4
Ginauri sora abo se tubu, tautaudi.
1 Murina eai abo ea iita, ne, galewa eai, dobila se soe! Arina bagubagunana wa daguguna doha bogigi, abo ea ataiuioi, i ribalaoma arigu eai i ene, “U saema inai, ginauri sora maraitom‐asubena abo se tubu abo ea heitam.”
2 Maesega eau Earua boeana eai, na ne, terona matagu eai, galewa eai se hetoro, eo esau terona eai wa i babawa!
3 Taubawaina ana ao doha we’u namanamarina esana Iaspa wa, eo konelian, eo wari terona wa i hetaiiri, itaitana doha we’u alaalawa emero ana ao.
4 Eo terona headi tau‐esega‐i‐mate‐hasi wau terona bagubagunana wa se totoro‐hetaiiri, potadi eai babada tataodi tau‐esega‐i‐mate‐hasi se babawa, lulu posiposi se luidi, eo urudi eai korona gold.
5 Wau terona eai wa namanamari eo arina dagudagugudi, eo palepalele se laolaoma, terona wa matana eai lamepa haligigi labui se alaala, isi ede Eaubada earuana haligigi labui;
6 eo terona matana eai doha gabogabo daudaumorina, doha galasi, i namanamari eo i nega ariri.
Eo ginauri maumauridi hasi, terona se tau‐hetaiiri, matadi se gamagari, matadi eai eo gedugedudi eai:
7 ginauri maumaurina bagubagunana ana ao doha liona, helabuina ana ao doha bulumakau natuna, hehaionana matana doha tau, eo hehasina doha magisubu lailaina i loiloi.
8 Wau ginauri maumauridi hasi wa, esa eo esa, mabena haligigi‐esega, matadi se gamagari ariri, tupo gamagaridi eai eo boeadi eai, nige se aiyawasi, asubena to maiona se wanawana,
“Tabuna, tabuna, tabuna, iaede Guiau Eaubada gigibori‐aririna, ia beabeana eai wa, eo wau‐ta ia ede, eo maraitom‐asubena abo i laoma!”
9 Abotai ginauri maumauridi ia terona eai taubawa wa se ribatausaei, se aihelahui, se lautoiei, ia wa ma‐maurina i lau e huia nige nosina.
10 Babadayao tau‐esega‐i‐mate‐hasi abo se gurisalaoba, ia terona eai taubawa wa matana eai, tau i mauri wa i lau e huia nige nosina se aihelahui hinage, edi korona se gabadobeidi terona paana eai, se wawana,
11 “U lolo ariri oa, ema Guiau eo ema Eaubada,
hedebasae, wasa lolo, gigibori, enam u abidi,
paana ginauri gamagaridi oa tauhetubudi ede,
em nuatu eai mo se tubu, eo se ginauridi.”