3
यरूसलेम आ नोले ङा नाक्त
1 मेकोमी “आं देंशो गेनायो मटीब, ग्रांग्रा दिचा ङा नु मुर आन कली दिप्ब सहर बाक्ब।
2 मेकोमी सुइ आन देंशो मटीब। रिम्शो पचा कली हुइश्शो लोव़ मनेंब। मेकोमी परमप्रभु यावे कली थमा मसुइक्थु, आ परमप्रभु आ नेक्था मजाक्ब।
3 मेको सहर ङा सरकार ङा ठेयब मुर ग्रीब गुप्स खोदेंशो बाक्नीम। मेको आ निसाफ पाइब नाक्दो गाक्शा, सुनी सम्म मारेइ महेंब फर नम। इजीकीएल २२:२७
4 मेको आ परमप्रभु यावे आ लोव़ पाइबपुकी हेंथे पाइब नु थमा मसुइक्चा ङा मुर बाक्नीम। मेको आ चढ़ेबपुकीमी परमप्रभु यावे आ खिं ग्रांग्रा दिशो सेल्नीम। मेकोपुकीम परमप्रभु यावे आ अरेशो लोव़ हेंथे सेल्तेक्म। मीका ३:११
5 मेको आन दातेम बाक्ब परमप्रभु यावे ठीक पाइब बाक्ब। मेकोमी मारेइ मरिम्शो मपाइब। मेकोमी सुनी कुस कुस निसाफ पाइब। तेकोइ सुनी मप्रोंइब। तन्न ठीक मपाइबपुकी मुने दोक्शा लल मजिनीम।
6 गो रागी रागी ङा मुर आन कली खतम पोक्ता। मेको आन ब्रोंइशा बाक्तीक खिं प्रेश्शा गेता। मेको आन लां नेल्ल श्येत्थ सेल्ता। मेकेर रे सुइ मगाक्नीम। मेको आन सहरपुकी श्येत्थ बाक्नीम। मेकेर सुइ मुर मबाक्नीम।
7 मो पङा नोले मेको सहर ङा मुरपुकी आं कली तशा मान पा हिंनीम। आं देंशो पाइनीम, दे मिम्ताङ। तन्न मेकोपुकीमी ङोंइती क्येङा मरिम्शो गेय पाम्तेक्म” देंत।
8 परमप्रभु यावेमी “मोपतीके लोव़ पचा कली गो मजाक्ङा सम्म आं कली रिम्शा बाक्कीन। गो रागी रागी ङा मुर आन कली खुप्नुङ। गो राज्य राज्य ङा मुर आन कली ग्रुम्पाइक्नुङ। मेको आन तारी आं गाइश्शो मोइक्नुङ। मारदे हना आं मी खोदेंशो पा गाइश्शोमी रागी रागी नेल्ल ग्रोइश्शा खतम दुम्नीम। योएल ४:२; भजन संग्रह ७९:६
9 मेना जात जात ङा मुर आन कली रिम्शो लोव़ पाइब सेल्नुङ। मिनु मेको नेल्लेमी परमप्रभु यावे कली पुंइशा ठेयब सेल्मेक्ल। मेको नेल्ल गारशा आ गेय पामेक्ल।
10 मिनु आं नें ठेयब सेल्ब एथीयोपीया ङा खोला आइक्ची हांम ङा ब्रशा बाक्शो आं मुरपुकीमी आं कली चढ़ेतीक थोव़क चाक्नीम। भजन संग्रह ६८:३२; यसैया १८:१; प्रेरित ८:२७
11 मेको नाक्त आं कली मटिशो आ पर्बम गे मुने दोक्चा ममाल्नीनी। मेना इ दाते ङा ठेयब लेश्शो मुर आन कली ग्रुंइनुङमी। आं डांडामी गे लेंशा ठेयब लेश्शो मदुम्नेवे।
12 गो इ दातेमी ब्रेम्शो नु प्रुङग मुर लीचा गेनुङमी। मेकोपुकीम ‘परमप्रभु यावे आंइ कली वारच पाइब बाक्ब’ दे थमा सुइक्नीम। इजीकीएल ६:८
13 इस्राएल ङा लीशोपुकीमी लेंशा दूली मपाइनीम। मेकोपुकीमी जोल मपाइनीम। हेंथे लोव़ मपाइनीम। मेकोपुकी जशा तूशा गोल्शा बाक्नीम। सुइम मेको आन कली हिंच मकोंइनीम।
14 सियोन आ तमी, ठेयब सेंदा पा कुम्सो पावो। इस्राएल, ठेयब सेंदा पा ग्रीङो। यरूसलेम आ तमी इ थुं नेल्लेम ग्येरशा सोम्शा बाक्को।
15 परमप्रभु यावेमी इ सजाइ क्याम्शा गेशो बाक्ब। मेकोमी इ जोरी सत्रु आन कली सोइश्शो बाक्ब। इस्राएली आन पिप, परमप्रभु यावे गे नु बाक्ब। मुल ङा मेरे गे तेकोइ श्येत रे हिंचा ममाल्नेवे। जकरिया ९:९
16 मेको नाक्त यरूसलेम कली सियोन ङा मुर महिनीन। गे शुश गेय पने।
17 परमप्रभु यावे, इन परमप्रभु इन दातेमी बाक्ब। मेको बोल्यो बाक्शा, श्येत रे प्रोंइब बाक्ब। मेको इन कली तशा, शुश ग्येरशो बाक्ब। मेकोमी आ दाक्तीकेमी इन कली नक मुर सेल्ब। मेकोमी इन कली तशा ग्येरशा कुम्सो पाइब। यसैया ६२:५
18 चाडमी ग्येरशो खोदेंशो पा कुम्सो पाइब। आन क्येङा ङोन बाक्ब आन कली खुप्नुङ। मेको इन मुर नम। आं पर्बम शुक्शी पाइक्चा पुंइसीनीम।
19 मेना गो इन कली दिप्ब आन कली सजाइ गेनुङ। गो खोइल मदुक्ब आन कली श्येत रे प्रोंइनुङ। मिनु ब्रशा बाक्शो आन कली खुप्नुङमी। मेको आन कली मुने तोक्शो रागीम आं पा ङा मान ताइब सेल्नुङमी। मीका ४:७
20 मेना गो इन कली खुप्शा चाक्नन्नी। मारदे हना गो इन कली रागी नेल्ल ङा मुर आन दातेमी ठेयब सेल्शा, मान ताइब सेल्नन्नी। मिनु गो नेल्ल आन तचा ङा पा इन कली ङोंइती खोदेंशो पा रिम्शो पा बाक्चा गेनन्नी” दे परमप्रभु यावेमी देंत। सेफन्याह २:७; येरमीया २९:१४