26
আল্লার ঘর বানানির তেরপাল
1 মাবুদে মুছারে কইলা, “তুমি দশ টুকরা পেচাইল সুতার দামি সুতি কাপড়দি আমার ঘরর পর্দা বানাইও। আর লিলুয়া, বাইংগনি, লাল সুতাদি ভালা উস্তাদরেদি এর মাজে কারুবী অকলর ছবি বাইন করাইও।
2 হকল টুকরাইন এক মাপর অইবো, লাম্বায় আটাইশ আত আর পাশে চাইর আত।
3 ই টুকরাইন্তর পাচখান পাচখান করি এখানো জুড়া দিয়া, দুখান বড় তেরপাল বানাইতে অইবো।
4 বড় তেরপালর পয়লা টুকরার পাশর এক কিনারো লিলুয়া সুতাদি হুকর ফুড় বানাইতে অইবো। দুছরা টুকরাতও অউলা করতে অইবো।
5 পয়লা তেরপালর কিনারো পইঞ্চাশগু হুকর ফুড় আর দুছরা তেরপালো অউলা পইঞ্চাশগু ফুড় দিতে অইবো। দুইও বড় তেরপালর হুকর ফুড় এগু আরেগুর উল্টামুখা থাকবো।
6 বাদে সোনাদি পইঞ্চাশগু হুক বানাইয়া হউ ফুড়র মাজেদি হারাইয়া, বড় দুইও তেরপালরে আটকাই দিও। তেউ ই দুইও টুকরাদি এখান ঘর তিয়ার অইবো।
7 “আমার ঘরর উপর গুরার লাগি ছাগলর রুমা দিয়া তেরপালর লাখান এগারোখান টুকরা বানানি লাগবো।
8 হকল টুকরাইন এক মাপর অইবো, তিশ আত লাম্বা আর চাইর আত পাশ।
9 অন থাকি পাচ টুকরা একলগে জুড়া দিয়া বড় এক তেরপাল বানাইতে অইবো। আর বাকি ছয় টুকরা জুড়া দিয়া, বড় আরক তেরপাল বানাইয়া হারলে, অউ দুছরা তেরপালর যে টুকরা বাড়তি রইবো, অখানরে তাম্বুর ছামনর বায় দুই ভাইঞ্জ করি দিতে অইবো।
10 পয়লা বড় তেরপালর পাশর এক কিনারো পইঞ্চাশগু হুকর ফুড় বানাইতে অইবো, আর দুছরা তেরপালোও অউলা অইবো।
11 বাদে পিতল দিয়া পইঞ্চাশগু হুক বানাইয়া হউ হুকর ফুড়র মাজে হারাইয়া, অউ বড় দুইও তেরপাল এখানো জুড়া দিতে অইবো। তেউ ই দুইও তেরপাল মিলিয়া এখান ছানি অইবো।
12 ছাগলর রুমার বড় তেরপালর যে আধা টুকরা বাড়তি অইবো, ইখান খরেদি লটকাইল রইবো।
13 ই তেরপাল খান তলর কাপড় থাকি এক আত বড় অওয়ায় ইখান দুইও গালাবায় লটকাইল রইয়া হারা ঘররে গুরিলিবো।
14 এর উপর গুরার লাগি লাল রংগ করা মেড়ার চামড়াদি আরোখান তেরপাল বানাইয়া গুরি দিতে অইবো। বাদে এর উপরে ফু’র চামড়াদি ছানি তৈয়ার করি গুরি দিতে অইবো।”
আল্লার ঘরর ফ্রেইম বানানির লাকড়ি-তক্তা
15 মাবুদে মুছারে কইলা, “আমার ঘরর লাগি বাবলা লাকড়িদি কয়খান ফ্রেইম বানানি লাগবো।
16 পরতেক ফ্রেইম বানাইবায় দশ আত লাম্বা আর দেড় আত ফাড়।
17 অউ ফ্রেইমো দুগু করি পায়া থাকব। হকল ফ্রেইম এক লাখান বানাইতে অইবো।
18 দক্ষিন গালার লাগি বিশখান ফ্রেইম বানানি লাগবো।
19 ই ফ্রেইমর পায়ার তলে দেওয়ার লাগি চাল্লিশগু রুপার ভুরা বানানি লাগবো, পরতেক ফ্রেইমর দুই পায়ার লাগি দুগু ভুরা লাগবো।
20 আমার ঘরর উত্তর গালার লাগিয়াও বিশখান ফ্রেইম লাগবো,
21 আর পরতেক ফ্রেইমর পায়ার তলর লাগি দুগু করি চাল্লিশগু রুপার ভুরা বানানি লাগবো।
22 পইচমর গালার লাগি, মানি খর গালার লাগি ছয়খান ফ্রেইম,
23 আর খরর দুইও কুনার লাগি আরো দুখান ফ্রেইম লাগবো।
24 ই দুই ফ্রেইমরে দুই কুনার দুইও ফ্রেইমর লগে তলে-উপরে এখানো জুড়া দিতে অইবো। পরতেক কুনার দুই ফ্রেইম ধারর ফ্রেইমর লগে বাত্তি মারিয়া একলগে জুড়া দিতে অইবো। দুইও কুনা এক লাখান অইবো।
25 তেউ খরেদি আটখান ফ্রেইম অইবো, আর পরতেক ফ্রেইমর তলে দেওয়ার লাগি দুগু করি ষোলগু রুপার ভুরা লাগবো।
26 “তুমি ফ্রেইমরে জুড়া দিবার লাগি বাবলা লাকড়িদি কয়গু লাম্বা বাত্তি বানাইও।
27 এর মাজে পাচগু বাত্তি ঘরর এক গালার লাগি, আর বাকি পাচগু আরক গালার লাগি, আর পাচগু লাগবো খর গালা, মানি পচিম গালার ফ্রেইমর লাগি।
28 ফ্রেইমর মাজখানো লাগাইল অউ বাত্তিদি হকল ফ্রেইমর একমাথা থাকি আরক মাথা পর্যন্ত আটকাইবায়।
29 ফ্রেইম খানাইন সোনাদি লেপতে অইবো, আর বাত্তি হারানির লাগি সোনার কড়া বানাইয়া ফ্রেইমো লাগাইতে অইবো। ই বাত্তি অকলও সোনাদি লেপতে অইবো।
30 আমার ঘরর যে নকশা তুমারে অউ তুর পাড়র উপরে দেখাইলাম, তুমি এক্কেরে অউ লাখান করি ইটা তৈয়ার করাইও।”
আল্লার ঘরর লাগি পর্দা
31 মাবুদে মুছারে কইলা, “তুমি লিলুয়া, লাল, বাইংগনি সুতা আর পেচাইল দামি সুতি কাপড়দি এখান পর্দা বানাইও। ভালা কুনু উস্তাদরেদি এর উপরে কারুবী অকলর ছবি বাইন করাইও।
32 ই পর্দাখান বাবলা লাকড়িদি চাইরটা খুটির লগে লাগাইয়া সোনার কড়াদি লটকাই দিবায়, খুটির মাথাত সোনার কড়া লাগাইবায়। আর খুটিগুইন সোনাদি লেপাইবায়, খুটির তলাত রুপার ভুরা লাগাইবায়।
33 পর্দার উপরর সুতি কাপড়ো লাগাইল হুকর লগে পর্দাখান লটকাইল রইবো। ই পর্দার খরে শাহাদত সন্দুক থইবায়। পর্দাদি আমার ঘরর হেরেম শরিফ, মানি খাছ পাক জাগা আর পাক জাগার মাজখানো বেড়া দিও।
34 অউ হেরেম শরিফর ভিতরে শাহাদত সন্দুকর উপরে এর ছানি লাগাইও।
35 ই পর্দার বারে হেরেম শরিফর উত্তর গালাত পবিত্র রুটি রাখার টেবুলখান থইও, আর এর উল্টামুখা দক্ষিন গালাত থইও চেরাগ দানি।
36 “আমার ঘরর দুয়ারর লাগি এখান পর্দা বানাইও, ইখান দামি সুতি কাপড়দি বানাইয়া হারি, লিলুয়া, বাইংগনি, লাল রংগর সুতাদি নকশা করিও।
37 ই পর্দার লাগি সোনার কড়া আর বাবলা লাকড়ির পাচটা খুটি বানাইও। খুটিগুইন সোনাদি লেপাইও, খুটির তলাত পিতলর পাচগু ভুরা লাগাইও।”