्याइश्शो मुरुमी साबेर मार देंत देंशा हना ‘परमप्रभु यावे आ खिं प्रेश्शा, नाक्त सांमी नक सेल्नुङ’ देंत” देंसा बाक्त। प्रेरित ६:१४; यूहन्ना २:१९-२१
62 मिनु नेल्ल क्येङा ठेयब चढ़ेबमी बोक्शा, येसु आ ङोंइती राप्शा “मेको निक्शीमी इ पर्बम देंशो लोव़ नेंशा, मार देंनेवे?” देंमेनु, येसुमी मारेइ मदेंमाक्त।
63 मिनु नेल्ल क्येङा ठेयब चढ़ेबमी “ब्रोंइशा बाक्ब परमप्रभु यावे आ नेंमी हिल्लो पाइनन, गे परमप्रभु यावे आ तौ ख्रीस्त नवे, दे मनवे?” देंमेनु, मत्ती २७:१२; यूहन्ना १०:२४
64 येसुमी “गे आंमा देंतीनी। मुल ङा मेरे रागीम जरमेशो कली नेल्ल सक्ति पाइश्शो आ ग्युरामी बाक्शो ताइनीनी। गोस्स तारी बाक्शा, यिना यिन पशो ताइनीनी, दे गो इन कली देंनुङ” दे मदा बाक्त। भजन संग्रह ११०:१; मत्ती १६:२७; मत्ती २४:३०; दानीएल ७:१३
65 मिनु नेल्ल क्येङा ठेयब चढ़ेबमी आ फेक्शो वा खाक्शा “ये, परमप्रभु यावे कली शुक्शी लोव़ पाइबाक्त। मार सांकछी लोव़ माल्दा ङा? आ शुक्शी पशो लोव़ गे नेल्लेमी नेंशा, सांकछी दुम्तीनी। लेवी २४:१६; यूहन्ना १०:३३; यूहन्ना १९:७
66 मार पय, मिनु?” देंमेनु “साइक्चा पुंइसीब” देंमा बाक्त।
67 मिनु साइक्चा पुंइसीब देंमानु, का निक्शीमी आ कुल तोक्तमे बाक्त, का निक्शीमी तुप्मे बाक्त, का निक्शीमी चोव़चो राप्शा यसैया ५०:६
68 “ए ख्रीस्त, सुमी राम्मे, लो देन” दे शुक्शी पा मरिम्शो पदमे बाक्त।
पत्रुसमी “मतुइक्नुङ” देंशो
69 मेना पत्रुस लाङगामी बाक्माक्त। मिनु गेय पाइब मीश मुर कामी “गे यो गालील ङा येसु नु काथा गाक्ब का नवे” देंमेनु,
70 मेकेर बाक्ब नेल्लेमी नेंचा ङा पा “इ देंशो मरुबु। मार लोव़ पवी?” देंमाक्त।
71 मिनु लाङगामी ग्रूमेनु, मेकेर गेय पाइब मीश मुर कामी “नासरथ ङा येसु नु काथा गाक्ब का एको यो बाक्माक्त” दे मेकेर बाक्ब आन कली देंमाक्त।
72 मिनु पत्रुसमी “मेको मुर कली मतुइक्नुङ” दे कसम जशा आ लोव़ थोक्शा देंमाक्त।
73 मिनु मेको एर ओंथ बाक्बपुकी जाक्शा, पत्रुस कली “गे यो काथा गाक्ब का बाक्ङे बाक्त। इ ब्वाक्स नेंशा, गालील ङा बाक्ङे बाक्त, दे तुंइसीब” दे मदमे बाक्त।
74 मिनु पत्रुसमी “जोल पाता हना, परमप्रभु यावेमी सजाइ गेयील, एको मुर कली तुंइसीन मतुइक्नुङ” दे कसम जशा, आ लोव़ थोक्शा देंमाक्त। मो देंमेनु, भाले ग्रीमाक्त।
75 मिनु पत्रुसमी “भाले ग्रीचा ङोंइतीन सां खेयप सम्म मेको मुर कली मतुइक्नुङ, देंनेवे” दे येसुमी देंशो ति फ्रुक्गा बाक्त। मिनु ग्रूशा शुश ङाक्माक्त।