5
Buka aba‐guduyahisina haligigi‐labui.
1 Abotai ia terona eai ie bawa wa nimatutuna eai buka ea iita, aloalona eai eo murimurina eai se uri, eo se gudu, aba‐gududi haligigi‐labui arinai se gudueahisi;
2 eo aneru adiadidirina ea ita, arinana lailaina eai i ribahemasaraha i ene, “Eai ena lolo gonoana buka ta i ala, eo aba‐guduna i soedi?”
3 Na nige esau galewa eai e tanoubu eai, e tanoubu ubuna eai, abina i ata buka wa i soe, e i italau arinai.
4 To ea dou ariri, paana nige esau se lobai ena lolo gonoana buka ta taba i soe, e i italau arinai.
5 Abo wau tautaubada wa, esau i ribalaoma arigu eai i ene, “Tabu u dou, ne, liona wa Iuda ena bogao enana wa, Davida Lamna, ia ginauri gamagaridi i saepoidio, ia abo gonoana buka i soe, aba‐gudueahisina haligigi‐labui hinage.”
6 Abo terona eo ginauri maumauridi hasi wa duaduaridi eai, eo wau babada wa boeadi eai, Mamoe ea iita i totoro, ana ao doha ia se unuhemateo, donana haligigi‐labui, matana haligigi‐labui isi ede Eaubada earuana haligigi‐labui, iaede i hetahetamaridi tanoubu tupo gamagari.
7 Ie lau buka wa ie abi, ia wa terona eai i babawa wa, nimatutuna eai ie abi.
8 Buka wa ie abi, abo ginauri maumauridi hasi wa, eo babadayao tau‐esega‐i‐mate‐hasi, se gurisalaoba Mamoe matana eai, esau, esau nimana eai huelele, eo gulewa gold, alodi eai muramura panepane se gabu heasuasu, iaede hetabu tataodi edi uura;
9 eo wana harihariuna se wanai si ene,
“Oabom lolom gonoana buka ne u abilau, eo abaguduna u soedi,
paana oa ede se unuimo, eo osinam eai tatao u unehaidi Eaubada enana,
hari boga, eo hari arina, eo hari tatao, eo hari basileia,
eo u hetorodi eda Eaubada ena basileia eo ena kohena,
10 eo tanoubu eai ta isi abo tanuaga.”
11 Ea italau, eo arina ea ataiei, doha aneru gamagamagari arinadi, terona se hetaiiri, eo ginauri maumauridi wa, eo babadayao. Se hasiridi gamagarina tausani‐saudoudoi se helai ma‐tausani‐saudoudoi, eo tausani se helai ma‐tausani,
12 arina lailai eai si ene, “Mamoe i lolo ariri, ia se unui wa, gonoana bena gigibori, eo gogo lailai, eo sonoga, eo adidiri, eo hedebasae, eo namanamari, eo nua‐woiwoina i abi!”
13 Na ginauri gamagaridi se hetubudio, galewa eai eo tanoubu eai, eo tanoubu ubuna eai, eo gabogabo potana eai, eo ginauri gamagaridi se hetubudi gabogabo boeana eai hinage, edi riba ea ataiei si ene, “Ia terona eai i babawa, eo Mamoe arinai, bena nua‐woiwoina eo hedebasae, eo namanamarina, eo awa‐tanuagaena, i lau e nige nosina!”
14 Abo ginauri maumauridi hasi wa si ene, “Amen!” eo babadayao se gurisalaoba se aihelahui.