আল্লার পবিত্র ঘর বানানির হুকুম (২৫:১-৩১:১৮)
25
ঘরর মাল-ছামানা যুগানির হুকুম
1 মাবুদে মুছারে কইলা,
2 “তুমি বনি ইসরাইলরে কও, তারা আমার গেছে দান-খয়রাত লইয়া আজির অউক। তারার নিজর খুশিয়ে যেতা দান করবা, অতা তুমি সমজিয়া রাখিও।
3 তারার গেছ থাকি অউ লাখান মাল সমজিও:
সোনা, রুপা, পিতল;
4 লিলুয়া, বাইংগনি, লাল রংগর সুতা;
দামি সুতি কাপড় আর ছাগলর রুমা;
5 লাল রংগ লাগাইল মেড়ার চামড়া, ফু’র চামড়া;
বাবলা লাকড়ি;
6 লেম জালানির লাগি জয়তুনর তেল;
খেলাফতি সমজিবার তেলর মশলা আর আগর-খুশবয় বানানির মশলা;
7 ইমামর লেবাছর এফ্রোন আর বুকুর উপরর থলিত লাগানির আকিক মনি আর বাকি হকল জাতর দামি পাথর।
8 “আমার রওয়ার লাগি তুমি বনি ইসরাইল অকলরেদি পাক-পবিত্র এখান জাগা তৈয়ার করাইবায়। তেউ আমি তারার লগে বসত করমু।
9 আমার রওয়ার ঘর আর মাল-ছামানার বেয়াপারে আমি তুমারে যেলা নমুনা দেখাইমু, এক্কেরে অউ লাখান করি হকলতা তিয়ার করাইও।
শাহাদত সন্দুক বানানির নিয়ম
10 “তারা বাবলা লাকড়ি দিয়া এগু সন্দুক বানাইবা। ইটা লাম্বায় আড়াই আত, দেড় আত পাশ আর দেড় আত উচা।
11 এর বারে-ভিতরে খাটি সোনাদি লেপিয়া দিও, আর চাইরো কিনারো সোনার নকশা লাগাইও।
12 হুনারর আগুইনদি পুড়িয়া চাইরটা সোনার কড়া এর চাইরো কুনাত লাগাইও, অগালাত দুইটা আর হগালাত দুইটা লাগাইও।
13 বাবলা লাকড়িদি দুগু বেন্দা বানাইয়া সোনাদি লেপিয়া দিতে অইবো।
14 সন্দুকরে বইয়া নেয়ার লাগি দুইও গালার কড়ার মাজেদি, অউ দুইও বেন্দা হারানি লাগবো।
15 বেন্দা দুইওটা সন্দুকর কড়ার ভিতরে হারাইল রইবো, ইগুইন খুলিও না।
16 আমি আমার হুকুম-আহকাম লেখা যে পবিত্র শাহাদত পাথর তুমারে দিমু, তুমি ইটা অউ সন্দুকর ভিতরে থইও।
17 “খাটি সোনাদি সন্দুকর এখান ছানি বানাইও, অখানর উপরে গুনার কফরা আদায় করা অইবো। ই ছানি লাম্বায় আড়াই আত আর পাশে দেড় আত অইবো।
18-19 তুমি হউ ছানির কিনারো সোনা পিটাইয়া দুগু কারুবী বানাইও। অউ কারুবী দেখতে দুলদুল ঘোড়ার লাখান ডাখনা আলা। বানাইয়া সন্দুকর দুই গালাত লাগাইও, অগালাত একটা, আর হগালাত একটা। দুইও কারুবী ছানির লগে অউ লাখান করি সোনাদি বানানি লাগব, যেটা আস্তাটা খালি এক চিজ অয়।
20 এর ডাখনা দুইওখান উপরেদি মেলাইল রইবো, আর এর ছায়ার তলে থাকবো সন্দুকর ছানি। দুইও কারুবী মুখামুখি উবা থাকবো, আর তারার চউখ রইবো ছানির বায়।
21 ই ছানিরে সন্দুকর উপরে লাগাইও, আর আমার হুকুম-আহকাম লেখা যে শাহাদত পাথর তুমারে দিমু, অউ পাথর তুমি সন্দুকর ভিতরে থইও।
22 ই শাহাদত সন্দুকর ছানির উপরে দুইও কারুবীর মাজখানো, আমি তুমারে দিদার দিমু। অউ দিদারর সময় বনি ইসরাইলর লাগি আমার হকল আইন-কানুন জানাইমু।
পবিত্র রুটি রাখার টেবুল বানাইও
23 “বাবলা লাকড়ি দিয়া দুই আত লাম্বা, এক আত পাশ আর দেড় আত উচা করি এখান টেবুল বানাইও।
24 অখানরে খাটি সোনাদি লেপিয়া চাইরো কিনারো নকশা লাগাইও।
25 টেবুলর চাইরো কিনারো চাইর আংগুল উচা করি এক হাজ দিবায়, হাজর মাজে সোনাদি নকশা করবায়।
26 টেবুলর চাইরো কুনাত চাইরো পায়ার উপরে সোনার চাইরটা কড়া লাগাইবায়।
27 ই চাইরো কড়াইন টেবুলর কুনার হউ উচা হাজর তলে লাগাইও, যাতে টেবুল বইয়া নেওয়ার বালা কড়ার ভিতরে বেন্দা হারাইল যায়।
28 বেন্দা দুইওটা বাবলা লাকড়িদি বানাইয়া সোনাদি লেপিবায়, অউ বেন্দাদি টেবুল বইয়া নিবায়।
29 টেবুলর উপরর থাল-বাসন, আল্লার নামে ঢালিয়া দিবার শরবত-পানির ছদগার জগ আর মগ, হকলতা খাটি সোনাদি বানানি লাগবো।
30 অউ টেবুলর উপরে আমার ছামনে হামেশা পবিত্র রুটি রাখবায়, ই রুটি যানু সব সময় থওয়া অয়।”
পবিত্র চেরাগ দানি বানানির নিয়ম
31 মাবুদে মুছারে কইলা, “তুমি খাটি সোনাদি এখান চেরাগ দানি বানাইবায়, চেরাগ দানির তলা আর উপরর ডান্ডি খাটি সোনা পিটাইয়া গড়াইবায়। এর ডান্ডি, ফুলর লাখান পিয়ালা, কুড়ি আর পাপড়ি অকল চেরাগ দানির লগে এখানো লাগাইল রইবো।
32 চেরাগ দানির ডান্ডির দুই গালাত তিনটা করি মোট ছয়টা ডাল থাকবো।
33 পরতেক ডালর মাজে জবা ফুলর লাখান তিনগু করি পিয়ালা থাকবো। চেরাগ দানির ছয়ও ডালো এক লাখান কাম করা অইবো।
34 চেরাগ দানির মুল ডান্ডির মাজেও জবা ফুলর লাখান চাইরটা পিয়ালা থাকবো।
35 অউ মুল ডান্ডি থাকি বারইল ছয়টা ডালর মাজে, পয়লা দুইও ডালর জুড়াত এগু কুড়ি, দুছরা দুইও ডালর জুড়াত আরক কুড়ি, আর হেশর দুইও ডালর জুড়াতও কুড়ি দিও।
36 কুড়ি আর ডাল হকলতা চেরাগ দানি থাকি বারইবো, হকলতা মিলিয়া এক চিজ অইবো। আস্তাটাউ খাটি সোনা পিটাইয়া বানানি লাগবো।
37 এরবাদে সাতটা লেম বানাইয়া অউ চেরাগ দানির উপরে অউ লাখান করি লাগানি লাগবো, যাতে লেম জালানির বাদে চেরাগ দানির ছামনা ফর অয়।
38 লেমর ফিতা ছাফ করার চিমটা আর জালাইল ফিতার ছালি থওয়ার লাগি কয়গু বাটি, খাটি সোনাদি বানানি লাগবো।
39 চেরাগ দানির হকলতা বানানির লাগি এক মন খাটি সোনা লাগবো।
40 “হুনো, অউ পাড়র উপরে তুমারে যেলা নকশা দেখাইল অইলো, এক্কেরে অউ লাখান করি হকলতা বানাইও।”