8
कोर पाइब कली सापाइश्शो
मर्कूस १:४०-४४; लूका ५:१२-१४
1 मिनु येसु डांडा रे लेश्शा यिमेनु, शुश मुरुमी आ नोले खोदमे बाक्त।
2 मिनु मार दुम्माक्त देंशा हना, कोर पाइब का जाक्शा, येसु आ ङोंइती आ पोक्च थेक्शा “प्रभु, सापाइक्चा दाक्ताक्नी हना, आं कली सापाइक्ने चाप्नीनी” देंमाक्त।
3 मिनु येसुमी आ गुइ दिंशा, कोर पाइब कली थिशा “गो सापाइक्चा दाक्नुङ” देंमेनु, ब्रा सामाक्त।
4 मिनु येसुमी “सुइ कली मशोव़चा, चढ़ेब आ ङोंइती लशा, इ साशो रां कोंइदो। मिनु मोसामी मार चढ़ेचा माल्ब देंशो बाक्मे, मेको चढ़ेशा, सामाक्त, दे तुइक्पतो” दे मदा बाक्त। मर्कूस ८:३०; लेवी १४:२-३२
कप्तान आ गेय पाइब सापाइश्शो
लूका ७:१-१०; यूहन्ना ४:४६-५३
5 मिनु कापेरनाउम सहर लेश्शा जाक्मेनु, कप्तान का येसु कली ग्रुम्थ पिमाक्त।
6 मिनु “प्रभु, आं गेय पाइब रोइमी गुरशा, आ गुइ खोइल मदुक्ब दुम्शा, गोल्शा बाक्शो बाक्ब” दे शोव़ङा बाक्त।
7 मिनु येसुमी “इन खिंमीन पिशा सापाइक्नुङ” दे मदानु
8 “प्रभु, श्येत मपने, गो इन कली आं खिं ओंइचा मशिरनुङ। लोव़ ला देनीने। मिनु आं गेय पाइब साब।
9 मारदे हना अधिकार तचा दा गो यो अधिकार तशो नङ, अधिकार पाइनुङ, अधिकारमीन बाक्नुङ। गोमी सिपाही का कली ‘लावो’ दे सोइक्तुनु, लाइब। का कली ‘पिवो’ दे ब्रेत्तुनु, पीब। आं वाइल कली ‘एको गेय पावो’ दे मदुनु, पाइब” देंमाक्त।
10 येसुमी मोदेंशो नेंशा, आ नोले खोइक्ब आन कली “ओहो, नोफा दाइश्शा नेनीने, एको कप्तान खोदेंशो थमा सुइक्ब इं इस्राएल जात ङा मुर सुइ मतङमी। मर्कूस ६:६; लूका १८:३
11 गो मार देंनुङ देंशा हना, नां दाप्तीके नु नां पेरतीके रे शुश मुर जाक्नीम। मिनु स्वर्ग ङा राज्यमी ओव़शा, इं किकी पिपी अब्राहाम, इसहाक नु याकूब नु काथा बाक्नीम। लूका १३:२८-२९
12 एको राज्य ङा मुरपुकी चहिं तिल्शा, छिङछिङमी सोइक्चा पुंइसीनीम। मेकेर मुरपुकी आन ख्रुइ शेप्शा ङाक्नीम” देंमाक्त।
13 मिनु येसुमी कप्तान कली “इन खिं लने, इन थमा सुइश्शो खोदेंशो दुम्ल” दे सोइक्ता बाक्त। मो देंम रे आ गेय पाइब यो सामाक्त। मत्ती ९:२९; मत्ती १५:२८
पत्रुस आ खिंमी
मर्कूस १:२९-३४; लूका ४:३८-४१
14 मिनु येसु पत्रुस आ खिं जाक्दीश्शा ओव़मेनु, पत्रुस आ शिमी जरो पा गोल्शो तवा बाक्त। १कोरिन्थी ९:५
15 मिनु आ गुइ थिवानु, जरोम थु प्रोना बाक्त। मिनु छुल बोक्शा, येसु कली जचा तूचा गेवा बाक्त।
16 में नाक्दो वोलमी सुम्शो शुश मुर आन कली चाक्गमे बाक्त। मिनु वोल आन कली लोव़ रे खेरमी बाक्त। रोइ पाइब नेल्ल आन कली सापाइक्मी बाक्त।
17 मो पवानु, साइ नेसी यसैयामी देंशो लोव़ “मेकोमी आंइ गुरपाइक्ब रोइ लाइक्तु। आंइ रोइ नेल्ल कुरतु” देंशो लोव़ थमा दुम्माक्त। यसैया ५३:४
निक्शी थुं मपथु, येसु कली खोइक्चा
लूका ९:५७-६०
18 मिनु येसुमी शुश मुर देल्शो तशा “एकेर रे लशा, समुन्द्र शोक्शा आइक्ची हांबु लय” देंमाक्त।
19 मिनु सास्त्री कामी येसु कली “शेंब, तेक तेक लनी, मेक मेक गो यो लाइनुङ” देंमाक्त।
20 मिनु येसुमी “फ्याउरे आन बाक्तीके ढोडोङगा बाक्ब। चिक्ब आन बाक्तीके ग्योव़ बाक्ब। रागीम जरमेशो के बाक्तीक मबाक्ब” देंमाक्त। २कोरिन्थी ८:९
21 मिनु येसु आ नोले खोइक्ब मुर कामी “प्रभु, ङोंइती लशा, आं आफ कली थिम्चा गेयीनी” देंमाक्त। मत्ती १०:३७
22 मिनु येसुमी “आं नोले खोइय्यी। बेक्शो मुरुमी बेक्शो कली थिम्मेक्ल” दे मदा बाक्त।
फश गिवार तेक्शो
मर्कूस ४:३५-४१; लूका ८:२२-२५
23 मिनु समुन्द्र शोक्सीचा कली डोंगाम ङोंइसेनु, आ शेंसीबपुकीमी आ नोले खोदमे बाक्त।
24 मिनु शोक्समानु, ठेयब फश गिवार पतीके डोंगाम ब्वाक्कु ओव़शा ग्रुम्चामे बाक्त। येसु चहिं इप्शो बाक्माक्त।
25 मिनु शेंसीबपुकीमी हिंशा येसु कल पोक्शा “प्रभु, गो नेल्ल ग्रुम्शा बेक्चांइतय, है” दे वाइ ब्रेम्मा बाक्त।
26 मिनु येसुमी “मारदे हिंनी? गे थमा पा थमा सुइक्ने मचाप्बपुकी” देंशा बोक्शा, फश नु समुन्द्र आस कली हुइक्ता बाक्त। मिनु सिक्सी पाम्से बाक्त। भजन संग्रह ८९:१०; प्रेरित २७:२२,३४
27 मोदेंब पशो तशा “ओहो, एको मुर सु बाक्म माइ? फश नु समुन्द्रमी यो आ लोव़ टीबाक्ताक्से” देंमुमा बाक्त।
वोल आन कली खेरशो
मर्कूस ५:१-१७; लूका ८:३६-३७
28 मिनु आइक्ची हांबु शोक्सीशा, गदरीनी आन रागी जाक्दीम्मा बाक्त। मेकेर लांम गाक्मानु, वोलम गपाइश्शो मुर निक्शी ग्रुम्मे बाक्त। मेको निक्शी चहिं बेक्शो मुर वोइक्तीके पुक्खीम बाक्शा, लां गाक्ब आन कली बाप्शा, श्येत गेशा सुइ आन कली लचा मगेबाक्सा बाक्त।
29 मिनु मार दुम्माक्त देंशा हना, मेको निक्शीमी “परमप्रभु यावे आ तौ, गे नु गोपुकी मार पमुइया ङा? आंइ कली श्येत गेची मजाक्थु, मुल कना श्येत गेथ जाक्नी?” दे ग्रीसा बाक्त। लूका ४:४१; २पत्रुस २:४; याकूब २:१९
30 मेकेर आ नेक्था ङा डांडामी शुश पोव़ जोन जोन बाक्शो बाक्मा बाक्त।
31 मिनु वोलपुकीमी “आंइ कली खेरनीनी हना, मेरे पोव़ आन रांमी ओव़चा गेकी” दे पुन्मे बाक्त।
32 मिनु येसुमी “लने” दे सोइक्तीमी बाक्त। मिनु मुर रे ग्रूशा, पोव़मी ओव़दीम्मा बाक्त। मिनु पोव़ नेल्ल गशा, डांडा रे यिना यिन समुन्द्रम प्रेक्ना प्रेक्न ग्रुम्शा बेक्मा बाक्त।
33 पोव़ योव़बपुकीमी मो दुम्शो तशा, प्रोक्शा सहरम जाक्दीश्शा, मेको वोलम सुम्शो आस कली मार दुम्मे, मेको नेल्ल शोव़ङमे बाक्त।
34 मिनु सहर ङा मुर नेल्ल येसु कली कोव़थ जाक्मा बाक्त। मिनु “आंइ रागी रे लने” दे पुन्मे बाक्त।